ބ. ކަމަދޫއަށް ސީ ޕްލޭން އޮޕަރޭޓްކުރަން ފެށުމުގެ އެއްބަސްވުމާއި، އެ ރަށުގައި އަލަށް އިމާރާތްކުރާ ސްކޫލް އިމާރާތް ބިނާކުރުމުގެ އެއްބަސްވުމުގައި މިއަދު ސޮއިކޮށްފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބ. އަތޮޅަށް ކުރައްވަމުންގެންދަވާ ރަސްމީ ދަތުރުފުޅުގައި މިއަދު ކަމަދޫއަށް ވަޑައިގެން، އެ ރަށުގެ ރައްޔިތުންނާ ބައްދަލުކުރެއްވުމަށް ބޭއްވި ރަސްމިއްޔާތުގައި މި ދެ އެއްބަސްވުމުގައި ސޮއިކުރެވުނެވެ.
ސްކޫލް އިމާރާތް އެޅުމުގެ މަސައްކަތް ހަވާލުކޮށްފައިވަނީ ފަހި ދިރިއުޅުން ކޯޕަރޭޝަން (އެފްޑީސީ) އާއެވެ. މި އެއްބަސްވުމުގައި އެފްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ ހަމްދާން ޝަކީލެވެ. ސަރުކާރުގެ ފަރާތުން ސޮއިކުރެއްވީ އެޑިއުކޭޝަން މިނިސްޓަރު ޑރ. އިސްމާއީލް ޝަފީއެވެ.
ކަަމަދޫއަށް ސީ ޕްލޭން ހިދުމަތް ފެށުމުގެ އެއްބަސްވުމުގައި ސޮއިކުރެއްވުން، ފޮޓޯ: ރައީސް އޮފީސް
ކަމަދޫއަށް ސީ ޕްލޭން ދަތުރުތައް ފެށުމަށް ހޯކްސް ހޮޓެލްސްއާއި ގައުމީ އެއާލައިން މޯލްޑިވިއަންއާ ދެމެދު ވެވުނު އެއްބަސްވުމުގައި ހޯކްސް ހޮޓެލްސްގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓަރ ހުސައިން އަމަނެވެ. މޯލްޑިވިއަންގެ ފަރާތުން ސޮއިކުރެއްވީ އައިލެންޑް އޭވިއޭޝަން ސާވިސަސްގެ މެނޭޖިން ޑިރެކްޓަރ އިބްރާހީމް އިޔާސެވެ.
ކަމަދޫއަކީ ބ. އަތޮޅުގައި މިހާރުވެސް އެންމެ ފުޅާ ދާއިރާއެއްގައި ގެސްޓްހައުސް ވިޔަފާރި ކުރަމުންދާ އެއް ރަށެވެ. އެ ރަށުގައި މިހާރު 13 ގެސްޓްހައުސް ހިންގަމުންދާއިރު، އިތުރު ގެސްޓްހައުސްތައް ތަރައްގީ ކުރަމުންދެއެވެ.
ވެލާނާ އިންޓަނޭޝަނަލް އެއަރޕޯޓާއި ކަމަދޫއާ ދެމެދު ސީ ޕްލޭން ދަތުރުތައް ފެށިގެންދިއުމުން އެ ރަށުގެ ގެސްޓްހައުސް ވިޔަފާރިއަށް އިތުރު ކުރިއެރުމެއް ލިބި، މުޅި ބ. އަތޮޅުގެ ފަތުރުވެރިކަން އިތުރަށް ކުރިއަރައިގެންދާނެ ކަމަށް ބެލެވެއެވެ.