ބ. އަތޮޅު ކަމަދޫ އަތޮޅުގެ ތަރައްޤީގެ ލިސްޓުގެ ފަހަތުގައި އޮތްއޮތުން ނިމުމަކަށް ގެނެސް، އެރަށާމެދު އޮތް ތަފާތުކުރުން ނައްތާލައި، ހަމަހަމަ ތަރައްޤީ ގެނެސްދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ. މިއީ ރައީސް މައުމޫނަށްފަހު އެރަށަށް ރަސްމީ ހައިސިއްޔަތުން ޒިޔާރަތްކުރެއްވި ފުރަތަމަ ރައީސެވެ.
މާޅޮސްމަޑުލު ދެކުނުބުރީގެ ރަށްރަށަށް ކުރައްވަމުންގެންދަވާ ދަތުރުފުޅުގެ ތެރެއިން ކަމަދޫއަށް ވަޑައިގެން ރައްޔިތުންނާ ބައްދަލުކުރެއްވި ރައީސް މުޢިއްޒު ވިދާޅުވީ، އެރަށަށް ވަޑައިގަތީ ރައްޔިތުން ބޭނުންވާ ކަންކަން ބާރު ސްޕީޑުގައި ކުރިއަށް ގެންދަވާނެކަމުގެ ޔަޤީންކަން ދެއްވުމަށް ކަމަށެވެ.
ތަޢުލީމީ ދާއިރާއަށް ޚާއްޞަ ސަމާލުކަމެއް
ރައީސް މުޢިއްޒުގެ ވާހަކަފުޅުގައި، ކަމަދޫ ސްކޫލަކީ ޖާގައިގެ ދަތިކަން ހުރި އަދި އިތުރު ވަސީލަތްތައް ބޭނުންވާ ސްކޫލެއްކަން ފާހަގަކުރެއްވިއެވެ. މި ދަތުރުފުޅުގައި ސްކޫލްގެ އައު އިމާރާތުގެ އެއްބަސްވުމުގައި ސޮއިކުރެއްވިކަމަށާއި، މިކަމާއެކު ސްކޫލަށް ވަސީލަތްތަކާއި ޖާގައިގެ ދަތިކަން ހައްލުވެގެންދާނެކަމަށް ވިދާޅުވިއެވެ.
އިޤްތިޞާދީ ކުރިއެރުމަށް މަގުފަހިކުރުން
ރަށުގެ އިޤްތިޞާދީ ކުރިއެރުމަށް ޓަކައި ސީޕްލޭން ޚިދުމަތް ފެށުމަށް ހޯކްސް ހޮޓެލްއާއެކު އެއްބަސްވުމެއްގައި ސޮއިކުރެވިފައިވާކަން ރައީސް ފާހަގަކުރެއްވިއެވެ. އަދި ސިއްޙީ މަރުކަޒުގެ ޚިދުމަތްތައް ފުޅާކުރުމަށް ޓަކައި “ކުރިއަށް އޮތް މަދު ދުވަސްކޮޅެއްގެ ތެރޭގައި ސިއްޙީ މަރުކަޒުގެ ވަސީލަތްތައް އިތުރުކޮށް، ޖާގައިގެ މައްސަލަ ހައްލުކޮށް، 16 ގަޑިއިރަށް ޚިދުމަތް ދިނުމާއެކު މުޅި މައްސަލައަށް ހައްލު ހޯދައިދޭނަން” ކަމަށް ވިދާޅުވިއެވެ.
މީގެއިތުރުން، ކުޅިވަރުގެ ވަސީލަތްތައް ޤާއިމުކުރުމަށް ބޭނުންވާ ތަކެތި ގެނައުން އެސްޓީއޯއާ ހަވާލުކުރެވިފައިވާކަމަށާއި، ފުޓުބޯޅަ ދަނޑު އެޅުމާއި، މަގުތައް ރަނގަޅު ފެންވަރަކަށް ހެދުމާއި، ބަނދަރުގެ މައްސަލަތައް ހައްލުކުރުމާއި، ގިރާ ސަރަހައްދު ހިމާޔަތްކުރުމުގެ މަސައްކަތްތައް ކުރިއަށް ގެންދެވޭނެކަމަށް ރައީސް ވިދާޅުވިއެވެ.