ކްރިއޭޓިވް ނެޓްވޯކުގެ އަލަތު ފީޗާ ފިލްމު “ލިލީ” ރިލީޒްކުރާނެ ތާރީޚު ހާމަކޮށް، ފިލްމުގެ މައިގަނޑު ކެރެކްޓަރުގެ ޓްރެއިލާ ވަނީ ދައްކާލައިފައެވެ. ކްރައިމް ތްރިލާ ޖާންރާގެ މި ފިލްމު އޮލިންޕަހަށް އަންނާނީ ނޮވެންބަރު 20 ގައެވެ.
ފިލްމުގެ މައިގަނޑު ދައުރު ކުޅޭނީ ކުރިއަރަމުން އަންނަ ފިލްމީ ތަރި އައިޝާ އަލީއެވެ. އޭނާ ކުޅޭނީ ލިލީގެ ދައުރެވެ. މި ދައުރުގެ ޕޯސްޓަރާއި ވީޑިއޯ ޓީޒާއެއް މިހާރު ވަނީ އާންމުކޮށްފައެވެ. ކެރެކްޓަރ ޓްރެއިލާގައި އައިޝާ އަލީ ފެނިގެންދާ މަންޒަރުތަކުން ތަފާތު ގިނަ އިހުސާސްތަކެއް ދައްކުވައިދެއެވެ.
ޓްރެއިލާގައި ފެނިގެންދަނީ އައިޝާ ލޯގަނޑެއް ކުރިމަތީގައި ރީތިވާން އިންނަ މަންޒަރެވެ. އޭނާގެ ކައިރީގައި އިހުގެ ރަތްފުށް ދަޅަކާއި، ފެހި ކޯލާވޯޓަރ ފުޅިއަކާއި ސްވޯން ބްރޭންޑްގެ ޒައިތޫނިތެޔޮ ފުޅިއެއް ފެނިގެންދެއެވެ. މި މަންޒަރު ދައްކަމުން އަންނައިރު ބިތުގައި އަޅުވާފައި އޮތް ރޭޑިއޯއަކުން “މާލިލީ ބަނަފުސާމާ” ލަވަ އިވިގެންދެއެވެ.
ފިލްމުގެ ލީޑު ތަރިންގެ ތެރޭގައި އައިޝާ އަލީގެ އިތުރުން އަހުމަދު ޝާރިފް، މުހައްމަދު އިޝްފާން އަދި މަރިޔަމް ޝިމާ ހިމެނެއެވެ. އަދި އަހުމަދު ނިމާލް، މަރިޔަމް ހަލީމް، އަލީ ފާރޫގު، އައިޝަތު އާރިފާ އަދި މުހައްމަދު ވަހީދުވެސް މުހިންމު ދައުރުތަކަކުން ފެނިގެންދާނެއެވެ. މީގެ އިތުރުން އެލީޝާ ސަނީމް އަދި ހަދީޖާ އަބޫބަކުރު މުޅިން އަލަށް ދިވެހި ފިލްމަކުން ބެލުންތެރިންނަށް ފެނިގެންދާނެއެވެ.
ފިލްމުގެ މޭކަޕް އާޓިސްޓަކީ ޖަސްޓިންއެވެ. ޑައިރެކްޓަރ އޮފް ފޮޓޯގްރަފީއަކީ ސަމާހު އިބްރާހިމްއެވެ. އެނިމޭޝަންގެ މަސައްކަތް ކޮށްފައިވަނީ ހުސައިން އިހުސާންއެވެ. ފިލްމުގެ ނަން ފަރުމާކުރީ އަބްދުﷲ (އަބޯ) ޝަފީއުއެވެ. ބެކްސްކޯރިންގ އަކީ ފަތުހުﷲ ޝަކީލްގެ މަސައްކަތެކެވެ. ޅެމާއި މެލޮޑީ މުހައްމަދު އަބްދުލް ޣަނީ ހަދާފައިވާއިރު ލަވައިގެ މިއުޒިކް ހަދާފައިވަނީ ހުސައިން ތައުފީގެވެ.
ނޮވެންބަރު 20 ގައި ރިލީޒްކުރާ “ލިލީ” އަކީ މުހައްމަދު އަރީޙް އުފައްދައި އަޒްހާން އިބްރާހިމް ލިޔެ ޑައިރެކްޓްކުރާ ފިލްމެކެވެ.