އަހިވަކަކީ މޮރިންޑާ ސިޓްރިފޯލިއާގެ ޢިލްމީ ނަމުން މަޝްހޫރު، ދުނިޔޭގެ އެކި ކަންކޮޅުތަކުގައި ތަފާތު ނަންނަމުން މަޝްހޫރު މޭވާއެކެވެ. މައިގަނޑު ގޮތެއްގައި ބޯ ޖަންގަލިތަކާއި އައްސޭރިފަށުގައި ހެދޭ މި ގަހަކީ 9 މީޓަރަށް އުސްވެ ހެދޭ، ގަދަ ފެހިކުލައިގެ ފަތްތަކެއް ހުންނަ ގަހެކެވެ. މި ގަހުގައި ކުދި ހުދު މާތައް ފޮޅި، ކުކުޅު ބިހުގެ ބައްޓަމަށް ހުންނަ 4-7 ސެންޓިމީޓަރުގެ މޭވާ އަޅައެވެ.
އަހިވަކަކީ ސިއްހީގޮތުން ވަރަށް ގިނަ ފައިދާތަކެއް ލިބޭ މޭވާއެކެވެ. މީގެ ތެރޭގައި ހަޖަމު ކުރުމުގެ ނިޒާމު ރަނގަޅުކުރުމާއި، ލޭމައްޗަށް ދާ މީހުންނަށްވެސް މިއީ ވަރަށް ފައިދާހުރި ބާވަތެކެވެ. ނޭވަޔަށް އުނދަގޫކުރާ މީހުންނާއި ހަކުރުބަލީގެ މީހުން ބޭނުން ކުރުމަށްވެސް އެހާމެ ރަނގަޅު މޭވާއެބެ. ކެންސަރާއި ޓިއުމަރު އުފެދުން ހުއްޓުވުމާއި، ފާރުގަނޑުތަކުގައި ހުންނަ ޖަރާސީމުތައް ނައްތާލުން ހިމެނެއެވެ. އަދި މިއީ ދިފާޢީ ބާރު ވަރުގަދަކޮށްދޭ، ތަދު ކަނޑުވައިދޭ އަދި ހުޅުތަކުގެ ދުޅަ ކަނޑުވައިދޭ މޭވާއެކެވެ.
ހުތްފޮނި އަދި ކުޅި ރަހައެއްދޭ މި މޭވާ ހާބަނޑާހުރެ ކޮންމެ ދުވަހަކު ބޭނުން ކުރާ ކަމަށްވާނަމަ ހަށިގަނޑުގެ އެތެރޭގައި އުފެދޭ ވައިގެ އުދަގޫތައް ލުއިކޮށްދެއެވެ. އޭގައި ހުންނަ ރަހައާއި ޒާތެއްގެ ކުޅިކަން ފިލުވާލުމަށް ބައެއް މީހުން ހަކުރުއަޅައިގެން މޮޑެގެން ބޭނުންކުރެއެވެ. އަނެއްބައި މީހުން ޖޫސްގިރައިގެން ބޭނުންކުރެއެވެ.
އަހިވައް ގަހުގެ ބައިތައް ކަމުގައިވާ އަހިވައް، ފަތް، ތޮށި، މާ، މޫ، ފަދަ ބައިތައް ބޭނުންކޮށްގެން ފާރުގަނޑު، އެތެރޭގައި ހެދޭ ފާރު، މުލިހި، ފަންގަސްގެ ޖަރާސީމް އެޅުން، ބޮލުގެ ހަމުގެ ބަލިތަކަށް ފަރުވާކޮށްފައި ވެއެވެ. މީގެ އިތުރުން އަހިވައް ޖޫހަކީ ޝޭމްޕޫ އެއްގެ ގޮތަށް ބޭނުންކުރެވިދާނެ އެއްޗެކެވެ. އަދި އެގޮތަށް ބޭނުންކުރުމުން އިސްތަށިތައް ވަރުގަދަވެ، ބޮލުގައި އުކުނު އެޅުމުން ދުރުކޮށްދެއެވެ.
ދުނިޔޭގެ އެކި ޤައުމުތަކުގައި އަހިވައް ބޭނުންކުރަނީ ތަފާތު ގޮތްގޮތަށެވެ. މެލޭޝިޔާގައި އަހިވައްފަތް ހޫނުކޮށްގެން މޭމަތީގައި އަޅައި، ކެއްސުމާއި މޭނުބައިކަން ފަރުވާކުރުމަށް ބޭނުންކުރެއެވެ. އިންޑޮނޭޝިޔާގައި ބޭރަށް ހިންގުން، އަދި ނޭވާލުމުގެ ދަތިކަން ފަދަ ބަލިތަކަށް ފަރުވާގެ ގޮތުގައި އަހިވައް ބޭނުންކުރެއެވެ.