އިމިގްރޭޝަން އޮފިސަރެއްގެ ގޮތުގައި ހެދިގެން ބިދޭސީއެއްގެ އަތުން ފޭރުނު މައްސަލައެއްގައި ގ. ބެރުގޭ މުހައްމަދު ނަވީން، ކުރިން ހައްޔަރުކުރުމަށްފަހު ދޫކޮށްފައިވަނިކޮށް، ފިހާރައަކުން ޗޮކްލެޓެއް ވަގަށް ނެގުމުގެ ތުހުމަތުގައި އަލުން ހައްޔަރުކޮށްފިއެވެ.
މިދިޔަ އަހަރުގެ ސެޕްޓެމްބަރު މަހު ހިނގި މައްސަލައިގައި ނަވީން އިމިގްރޭޝަން އޮފިސަރެއްގެ ގޮތުގައި ހެދިގެން ބިދޭސީން ދިރިއުޅޭ ގެއަކަށް ވަދެ، ބަނގްލަދޭޝް މީހެއްގެ އަތުން ފޯނަކާއި 9،000 ރުފިޔާ ފޭރިގަތް ކަމަށް ތުހުމަތުކުރެވުނެވެ. އެ މައްސަލައިގައި އޭނާ ހައްޔަރުކޮށްފައިވަނީ ކޯޓު އަމުރެއްގެ ދަށުންނެވެ.
އެންމެ ފަހުން ހައްޔަރުކުރެވުނު މައްސަލައިގައި ހުކުރު ދުވަހު ކްރިމިނަލް ކޯޓަށް ހާޒިރުކުރެވުނު ނަވީން، 15 ދުވަހުގެ މުއްދަތަށް ބަންދުގައި ބެހެއްޓުމަށް ކޯޓުން އަމުރުކޮށްފިއެވެ. ބަންދު މަޖިލީހުގައި ނަވީން ބުނެފައިވަނީ ޗޮކްލެޓް ހިފައިގެން ބޭރަށް ދިޔައީ ބޭރުގައި ހުރި މީހެއްގެ އަތުން ފައިސާ ހޯދައިގެން އައިސް ފައިސާ ދެއްކުމަށް ކަމަށެވެ.
ކޯޓު ރެކޯޑްތަކުން ދައްކާ ގޮތުގައި މިދިޔަ މޭ މަހުވެސް މިފަދަ މައްސަލައެއްގައި ނަވީން ހައްޔަރުކޮށްފައިވެއެވެ. އަދި 2023 ވަނަ އަހަރު ސައިކަލެއް ވަގަށް ނެގި ކަމުގެ ތުހުމަތުގައި އޭނާއާ ދެކޮޅަށް މައްސަލައެއް ހުށަހެޅުނު ނަމަވެސް، އެ މައްސަލައިގައި އޭނާގެ މައްޗަށް ކުށް ސާބިތުނުވާ ކަމަށް ކޯޓުން ނިންމާފައިވެއެވެ.
ބަންދު އަމުރުގައި ފާހަގަކޮށްފައިވާ ގޮތުން ނަވީންއަކީ ބަންދު ރެކޯޑް ގިނަ މީހެކެވެ. އޭނާގެ މައްޗަށް މިހާރު ތުހުމަތުކުރެވިފައިވާ މައްސަލައިގެ ތަހުގީގު ފުލުހުން ކުރިއަށް ގެންދަމުންދެއެވެ.