މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެއްލައްކަ ރުފިޔާއާ ހަމައަށް އިސްލާމިކް ފައިނޭންސް ފަންޑިން ލިބޭ “ތަމްވީލް އިމްޕެކްޓް ޕިޗް ޗެލެންޖް” ގެ ނަމުގައި މުބާރާތެއް އިއުލާނުކޮށްފިއެވެ. މި މުބާރާތުގެ މައިގަނޑު މަޤްޞަދަކީ މާލީ ހޭލުންތެރިކަމާއި އަދި ވަކިން ޚާއްސަކޮށް ރާއްޖޭގެ އިސްލާމީ ފައިނޭންސްގެ ދާއިރާ ކުރިއެރުވުމެވެ.
މި މުބާރާތް ބަހާލެވިފައިވަނީ ދެ ގިންތިއަކަށެވެ. ފުރަތަމަ ގިންތި އަމާޒުކޮށްފައިވަނީ އިސްލާމީ ފައިނޭންސިންއަށް އާ ހައްލުތަކާ ގުޅޭގޮތުންނެވެ. މި ގިންތީގައި ބައިވެރިވެވޭނީ 18 އަހަރުން މަތީގެ ވަކިވަކި ފަރުދުންނާއި 3 މެމްބަރުންގެ ޓީމްތަކަށެވެ. މި ގިންތީގެ ވަނަ ހޯދާ ފަރާތަކަށް 30،000 ރުފިޔާއާ ހަމައަށް ފައިސާގެ އިނާމާއި ފަންޑިން އަދި މެންޓަރޝިޕް ފުރުޞަތުތައް ލިބޭނެއެވެ.
ދެވަނަ ގިންތި އަމާޒުކޮށްފައިވަނީ “ދިރާސާއާއި ސިޔާސަތުގެ އަލީގައި ވަށައިޖެހޭ އިސްލާމިކް ފައިނޭންސް ނިޒާމެއް” މި މަޢުޟޫއަށެވެ. މި ބައިގައި ދިރާސާކުރާ ފަރާތްތަކާއި، ދާއިރާގެ ފަންނީ ތަޖުރިބާކާރުންނާއި މުއައްސަސާތަކަށް ބައިވެރިވެވޭނެއެވެ. މި ގިންތީގައި ބައިވެރިވާ ފަރާތްތަކުން ވާދަކުރާނީ އެއްލައްކަ ރުފިޔާގެ ފަންޑަކަށެވެ.
އެމްއެމްއޭއިން ފާހަގަކޮށްފައިވާ ގޮތުގައި މި މުބާރާތަކީ “ތަމްވީލް ފިންލެޓް ފެސްޓިވަލް” ގެ ތެރެއިން ބާއްވާ އެއް ހަރަކާތެވެ.
ތަމްވީލް އިމްޕެކްޓް ޕިޗް ޗެލެންޖަކީ ދުޅަހެޔޮ މާލީ ނިޒާމަކާއި ދެމެހެއްޓެނިވި އިޤްތިޞާދީ ތަރައްޤީގެ ޒަރީޢާއިން މުޖުތަމަޢުތައް ބާރުވެރިކުރުވުމަށް އެމްއެމްއޭއިން ފަށަފައިވާ ތަމްވީލް ފިންލެޓް ފެސްޓިވަލުގެ ބައެކެވެ. މި ފެސްޓިވަލުގައި އިމްޕެކްޓް ޕިޗް ޗެލެންޖުގެ އިތުރުން 5 ހަރާކާތެއް ކުރިއަށްދާނެއެވެ. އޭގެތެރޭގައި،
- ފިންލެޓް ޗެލެންޖް،
- އިކޮންކުއެސްޓް ބަހުސް މުބާރާތް،
- ފިއުޗަރ ފައިނޭންސްގެ ނަމުގައި ބާއްވާ މަޒުމޫނު މުބާރާތް،
- ވެލިއުސް އެންޑް ވިޝަން އާޓް މުބާރާތުގެ އިތުރުން ކުރު ވީޑިއޯ ހެދުމުގެ މުބާރާތެއްވެސް ހިމެނެއެވެ.
މުބާރާތުގައި ބައިވެރިވުމުގެ ފުރުޞަތު ރާއްޖެ އާއި ރާއްޖޭން ބޭރުގެ ފަރާތްތަކަށް ހުޅުވާލާފައިވާއިރު، އެމްއެމްއޭގެ މުވައްޒަފުންނާއި އެ އިދާރާގެ ޕާޓްނަރުންނަށް މުބާރާތުގައި ވާދައެއް ނުކުރެވޭނެއެވެ.