ކުށްކުރާ ސަރަހައްދުތަކުގައި ކުޑަކުދިން ގްރޫޕު ހަދައިގެން ތިބޭ މިންވަރު އިތުރުވަމުންދާތީ، ބެލެނިވެރިން ވީހާވެސް ގާތުން ކުދިންގެ ކަންކަން ބަލައި ދަރިން ރަނގަޅު ތަރުބިއްޔަތެއްގައި ބޮޑުކުރުމަށް މަސައްކަތްކޮށްދިނުމަށް ދިވެހި ފުލުހުންގެ ޚިދުމަތުން ބެލެނިވެރިންގެ ކިބައިން މިއަދު އެދިއްޖެއެވެ.
ފުލުހުން މިގޮތަށް އެދުނީ، ފުލުހުންގެ ޕެޓްރޯލިންތަކުން ކުށްކުރާ ސަރަހައްދުގައި ތިބޭ ކުޑަ ފިރިހެން ކުދިންގެ އަދަދު އިތުރުވަމުންދާކަމުގެ ކަންބޮޑުވުން ފާޅުކޮށް، އެކަން ބެލެނިވެރިންގެ ސަމާލުކަމަށް ގެނެސް މިއަދު ނެރުނު ބަޔާނެއްގައެވެ.
ފުލުހުންގެ ބަޔާނުގައިވާ ގޮތުން، ފުލުހުން ދުވަހުން ދުވަހަށް ކުރާ އާންމު ޕެޓްރޯލިން އާއި ތަފާސް ހިސާބުތަކުން ދައްކާ ގޮތުގައި، ކުށް ހިންގާ ކަމަށް ފާހަގަކުރެވޭ ބައެއް ސަރަހައްދުތަކުގައި އުމުރުން 18 އަހަރު ނުފުރޭ ފިރިހެން ކުދިންގެ ގްރޫޕްތައް އެއްވެ ތިބޭ މިންވަރު އިތުރުވަމުންދާކަން ވަނީ ފާހަގަކުރެވިފައެވެ.
ފުލުހުން ބުނެފައިވާ ގޮތުގައި، ކުށުގެ މާހައުލުތަކަށް ކުޑަކުދިން ހުށަހެޅުމަކީ ނުހަނު ކަންބޮޑުވާ ކަމެކެވެ. މިކަމުގެ ސަބަބުން ކުޑަކުދިން ގުރޫމިންގެ ޝިކާރައަކަށްވެ، ރައްކާތެރިނޫން ހާލަތްތަކާ ކުރިމަތިލާން ޖެހުމުގެ ފުރުސަތު އިތުރުވެގެންދެއެވެ. މީގެ އިތުރުން، ގުރޫޕު ހަދައިގެން ރަށުތެރޭ ކުދިން އުޅުމުން ގަވާއިދާ ހިލާފަށް އެއްގަމު އުޅަނދު ދުއްވުމަށް ހިތްވަރު ލިބި، މައިންބަފައިންނާ ނުރުހުންވެ ފިލައިގެން ގެއިން ނުކުމެ، މަސްތުވާތަކެތީގެ ވަބާއަށް ހުށަހެޅޭ، އަދި އެހެނިހެން ގާނޫނާ ހިލާފު އަމަލުތަކުގައި ބައިވެރިވުމުގެ ފުރުސަތު އިތުރުވެގެންދާކަމަށް ފުލުހުން ވަނީ ފާހަގަކޮށްފައެވެ.
“މިފަދަ ކަންކަމަށް މައިންބަފައިންނާއި ބެލެނިވެރިން އިތުރަށް ސަމާލުވެ، ކުދިން ހަރަކާތްތެރިވާ ތަންތަން ބެލުމަށާއި، އަދި ރައްކާތެރިކަމާއި ޒިންމާދާރު އުޅުމާ ބެހޭގޮތުން އެ ކުދިންނާއެކު ވާހަކަދައްކައި މަޝްވަރާތައް ކުރެއްވުމަށް އިލްތިމާސްކުރަމެވެ،” ފުލުހުންގެ ބަޔާނުގައި ވެއެވެ.
ފުލުހުންގެ ބަޔާނުގައި ބުނެފައިވާ ގޮތުގައި ކުދިންގެ އެފަދަ ހަރަކާތްތައް މޮނިޓާކުރުމަށް ފުލުހުން މިހާރުވެސް މަސައްކަތްކުރަމުންދެއެވެ. އެގޮތުން، އެފަދަ ސަރަހައްދުތަކަށް އަމާޒުކޮށް ސްޕޮޓް ޗެކް ކުރުމާއި، ދުވަހުން ދުވަހަށް ކުރާ ޕެޓްރޯލިންގެ ތެރެއިން ގާތުން މޮނިޓާކޮށް ބަލަހައްޓަމުން ގެންދާނެ ކަމަށް ވަނީ ބުނެފައެވެ. އަދި، ކުޑަ ކުދިންގެ ރައްކާތެރިކަމާއި ދުޅަހެޔޮކަން ކަށަވަރުކުރުމަށްޓަކައި މައިންބަފައިންނާއި، ތައުލީމީ ވުޒާރާއާއި، އަދި ދައުލަތާއި މުޖުތަމައުގެ ކަމާބެހޭ ފަރާތްތަކާ ގުޅިގެން މަސައްކަތްތަކެއް ކުރުމަށްވެސް ވަނީ ހަމަޖެހިފައެވެ.
ކުދިންގެ ކަންކަމާ ގުޅިގެން އެއްވެސް އެހީތެރިކަމެއް ބޭނުންފުޅުވާނަމަ ކަމާބެހޭ ފަރާތްތަކުގެ އެހީތެރިކަން ހޯދުމަށްވެސް ފުލުހުން ވަނީ އިލްތިމާސްކޮށްފައެވެ. އެހީތެރިކަން ހޯދުމަށް ފެމިލީ އެންޑް ޗައިލްޑް ޕްރޮޓެކްޝަންގެ ނަންބަރު 9790163 އަށް ގުޅުމަށާއި، ވިކްޓިމް ސަޕޯޓް ޔުނިޓްގެ ނަންބަރު 9770640 އަށް ގުޅުމަށް އެދިފައިވެއެވެ. ކުއްލި ހާލަތެއްގައި 911 އަށް ގުޅުމަށްވެސް ފުލުހުން ހަނދާންކޮށްދީފައިވެއެވެ.
“ކުޑަ ކުދިން ހެޔޮ ގޮތުގައި ތަރުބިއްޔަތު ކޮށް، އެ ކުދިންނަކީ ޒިންމާދާރު، ހެޔޮލަފާ، ހުލްގުހެޔޮ ބައެއްގެ ގޮތުގައި މުޖުތަމައަށް ނެރެދެއްވުމަށްޓަކައި، އެންމެހައި މައިންބަފައިންނާއި ބެލެނިވެރިންގެ އިތުރުން، ކަމާގުޅުންހުރި ދައުލަތުގެ އެންމެހައި މުއައްސަސާތަކުން ވެސް ދެމެހެއްޓެނިވި ގޮތެއްގައި މަސައްކަތްކުރުމަށް މި ފުރުސަތުގައި ގޮވާލަމެވެ،” ފުލުހުންގެ ބަޔާން ނިންމާލާފައިވެއެވެ.