ސަރުކާރަށް ދިމާވި ގޮންޖެހުންތަކުން އަރައިގަނެ ތަރައްޤީގެ މަޝްރޫޢުތައް ކުރިއަށްގެންދެވޭނެ މަގު މިހާރު ވާނީ ފަހިކޮށްފައި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މިފަދައިން ރައީސް ވިދާޅުވީ ބ. އަތޮޅުގެ ރަށްތަކަށް ކުރައްވާ ރަސްމީ ދަތުރުފުޅުގައި މިއަދު މެންދުރު ކުޑަރިކިލަށް ވަޑައިގެން އެރަށުގެ ރައްޔިތުންނާ ބައްދަލުކުރެއްވުމަށްފަހުގައެވެ.
“އަޅުގަނޑުމެންނަށް ދިމާވި އެކިއެކި ދަތިތަކުން އަރައިގަނެވި އެކިއެކި ރަށްރަށުގައި، މިރަށް ހިމެނޭހެން ކުރަންޖެހިފައި ހުރި ކަންކަމުގައި ކުރިއަށްދެވޭނެ މަގު އަޅުގަނޑުމެން މިހާރު ވާނީ ފަހިކޮށްފަ” ކަމަށް ރައީސް ވިދާޅުވިއެވެ. އަދި ރިޔާސީ އިންތިޚާބުގައި ރައްޔިތުން އެމަނިކުފާނަށް ކުރެއްވި އިތުބާރުގެ ނަތީޖާ ދައްކުވައިދެއްވާނެ ކަމަށްވެސް ވިދާޅުވިއެވެ.
ކުޑަރިކިލުގެ ތަރައްޤީއަށް ގިނަ މަޝްރޫޢުތަކެއް ކުރިއަށް ގެންދަވާނެކަން ރައީސް އިޢުލާނު ކުރެއްވިއެވެ. މިގޮތުން، އެރަށަށް ދިމާވެފައިވާ އެންމެ ބޮޑު މައްސަލައަކީ ފެނާއި ނަރުދަމާގެ މަސައްކަތް ހުއްޓިފައި އޮތުން ކަމަށް ފާހަގަކުރައްވައި، އެ މަޝްރޫޢު މިމަހު ތެރޭގައި އަލުން ފަށައި، 6 މަސްދުވަހުގެ ތެރޭގައި ނިންމަވައިދެއްވާނެކަމަށް ވިދާޅުވިއެވެ.
މީގެއިތުރުން، މަގުހެދުމުގެ މަސައްކަތް އާރުޑީސީއާ ޙަވާލުކޮށްފައިވާ ކަމަށާއި، ތަޢުލީމީ ދާއިރާއިން ސްކޫލުގެ މަސައްކަތް އަމަލީ ގޮތުން ފެށިގެންދާނެ ކަމަށް ވިދާޅުވިއެވެ. އަދި މަލްޓި ޕާޕަސް ހޯލަކާއި އައު މިސްކިތެއް އެޅުމުގެ މަސައްކަތްވެސް ކުރިއަށް ގެންދަވާނެ ކަމުގެ ޔަޤީންކަން ދެއްވިއެވެ.
ކުޅިވަރުގެ ދާއިރާއިން ފުޓްބޯޅަ ދަނޑު ތަރައްޤީކުރުމާއި، ފިޓްނެސް އެންޑް ރެކްރިއޭޝަން ސެންޓަރެއް އަދި ހޭންޑްބޯޅަ ކޯޓެއް ތަރައްޤީކުރުމުގެ މަޝްރޫޢުތައް ކުރިއަށް ގެންދަވާނެ ކަމަށް ރައީސް އިޢުލާނުކުރެއްވިއެވެ. މި ދަތުރުފުޅުގައި ރައީސް ވަނީ ރަށު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއެކު މުހިންމު މަޝްވަރާތަކެއްވެސް ކުރައްވާފައެވެ.