ރާއްޖެއަށް ފަސް ކިލޯގެ މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި ހައްޔަރުކުރި ނެދަލޭންޑްސްގެ މާބަނޑު އަންހެން މީހާ، ބްރިޓެނީ އަޑޯފޯ ބޮއާފޯގެ ބަންދަށް 30 ދުވަސް ޖަހައިފިއެވެ.
އުމުރުން 21 އަހަރުގެ ބްރިޓެނީ ހައްޔަރުކުރީ އޭނާގެ ލަގެޖު ތެރޭ ހުރި ފޮއްޓަކުން ފަސް ކިލޯގެ މަސްތުވާތަކެތި ފުލުހުންނަށް ފެނުމާ ގުޅިގެންނެވެ. އޭނާގެ މައްޗަށް ކުރެވޭ ތުހުމަތަކީ މަސްތުވާތަކެތި އެތެރެކޮށް ވިއްކާ ވިޔަފާރި ކުރުމެވެ.
ކްރިމިނަލް ކޯޓުގައި ބޭއްވުނު އަޑުއެހުމުގައި ބްރިޓެނީގެ ވަކީލު ބުނެފައިވަނީ އޭނާގެ ލަގެޖު ފޮށި ބަދަލުކޮށްފައިވާ ކަމަށެވެ. އަދި ކޮންޓްރޯލް ޑެލިވަރީއަށް އެއްބާރުލުން ނުދެވުނީ ހިނގަމުންދިޔަ ކަންތައްތަކާ މެދު އޭނާއަށް އެއްވެސް މަޢުލޫމާތެއް ނޭނގޭތީ ކަމަށް ވަކީލު ފާހަގަކުރިއެވެ. މީގެ އިތުރުން، މާބަނޑު އަންހެނަކަށްވީތީ އޭނާގެ ހާލަތަށް ރިޢާޔަތްކޮށް ތަޙުޤީޤު އަވަސްކޮށްދިނުމަށް ވަކީލު އެދިފައިވެއެވެ.
މިއީ ބްރިޓެނީގެ ބަންދަށް މުއްދަތު ޖެހި ދެވަނަ ފަހަރެވެ. މި މަހުގެ 9 ވަނަ ދުވަހު އޭނާ ހައްޔަރުކުރުމަށްފަހު 15 ދުވަހުގެ މުއްދަތެއް ވަނީ ޖަހާފައެވެ.
ފާއިތުވި ދުވަސްތަކުގައި ވެސް ރާއްޖެއަށް މަސްތުވާތަކެތި އެތެރެކުރަން އުޅުނު ގިނަ ބިދޭސީން ވަނީ ހައްޔަރުކޮށްފައެވެ. އެގޮތުން މި މަހުގެ 17 ވަނަ ދުވަހު ވެސް ސްޕެއިންގެ ފިރިހެނަކު ވަނީ ހައްޔަރުކޮށްފައެވެ. މަސްތުވާތަކެތި އެތެރެކޮށް ވިއްކާ ވިޔަފާރި ކުރުން ހުއްޓުވުމަށްޓަކައި، މަސްތުވާތަކެތި އެތެރެކުރާ މީހުންނަށް މަރުގެ އަދަބު ދިނުމާމެދު ރައީސް މުޢިއްޒު ދަނީ ރައްޔިތުންގެ ޚިޔާލު ހޯއްދަވަމުންނެވެ.