ފަލަސްތީންގެ ލޮބުވެތި މުސްލިމުންގެ ދިފާޢުގައި، ދިވެހިންގެ އެއްބައިވަންތަކަމުގެ ގޮތުން ފާޅުކުރާ މެސެޖުގެ މަތީގައި “ކަނބުލޮ”ގެ ޕޯސްޓަރު ހަރުކުރެވިފައިވާތީ، އެކަމަށްޓަކައި ސެޓަރން ސްޓޫޑިއޯ އާއި އަދި “ކަނބުލޮ” ޓީމްގެ ފަރާތުން މަޢާފަށް އެދެފިއެެވެ.
ފަލަސްތީނާ ގުޅުންހުރި މެސެޖު،#WeFailedGAZA ގެ ގްރެފިޓީ މަތީގައި މި ސްޓޫޑިއޯއެއްގެ ފިލްމެއް ކަމަށްވާ “ކަނބުލޮ” ގެ ޕޯސްޓަރުތައް ހަރުކުރެވިފައިވާ ކަމުގެ މައުލޫމާތާއި ދިވެހި ރައްޔިތުންގެ ކަންބޮޑުވުންތައް ސެޓާން ސްޓޫޑިއޯއަށް ލިބިފައިވާ ކަމަށާއި، އަދި އެކަން ވީހާވެސް އަވަހަކަށް އެ ސްޓޫޑިއޯގެ ސަމާލުކަމަށް ގެނެސްދެއްވާފައިވާތީ އެކަމަށްޓަކައި އެ ސްޓޫޑިއޯއިން ވަނީ ޝުކުރުއަދާކޮށްފައެވެ.
ފަލަސްތީނުގެ ދިފާޢުގައި ކުރެވޭ އެއްވެސް ކަމަކަށް އިޙްތިރާމް ކުޑަކުރުމަކީ ދުވަހަކުވެސް އެ ސްޓޫޑިއޯގެ ވިސްނުމެއް ނޫން ކަމަށާއި މިފަދަ އިސްލާމީ އުޚުއްވަންތަކަން ރަމްޒު ކޮށްދޭ ކޮންމެ މަސައްކަތެއްގައި މި ސްޓޫޑިއޯ އޮންނާނީ ބަދަހިކަމާއެކު ދިވެހިންގެ ވިސްނުމާއި، ޝޫޢޫރު ތަކާއެކުގަ ކަމަށް ސެޓަރން ސްޓޫޑިއޯއިން ވަނީ ބުނެފައެވެ.
“ފިލްމްގެ ޕޯސްޓަރ ތަތްކުރުމަކީ ވިޔަފާރި އުސޫލުން ބަޔަކަށް އައުޓްސޯސްގެ ކޮށްގެން ކުރަމުން އަންނަ ކަމެކެވެ. ރޭގެ ވަގުތެއްގައި އަޅުގަނޑުމެންގެ ޓީމުގެ ސަމާލުކަށް މި މައްސަލަ އައުމާއި އެކު، ވީއެންމެ އަވަހަކަށް މިޓީމުން ވަނީ ގްރެފިޓީ ތަކުގެ މަތީގައި ތަތް ކުރެވިފައިވާ ޕޯސްޓަރތައް ނައްޓާލާފައެވެ. އަދި މިކަމާއި ގުޅިގެން އަޅުގަނޑުމެން މިދަނީ އެ ގްރެފިޓީ ތައްޔާރުކުރި ފާރާތާއި އެކީ ވާހަކަ ދެކެވި މަޝްވަރާ ކުރަމުންކަން މި ފުރުސަތުގައި ފާހަގަކޮށްލަމެވެ.” ސެޓަރން ސްޓޫޑިއޯ އިން ބުނެފައިވެއެވެ.
ކުރިއަށް އޮތް ތަނުގައި ޕޯސްޓަރުތައް ހަރުކުރުމުގެ މަސައްކަތުގައި މިއަށްވުރެ ޒިންމާދާރުކޮށް އަދި މިފަދަކަމެއް ތަކުރާރު ނުވާނެގޮތަކަށް މަސައްކަތް ކުރާނެ ވާހަކަ ދިވެހިރައްޔިތުންނަށް ޔަގީންކޮށް އަރުވާ ކަމަށާއި، ހަމަ މިއާއިއެކު، މީގެ ކުރިންވެސް މިފަދަ ކަމެއް ތަކުރާރުވެފައިވާ ކަމަށް ބައެއް ފަރާތްތަކުން ތުހުމަތު ކޮށްފައިވީނަމަވެސް، މިއަދާއި ހަމަޔަށް އެފަދަ ޝަކުވާއެއް، އަދި ކަންބޮޑުވުމެއްވެސް ސެޓަރން ސްޓޫޑިއޯއާއި ހަމަޔަށް އައިސްފާ ނުވާކަން އެ ސްޓޫޑިއޯއިން ވަނީ ބުނެފައެވެ.
“ޓީމެއްގެ ގޮތުގައި އަޅުގަނޑުމެން ފަލަސްތީނުގެ ރައްޔިތުންނާއެކު ތިބެމެ، އެމީހުންގެ މަސައްކަތަށް ހޭލުންތެރިކަން އިތުރުކޮށްދޭ ކޮންމެ ހަރަކާތަކަށް އިހުތިރާމް ކުރާހާލު، ފަލަސްތީނުގެ ހައްޤުގައި ދިވެހިން މިކުރާ މަސައްކަތުގައި މާތްﷲ ބަރަކާތް ލައްވާ އަދި ފަލަސްތީނަކީ ވީހާވެސް އަވަހަކަށް މިނިވަން ދައުލަތެއްގެ ގޮތުގައިވުމަކީ އަޅުގަނޑުމެންގެ އެންމެންގެ ދުޢާއެވެ.” ސެޓަރން ސްޓޫޑިއޯ އިން ވަނީ ބުނެފައެވެ.