ބ. ކެންދޫގެ ބިންހިއްކުމާއި، ބަނދަރު އަޕްގްރޭޑް ކުރުމާއި، ގޮނޑުދޮށް ހިމާޔަތް ކުރުމުގެ މަޝްރޫޢު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްފިއެވެ. މި މަޝްރޫޢުގެ އެއްބަސްވުމުގައި ސޮއިކުރެވިފައިވަނީ ރައީސް ޑރ. މުހައްމަދު މުޢިއްޒު ބ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު އެރަށުގައި ބޭއްވި ރަސްމިއްޔާތެއްގައެވެ.
119.3 މިލިއަން ރުފިޔާގެ މި މަޝްރޫޢުގެ އެއްބަސްވުމުގައި މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ މިނިސްޓަރ ޑރ. އަބްދުﷲ މުއްތަލިބެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަހްމަދު ސައުދީއެވެ.
މި މަޝްރޫޢުގެ ދަށުން 112,016 އަކަމީޓަރުގެ ސަރަހައްދެއް ހިއްކުމާއި، 29,854 ކޮޑިމީޓަރުގެ ވެލި ބަނދަރު އަދި ނެރު ފުންކުރުމުގެ މަސައްކަތް ހިމެނެއެވެ. މީގެ އިތުރުން 278 މީޓަރުގެ އެއްގަމު ތޮށި ޖެހުމާއި، 10 މޫރިންގ ބޮއި ހަރުކުރުމާއި، ދެ ރޭމްޕް އެޅުމާއި، 75 މީޓަރުގެ ޖެޓީއެއް އެޅުމުގެ މަސައްކަތްވެސް ހިމެނެއެވެ.
ގޮނޑުދޮށް ހިމާޔަތްކުރުމަށްޓަކައި 971 މީޓަރުގެ ރިވެޓްމަންޓް ޖެހުމާއި، 62 މީޓަރުގެ ފައިކަށި އަދި 29 މީޓަރުގެ ނެރު ފައިކަށި ޖެހުމުގެ މަސައްކަތްވެސް މި މަޝްރޫޢުގެ ދަށުން ކުރެވޭނެއެވެ. އަދި ބަނދަރު ސަރަހައްދުގެ އަލިކަން އިތުރުކުރުމަށް 9 ބަނދަރު ބައްތިއާއި 2 ނެރު ބައްތި ހަރުކުރުމާއި، އެއްގަމު ތޮށި ވަށައިގެން 5 މީޓަރު ފުޅާމިނުގެ ޕޭވްމަންޓެއް އެޅުމުގެ މަސައްކަތްވެސް ހިމެނެއެވެ.
މި މަޝްރޫޢުގެ މަސައްކަތްތައް ނިންމުމަށް ހަމަޖެހިފައިވަނީ 450 ދުވަހުގެ ތެރޭގައެވެ. މި މަޝްރޫޢު ނިމުމުން ކެންދޫގެ ބަނދަރުގެ ޚިދުމަތްތައް ފުޅާވެ، ރަށުގެ ބިމުގެ ތަނަވަސްކަން އިތުރުވެގެންދާނެ ކަމަށް ބެލެވެއެވެ.