އދ. މާމިގިލީ މަގު ހެދުމުގެ މަޝްރޫއުގެ މަސައްކަތް ހަލުވިކަމާއެކު އަވަސްމިިނެއްގައި ކުރިޔަށްދާ ކަމަށް ރޯޑް ޑިވެލޮޕްމަންޓް ކޯޕްރޭޝަން (އާރުޑީސީ) އިން ހާމަކޮށްފިއެވެ.
އާރުޑީސީން މީޑިއާއާ ހިއްސާކުރި މަޢުލޫމާތުގައިވާ ގޮތުން، މި މަޝްރޫއުގެ ދަށުން މިވަގުތު ކުރިޔަށްދަނީ ރަށުގެ ގެވެހި މަގާއި ޖަވާހިރު މަގުގައި މަގުބައްތިތަކަށް ކޭބަލް ގުޅުމުގެ މަސައްކަތެވެ. މި މަސައްކަތަކީ މަޝްރޫއުގެ މުހިންމު ބައެއްގެ ގޮތުގައި ފާހަގަކުރެވެއެވެ.
މި މަޝްރޫއުގެ ދަށުން ހެދޭ މަގުތަކުގައި ފެންބޮޑުވުމުގެ މައްސަލަ ހައްލުކުރުމަށް ޚާއްސަ ސަމާލުކަމެއް ދީފައިވާކަން އާރުޑީސީން ފާހަގަކޮށްފައިވެއެވެ. އެގޮތުން، ފެންބޮޑުވުމުގެ މައްސަލަ ހައްލުކުރުމަށް ސްޓޯމް ވޯޓަރ ސިސްޓަމަކާއި ޕަމްޕް ސްޓޭޝަނެއް އެ ރަށުގައި ޤާއިމުކުރެވޭނެއެވެ.
ދައުލަތުގެ ބަޖެޓުން 80 މިލިއަން ރުފިޔާގެ ބޮޑު އިންވެސްޓްމަންޓެއް ކުރާ މި މަޝްރޫއަކީ އދ. މާމިގިލީގެ ރައްޔިތުންނަށް ގިނަ ފައިދާތަކެއް ކުރާނެ މަޝްރޫއެއްގެ ގޮތުގައި ބެލެވެއެވެ. މި މަޝްރޫއުގެ ސަބަބުން ރަށުގެ މަގުތައް ރަނގަޅު ފެންވަރަކަށް ތަރައްޤީވެ، ރައްޔިތުންނަށް ދިމާވާ ގިނަ ދަތިތަކެއް ހައްލުވެގެންދާނެއެވެ.
އާރުޑީސީން މަޢުލޫމާތު ދޭގޮތުގައި މި މަޝްރޫއުގެ މަސައްކަތްތައް ކުރިޔަށްދަނީ ކަނޑައެޅިފައިވާ ތާވަލާ އެއްގޮތަށެވެ. އަދި މަޝްރޫއު ނިމުމުން މާމިގިލީގެ މަގުތަކަކީ ޒަމާނީ ފެންވަރުގެ ރަނގަޅު މަގުތަކަކަށް ވެގެންދާނެއެވެ.