ރާއްޖޭގެ ޒަކާތު ހައުސް އުފެދުނު ފަހުން ފާއިތުވެގެންދިޔަ ފުރަތަމަ އަހަރަކީ ތާރީޚީ ގިނަ ކާމިޔާބީތަކެއް ހާސިލްކުރެވުނު އަހަރެއް ކަމަށް، ޒަކާތު ހައުސްގެ ޗެއާމަން އަދި އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސައީދު މިއަދު ވިދާޅުވެއްޖެއެވެ. ވަޒީރު މިފަދައިން ވިދާޅުވީ ޒަކާތު އިންޓަނޭޝަނަލް ކޮންފަރެންސްގައި ވާހަކަފުޅު ދައްކަވަމުންނެވެ.
ވަޒީރު ޝަހީމް ފާހަގަކުރެއްވި ގޮތުގައި، ރައީސް ޑރ. މުޙައްމަދު މުޢިއްޒު ދިވެހިރާއްޖޭގެ ޒަކާތު ހައުސް އުފެއްދެވުމާއެކު، ޒަކާތުގެ ނިޒާމު ހަރުދަނާކޮށް، އާންމުންގެ ހޭލުންތެރިކަން އިތުރުކުރުމަށް ކުރެވުނު މަސައްކަތްތަކުގެ ސަބަބުން، ފާއިތުވެދިޔަ އަހަރަކީ ޒަކާތުގެ ނިޒާމަށް އެންމެ ކާމިޔާބު އަހަރެވެ. އެގޮތުން ރާއްޖޭގެ ތާރީޚުގައި އެންމެ ގިނަ އަދަދަކަށް މުދަލު ޒަކާތާއި ފިޠުރު ޒަކާތް ލިބިގެންދިޔައީ މިދިޔަ އަހަރު ކަމަށް ވަޒީރު ފާހަގަކުރެއްވިއެވެ.
ޒަކާތު ހައުސްގެ މި ކުރިއެރުންތަކާއި ކާމިޔާބީތައް ހާސިލްކުރެވިފައިވަނީ، މިނިވަންކަމާއެކު މަސައްކަތްކުރުމުގެ ފުރުސަތު ސަރުކާރުން ފަހިކޮށްދެއްވާފައިވާތީ ކަމަށް ވަޒީރު ފާހަގަކުރެއްވިއެވެ. އަދި މިކަމަށް ރައީސް ޑރ. މުޢިއްޒު ދެއްވާ އިސްކަމަށް ޝުކުރު އަދާކުރެއްވިއެވެ.
މިހާރު ރައްޔިތުންގެ މަޖިލީހަށް ހުށަހެޅިފައިވާ ޒަކާތު ބިލާ ގުޅޭގޮތުން ވާހަކަފުޅު ދައްކަވަމުން ވަޒީރު ވިދާޅުވީ، މި ބިލް ފަރުމާކުރެވިފައިވަނީ ދުނިޔޭގެ އެންމެ ފަހުގެ އިލްމީ ތަޖުރިބާތަކުގެ މައްޗަށް ކަމަށެވެ. “މި ބިލް ގާނޫނަކަށް ވެގެންދާއިރު، ޒަކާތުގެ ގާނޫނަކީ ވަރަށް ފުރިހަމަ އަދި ރާއްޖޭގެ ޒަކާތުގެ ނިޒާމު އާ އުސްމިންތަކަކަށް ގެންގޮސްދޭނެ ގާނޫނަކަށް ވެގެންދާނެ” ކަމުގެ އުންމީދު ފާޅުކުރެއްވިއެވެ.
ވަޒީރު އިތުރަށް ވިދާޅުވި ގޮތުގައި، ޒަކާތު ހައުސްއަށް ޚާއްޞަ ވަކި އޮފީހެއް ގާއިމްކޮށް މަސައްކަތް އިތުރަށް ފުޅާކުރުމުގެ މަސައްކަތްތައްވެސް މިހާރު ކުރިއަށްދެއެވެ. އަދި ފާއިތުވެދިޔަ އަހަރުގެ ޒަކާތު ކޮންފަރެންސްގައި ފަންނީ ބޭފުޅުންގެ ފަރާތުން ހުށަހެޅުނު މުހިންމު ހުށަހެޅުންތައް ތަންފީޒުކުރުމުގެ މަސައްކަތްވެސް ކުރިއަށްދާ ކަމަށް ވިދާޅުވިއެވެ.
ވަޒީރުގެ ވާހަކަފުޅު ނިންމަވާލެއްވީ ޒަކާތު ހައުސްގެ މުވައްޒަފުން ކުރައްވާ ބުރަ މަސައްކަތް ފާހަގަކުރައްވައި، އެ މުވައްޒަފުންގެ މަސައްކަތާމެދު ފަޚުރުވެރިވެވަޑައިގަންނަވާ ކަމަށް ވިދާޅުވެ، އެންމެހާ މުވައްޒަފުންނަށް ޝުކުރު އަދާކުރައްވަމުންނެވެ.