ބ. އޭދަފުށީގައި ދިވެހިރާއްޖޭގެ ޤައުމީ ޔުނިވަރސިޓީގެ ކެމްޕަހެއް ތަރައްޤީކުރުމުގެ މަޝްރޫޢު، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ ރަސްމީކޮށް ހަވާލުކޮށްފިއެވެ. މި މަޝްރޫޢުގެ އެއްބަސްވުމުގައި ސޮއިކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބ. އޭދަފުށީގެ ރައްޔިތުންނާ ބައްދަލުކުރެއްވުމަށް ބޭއްވެވި ޚާއްސަ ރަސްމިއްޔާތެއްގެ ތެރެއިންނެވެ.
މި ރަސްމިއްޔާތުގައި އެއްބަސްވުމުގައި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ އަޙްމަދު ސަޢުދީއެވެ. ދިވެހިރާއްޖޭގެ ޤައުމީ ޔުނިވަރސިޓީގެ ފަރާތުން ސޮއިކުރެއްވީ ވައިސް ޗާންސެލަރ ޑރ. އައިޝަތު ޝެހެނާޒް އާދަމްއެވެ. މި މަޝްރޫޢު އެމްޓީސީސީއާ ހަވާލުކުރުމާއެކު، އޭދަފުށީގެ ތަޢުލީމީ ކުރިއެރުމަށް ބޮޑު ކުރިއެރުމެއް ލިބިގެންދާނެ ކަމަށް ވަނީ ބެލެވިފައެވެ.
މި މަޝްރޫޢުގެ ދަށުން އެކި ބޭނުންތަކަށް ޚާއްސަ ކުރެވިފައިވާ ޢިމާރާތްތަކެއް ތަރައްޤީކުރުމަށް ހަމަޖެހިފައިވެއެވެ. އެގޮތުން 6000 އަކަފޫޓުގެ ސަރަޙައްދެއްގައި ދެ ފަންގިފިލާގެ ދަރިވަރުން ތިބޭނެ އެކޮމޮޑޭޝަން ބްލޮކެއް ތަރައްޤީކުރެވޭނެއެވެ. މީގެ އިތުރުން 3200 އަކަފޫޓުގެ ސަރަޙައްދެއްގައި ދެ ފަންގިފިލާގެ މުވައްޒަފުން ތިބޭނެ އެކޮމޮޑޭޝަން ބްލޮކަކާއި، 3000 އަކަފޫޓުގެ ސަރަޙައްދެއްގައި ދެ ފަންގިފިލާގެ އެޑްމިނިސްޓްރޭޓިވް ބްލޮކެއްވެސް ހެދުމަށް ވަނީ ހަމަޖެހިފައެވެ. ކިޔަވައިދިނުމުގެ ބޭނުންތަކަށް ޚާއްސަކޮށް، 4000 އަކަފޫޓުގެ ސަރަޙައްދެއްގައި ދެ ފަންގިފިލާގެ ކްލާސްރޫމް ބްލޮކެއް ހެދުމާއިއެކު، ހަމަ އެފަދައިން 4000 އަކަފޫޓުގެ ސަރަޙައްދެއްގައި ދެ ފަންގިފިލާގެ އެކަޑަމިކް ފެސިލިޓީޒް ބްލޮކެއް ހެދުމުގެ މަސައްކަތްވެސް މި މަޝްރޫޢުގެ ތެރޭގައި ހިމެނެއެވެ.
މި މަޝްރޫޢަށް 80.79 މިލިއަން ރުފިޔާ ޚަރަދުވާނެ ކަމަށް އަންދާޒާ ކުރެވޭއިރު، މަސައްކަތް ނިންމުމަށް 720 ދުވަސް (ގާތްގަނޑަކަށް ދެ އަހަރު) ދިނުމަށް ވަނީ ހަވާލުކޮށްފައެވެ. ބ. އަތޮޅުގެ ވެރިކަން ކުރާ ރަށް ކަމަށްވާ އޭދަފުށީގައި 3500 އަށް ވުރެ ގިނަ މީހުން ދިރިއުޅެއެވެ. ޚާއްސަކޮށް، ތަޢުލީމީ ޒުވާނުން ގިނަ މި ރަށުގައި ޤައުމީ ޔުނިވަރސިޓީގެ ކެމްޕަހެއް ތަރައްޤީކުރުމަކީ ރަށުގެ ޒުވާނުންނަށް މަތީ ތަޢުލީމު ހާސިލްކުރުމަށް ފަހިވާނެ މުހިންމު ފުރުސަތެކެވެ.