ރަށްރަށުގެ ރައްޔިތުން ހިންގާ ޢާންމު ވިޔަފާރީގެ ތެރެއަށް ކައުންސިލްތަކުން ނުވަނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިލްތިމާސްކުރައްވައިފިއެވެ. މިފަދައިން އެމަނިކުފާނު ވިދާޅުވެފައިވަނީ ބ. ކެންދޫ ރައްޔިތުންނާ ބައްދަލުކުރެއްވުމަށް އެރަށަށް ކުރެއްވި ދަތުރުފުޅެއްގައެވެ.
މި ބައްދަލުވުމުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ކެންދޫގެ ބަނދަރާއި ބިން ހިއްކުމާއި ގޮނޑުދޮށް ހިމާޔަތްކުރުމަށް ސޮއިކުރެވުނު އެއްބަސްވުމަކީ އެކުއެކީގައި ކުރިއަށްދާނެ ތިން މަޝްރޫޢުކަމަށާއި، މީގެ ހެޔޮ ނަތީޖާ ކައިރި މުސްތަގުބަލެއްގައި ފެންނާނެ ކަމަށެވެ. އަދި ރިޔާސީ އިންތިޚާބުގައި ވަޢުދުވެވަޑައިގެންފައިވާ ފަދައިން މަގުތައް ހެދުމުގެ މަސައްކަތްވެސް ވަރަށް އަވަހަށް ފައްޓަވާނެކަމަށް އެމަނިކުފާނު ވިދާޅުވިއެވެ.
ރައީސް ޑރ މުޢިއްޒު ވިދާޅުވީ، “އަންނަ އަހަރަކީވެސް ގެދޮރުގެ މައްސަލަ ހައްލުކުރުމަށް އިސްކަންދޭނެ އަހަރެއް” ކަމަށެވެ. އެގޮތުން ބިން ހިއްކުމުގެ މަސައްކަތް ނިމުމުން ގެދޮރުވެރިކަމުގެ މަޝްރޫޢު ކުރިއަށް ގެންދަވާނެކަމަށާއި، ކެންދޫގައިވެސް ހައުސިންގ މަޝްރޫޢުއެއް ކުރިއަށް ގެންދަވާނެކަމުގެ ޔަޤީންކަން އެމަނިކުފާނު ދެއްވިއެވެ.
ސިއްޙީ ދާއިރާއާއި ކުޅިވަރުގެ ދާއިރާއަށްވެސް ސަމާލުކަން ދެއްވާނެކަމަށް ރައީސް ވިދާޅުވިއެވެ. މިގޮތުން ޒުވާނުންނަށް ބޭނުންވާ ކުޅިވަރުގެ ވަސީލަތްތައް ޤާއިމްކުރުމަށްޓަކައި ފުޓުބޯޅަ ދަނޑާއި، ފިޓްނަސް އެންޑް ރެކްރިއޭޝަން ސެންޓަރާއި އައުޓްޑޯ ޖިމް ތަރައްޤީކުރުމުގެ މަސައްކަތް މިއަހަރު ތެރޭގައި ފެށޭނެކަމަށް އެމަނިކުފާނު ވިދާޅުވިއެވެ.
ލާމަރުކަޒީ ނިޒާމާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ، މަޖުބޫރުކޮށްގެން އެއްވެސް ކައުންސިލެއް މާލެ ގެންގޮސްގެން ބައްދަލު ނުކުރާނެކަމަށާއި، އެމަނިކުފާނުގެ ސިޔާސަތަކީ ވަޒީރުންނާއި ކުންފުނިތަކުގެ ވެރިން ރަށްރަށަށް ވަޑައިގެން ބައްދަލުކުރުން ކަމަށެވެ. އަދި ބައެއް ކައުންސިލްތަކުން ބްލޮކް ގްރާންޓާއި އާމްދަނީގެ ގޮތުގައި ލިބޭ ފައިސާ ނުރަނގަޅު ގޮތުގައި ބޭނުންކުރާކަންވެސް ފާހަގަކުރެއްވިއެވެ. ރައީސް ޑރ މުޢިއްޒު ވަނީ ބައެއް ކައުންސިލްތަކުން ތަޖުރިބާ ދަތުރުގެ ނަމުގައި ބްލޮކް ގްރާންޓް ބޭނުންކޮށްގެން ކުރާ ދަތުރުތަކާމެދު ކަންބޮޑުވުން ފާޅުކުރައްވައި، ބްލޮކް ގްރާންޓަކީ ރައްޔިތުންނަށް ޚިދުމަތް ދިނުމަށާއި އާމްދަނީ ހޯދުމަށް ދެވޭ ފައިސާކަން ހާމަކުރައްވާފައެވެ.
ރައީސް ޑރ މުޢިއްޒު ވިދާޅުވީ ބައެއް ކައުންސިލްތަކުން އާންމު ރައްޔިތުންގެ ވިޔަފާރިތަކަށް ވަދެ، ޒިންމާދާރުކަން ކުޑަ ގޮތެއްގައި ޢަމަލުކުރަމުންދާކަން ފާހަގަކުރެވޭ ކަމަށެވެ. އަދި “ލޯކަލް ކައުންސިލް ކުންފުނިތަކުން އާންމުންގެ ވިޔަފާރިތަކަށް ނުވަދެވޭނެ” ކަމަށް ރައީސް ޑރ މުޢިއްޒު ވަނީ ސާފުކޮށް ވިދާޅުވެފައެވެ.
މި މައްސަލަތައް ހައްލުކުރުމަށްޓަކައި ލާމަރުކަޒީ ޤާނޫނަށް އިސްލާޙުތަކެއް ގެނެވި، ކައުންސިލްތަކުން އުފައްދާ ލޯކަލް އޮތޯރިޓީ ކުންފުނިތަކުގެ ވިޔަފާރީގެ ހަރަކާތްތަކާއި، ކައުންސިލްތަކަށް ދެވޭ ހިލޭ އެހީގެ ފައިސާ ބޭނުންކުރުމުގެ އުސޫލުތައް އިތުރަށް ހަރުދަނާކުރެވިފައިވާ ކަމަށް ރައީސް ވިދާޅުވިއެވެ.
މި އިސްލާޙުގެ ދަށުން ކައުންސިލްތަކުގެ ބޭންކް އެކައުންޓްތައް ބަލަހައްޓަންޖެހޭނީ މާލީ ކަންކަން ހިންގުމާބެހޭ ވުޒާރާއިން ކަނޑައަޅާ އުސޫލުތަކާ އެއްގޮތަށެވެ. އަދި އެ ވުޒާރާއިން އެދިއްޖެނަމަ އެކައުންޓްތަކުގެ ސްޓޭޓްމަންޓް ފޯރުކޮށްދިނުމަކީ ކައުންސިލްތަކުގެ ޒިންމާއެއްގެ ގޮތުގައި ހަމަޖެހިގެންދާނެއެވެ.