ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ބ. އަތޮޅުގެ ރަށްތަކަށް ކުރައްވަމުންދާ ދަތުރުފުޅުގެ ތެރެއިން މިއަދު ހަވީރު ފެހެންދޫއަށް ވަޑައިގެން، އެރަށުގައި އޭޓީއެމްގެ ޚިދުމަތް ފައްޓަވައިދެއްވައިފިއެވެ. ފެހެންދޫއަށް މިއަދަކީ ހަގީގަތުގައި ވެސް ބޮޑު ދުވަހެކެވެ. ރަށާއި ރަށުގެ ރައްޔިތުންގެ އަމާންކަމާއި ރައްކާތެރިކަމުގެ ޔަގީންކަންދޭނެ ބެލެނިވެރިން އާދެ، ފުލުހުންގެ މަރުކަޒުގެ ބިންގާވެސް މިއަދު މިވަނީ އަޅައި، ތަނުގެ މަސައްކަތްވެސް ފަށާފައެވެ.
ފެހެންދޫގެ ރައްޔިތުން ރައީސަށް ހޫނު މަރުޙަބާއެއް ދެންނެވިއެވެ. ރައްޔިތުންނާ ސަލާމްކުރެއްވުމަށްފަހު، ރައީސް ވަނީ އެރަށުގައި އޭޓީއެމްގެ ޚިދުމަތް ރަސްމީކޮށް ފައްޓަވައިދެއްވާފައެވެ. މި ޚިދުމަތް ފެއްޓެވުމުގެ ގޮތުން ރައީސް ވަނީ އަމިއްލަފުޅަށް އޭޓީއެމުން ފައިސާ ނަންގަވާފައެވެ.
ފެހެންދޫގައި އިމާރާތްކުރާ ޕޮލިސް ސްޓޭޝަންގެ ބިންގާ އަޅުއްވައިދެއްވީ މިނިސްޓަރ އޮފް ހޯމްލޭންޑް އެންޑް ސެކިއުރިޓީ އަލީ އިޙްސާނާއި، ކޮމިޝަނަރ އޮފް ޕޮލިސް އިސްމާއީލް ނަވީނާއި، ތުޅާދޫ ދާއިރާގެ މެންބަރު އަބްދުލް ހަންނާނެވެ.
ރާއްޖޭގެ ހުރިހާ ރަށެއްގައި ފުލުހުން ޤާއިމުވެ ތިބޭނެ އިންތިޒާމު ހަމަޖެއްސުމަށް ފުލުހުންގެ މަރުކަޒުތައް އެޅުމަކީ ރައީސް މުޢިއްޒުގެ ވައުދުފުޅެކެވެ. މި ވައުދުފުޅާ އެއްގޮތަށް މިހާރު ވަނީ ރާއްޖޭގެ ވަރަށް ގިނަ ރަށްރަށުގައި ފުލުހުންގެ މަރުކަޒުތައް ޤާއިމުކުރައްވާފައެވެ.
ރައީސް މުޢިއްޒު ބ. އަތޮޅުގެ ރަށްތަކަށް ކުރައްވާ މި ދަތުރުފުޅު އިއްޔެ ވަނީ ފައްޓަވާފައެވެ. މި ދަތުރުފުޅުގައި އަތޮޅުގެ އެކި ރަށްރަށުގައި ތަރައްޤީގެ އެކި މަޝްރޫޢުތައް ފައްޓަވައިދެއްވަމުން ގެންދަވައެވެ.