ރާއްޖޭގައި ތެލާއި ލޮޖިސްޓިކްސްގެ ޚިދުމަތް ފޯރުކޮށްދިނުމުގައި ކުރީ ސަފުގައި ހިމެނޭ ދަ ހޯކްސް ޕްރައިވެޓް ލިމިޓެޑުން މިއަދު ވަނީ އެ ކުންފުނީގެ އުޅަނދުފަހަރުގެ އަދަދު އިތުރުކޮށްފައެވެ. މިގޮތުން ކުންފުނިން ވަނީ 25,415 މެޓްރިކް ޓަނުގެ ޖާގައިގެ ތެޔޮ ޓޭންކަރެއް ކަމަށްވާ "ހޯކްސް ލިބަޓީ" ގަނެފައެވެ.
މި އުޅަނދަކީ ހޯކްސްގެ އުޅަނދުފަހަރުގެ ތެރެއިން އެންމެ ބޮޑު ތެޔޮ ޓޭންކަރެވެ. އަދި މިއީ ރާއްޖޭގެ އަމިއްލަ ކުންފުންޏަކުން ގެންގުޅޭ އެންމެ ބޮޑު ތެޔޮ ޓޭންކަރުވެސް މެއެވެ. "މި އުޅަނދު ގަތުމާއެކު ކުންފުނީގެ ޚިދުމަތް ލިބިގަންނަ ފަރާތްތަކަށް އެކަށީގެންވާ އަދި އިތުބާރުހުރި ގޮތެއްގައި ތެޔޮ ފޯރުކޮށްދިނުމުގެ ޤާބިލުކަން ވަރަށް ބޮޑަށް އިތުރުވެގެންދާނެ" ކަމަށް ހޯކްސްއިން ބުނެފައިވެއެވެ.
(ވީޑިއޯ:ދަ ހޯކްސް ޕވޓ ލިމިޓެޑް، އެފްބީ ރީލްސް)
2007 ވަނަ އަހަރު އުފެދުނު ހޯކްސް ޕްރައިވެޓް ލިމިޓެޑަކީ ރަނގަޅު ފެންވަރުގެ ތެޔޮ އަދި ފުރިހަމަ ޚިދުމަތް ފޯރުކޮށްދިނުމުގައި ކާމިޔާބު ރެކޯޑެއް އޮތް ކުންފުންޏެކެވެ. މި އުޅަނދާއެކު މިހާރު ކުންފުނީގައި 11 ތެޔޮ ޓޭންކަރު ހިމެނެއެވެ. މީގެ އިތުރުން ކުންފުނީގައި 15 ބާޖު، 20 ބައުޒަރު، އަދި ރާއްޖޭގެ އެކި ހިސާބުތަކުގައި ގާއިމުކޮށްފައިވާ 15 ފިއުލް ޝެޑް ހިމެނެއެވެ.
ހޯކްސްއިން ބުނެފައިވާ ގޮތުގައި އެމްޓީ ހޯކްސް ލިބާޓީއަކީ ކުންފުނީގެ އިތުބާރާއި ކަސްޓަމަރުންގެ ހިތްހަމަޖެހުން ދެމެހެއްޓުމަށާއި، ދިވެހި އިޤްތިޞާދުގެ އިތުރުވަމުންދާ ބޭނުންތަކަށް އިތުރަށް ޚިދުމަތް ކުރުމަށާއި، ޚިދުމަތް ދެމުންދާ ބައިނަލްއަޤްވާމީ މާކެޓްތަކުގައި ޕްރެސެންސް ވަރުގަދަކުރުމަށް އެހީތެރިވެދޭނެ އަގުހުރި ވަސީލަތެކެވެ.