ފަތުރުވެރިކަން ތަރައްގީވަމުން އަންނަ ރަށްރަށާއި އާބާދީ ކުދި ރަށްރަށުގެ ގުދުރަތީ ރީތިކަން ގެއްލިގެންނުދާނެ ގޮތަށް އެ ރަށްރަށުގެ މަގުތައް ތަރައްގީކުރުމަކީ މުހިއްމު ކަމެއްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވެފައިވަނީ ބ. އަތޮޅުގެ ރަށްރަށަށް ކުރައްވަމުންގެންދަވާ ދަތުރުފުޅުގެ ތެރެއިން ބ. ކަމަދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރެއްވުމުގައެވެ. މި ބައްދަލުވުމުގައި ރައީސް ފާހަގަކުރެއްވި ގޮތުގައި ހުރިހާ ރަށެއްގައިވެސް ހަރު ފަށަލައެއް ތަރައްގީކޮށް، ތާރު އަޅައިގެން ނުވަތަ ގާ އަތުރައިގެން މަގުތައް ތަރައްގީކުރުމަކީ މުހިއްމުކަމެއް ނޫނެވެ.
“ޓޫރިޒަމް ގެސްޓުހައުސްތައް ޑިވެލޮޕްވަމުން އަންނަ، ޓޫރިޒަމް ފުޅާވަމުން އަންނަ ރަށްރަށުގައި، ރަށުގެ ނެޗުރަލް ބިއުޓީ ނޫނީ ގުދުރަތީ ރީތިކަން ވީހާވެސް ބޮޑަކަށް ބެލެހެއްޓޭ ގޮތަކަށް ނޫނިއްޔާ ނެތިގެންނުދާނެ ގޮތަށް މަގުހެދުމަކީ މުހިއްމު ކަމެއް،” ރައީސް ވިދާޅުވިއެވެ.
ރައީސް ހުށަހަޅުއްވާފައިވަނީ ތާރު އެޅުމާއި ގާ އެތުރުމުގެ ބަދަލުގައި މަގުތައް ރީތިކޮށް ދެމެހެއްޓުމާއެކު ފެން ހިންދޭނެ ރަނގަޅު ނިޒާމެއް ގާއިމުކޮށް، މަގުތައް އެންމެ ތަބީއީ ގޮތުގައި ދެމެހެއްޓުމަށެވެ. އަދި ކަމަދޫ ރައްޔިތުން އެދޭނަމަ، އެގޮތަށް އެ ރަށުގެ މަގުތައް ތަރައްގީކުރުމުގެ މަސައްކަތް ސަރުކާރުން ކުރިއަށްގެންދާނެކަމަށް ވިދާޅުވެފައިވެއެވެ.
މީގެއިތުރުން ރައީސް ވަނީ ކަމަދޫގެ ސިއްހީ މަރުކަޒު ތަރައްގީކުރުމާއި، ފުޓުބޯޅަ ދަނޑުގެ ޓާފްގެ މަސައްކަތް ނިންމުމާއި، ބަނދަރު ހެދުމާއި، ގިރާ ސަރަހައްދު ހިމާޔަތްކުރުމުގެ މަސައްކަތްތައް ކުރިއަށް އޮތް ތަނުގައި ފެށިގެންދާނެކަމުގެ ޔަގީންކަން ދެއްވާފައެވެ. ސިއްހީ މަރުކަޒުގެ އަމަލީ މަސައްކަތް މި އަހަރުގެ ފަހުކޮޅު ފެށިގެންދާނެކަމަށް ރައީސް ވިދާޅުވިއެވެ.