ބ. ފުޅަދޫ ކައިރީގައި އޮންނަ، އެއަތޮޅުގެ އެންމެ ހިތްގައިމު ގޮނޑުދޮށް، އާދެ ބީޗާއި މޫދު އޮންނަ ކަމަށް ބުނާ ފަޅުރަށް، އިންނަފުށި، ފުޅަދޫ ކައުންސިލާ ހަވާލުކުރަން ސަރުކާރުން ނިންމައިފިއެވެ.
މިކަން ނިންމެވީ ރައީސް ޑރ. މުހައްމަދު މުއިއްޒު ފުޅަދޫ ރައްޔިތުންނާއި ކައުންސިލާ ބައްދަލުކުރެއްވުމަށްފަހުއެވެ.
ފުޅަދޫ ކައުންސިލުންނާއި އާންމު ރައްޔިތުން ރައީސްގެ އަރިހުގައި އެދިވަޑައިގެންނެވީ އެރަށުގެ އިޚްތިޞާޞްގައި އޮތް ފަޅުރަށް، އިންނަފުށި، ބެލެހެއްޓުން ކައުންސިލާ ހަވާލުކޮށްދެއްވުމަށެވެ. ރައީސް ވިދާޅުވިގޮތުގައި އިންނަފުށި ބަލަހައްޓާނެ ފަރާތެއް ނެތުމުގެ ސަބަބުން މިހާރު އެރަށް އޮތީ ކުނި ގިނަވެ، ނުބެލެހެއްޓި، މިކަމަށް ހައްލެއް ހޯދަންޖެހިފައެވެ.
"އެރަށް ރަނގަޅަށް ބެލެހެއްޓި، އެރަށުން އެކަށީގެންވާ އާމްދަނީއެއް ރަށަށާއި ކައުންސިލަށް ލިބޭނެ ގޮތަށް، ރަށަށް އޭގެ ފައިދާ ލިބޭނެ ގޮތެއް ހަމަޖެހިގެންދާނެ،" ރައީސް މުއިއްޒު ވިދާޅުވިއެވެ. އަދި ރަނގަޅު މެނޭޖްމަންޓް ޕްލޭނެއް ކައުންސިލާއި ޓޫރިޒަމް އެންޑް އެންވަޔަރަމަންޓް މިނިސްޓްރީއާ ދެމެދު އެކުލަވާލުމަށްފަހު، އެ ޕްލޭނާ އެއްގޮތަށް އިންނަފުށި ކައުންސިލާ ހަވާލުކުރައްވާނެ ކަމަށް ވިދާޅުވިއެވެ.
ބަޔޮސްފިއަރ ރިޒާވް ސަރަހައްދުގައި ހިމެނޭ އިންނަފުށި ހަވާލުކުރުމުގެ މަސައްކަތް ބ. އަތޮޅަށް ކުރައްވާ ދަތުރުފުޅަށްފަހު ލަސްތަކެއްނުވެ ކުރިއަށް ގެންދަވާނެ ކަމަށް ރައީސް ވަނީ ވިދާޅުވެފައެވެ. މީގެއިތުރުން، އަންނަ އަހަރުގެ ބަޖެޓުގައި ހިމަނައިގެން ފުޅަދޫގައި މިސްކިތެއް ބިނާކުރެއްވުމަށާއި ރަށުގެ ތަރައްޤީއަށް ވެވަޑައިގެންނެވި ވައުދުފުޅުތަކުގެ އަމަލީ މަސައްކަތްތައްވެސް އަވަހަށް ފެށިގެންދާނެ ކަމަށް ރައީސް ވަނީ ވިދާޅުވެފައެވެ.
ފުޅަދޫއަކީ ފަތުރުވެރިކަމުގެ ދާއިރާގައި ކުރިއަރާފައިވާ ރަށަކަށްވެފައި، އެރަށާ ކައިރީގައި އޮންނަ އިންނަފުށި ބޭނުންނުކުރެވި އޮތުމާމެދު ކައުންސިލުން ވަނީ ކަންބޮޑުވުން ފާޅުކޮށްފައެވެ. މިހާރު ނިންމާފައިވާ ނިންމުމާއެކު، ރަނގަޅު މެނޭޖްމަންޓް ޕްލޭނެއްގެ ދަށުން އެރަށުން ކައުންސިލަށް ލިބޭނެ އާމްދަނީގެ މިންވަރާއި އިންސައްތަ ކަނޑައެޅިގެންދާނެއެވެ.