ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ގާނޫނަށް މިއަދުން ފެށިގެން އަމަލުކުރަން ފަށައިފިއެވެ. މި ގާނޫނަކީ ގޭންގު ކުށްތަކާއި ނުރައްކާތެރި ކުށްތައް ހުއްޓުވުމަށް ޚާއްސަ ބާރުތަކެއް ތަންފީޒީ އިދާރާތަކަށް ދިނުމަށް އެކުލަވާލެވިފައިވާ ގާނޫނެކެވެ.
ރައްޔިތުންގެ މަޖިލީހުން މި އަހަރުގެ މެއި 15 ވަނަ ދުވަހު ފާސްކުރި މި ބިލު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަސްދީގު ކުރެއްވީ މެއި 25 ވަނަ ދުވަހުއެވެ. މި ގާނޫނުގެ މައިގަނޑު މަގުސަދަކީ ގޭންގު ކުށްތައް ހުއްޓުވުމާއި، އެފަދަ ކުށްތަކުގައި އުޅޭ މީހުން މުޖުތަމައަށް އަނބުރާ ގެނައުމަށް މަގުފަހިކުރުމެވެ.
ބޮޑެތި އަދަބުތައް ކަނޑައެޅިފައި
މި ގާނޫނުގެ ދަށުން އިންތިޒާމުވެފައިވާ ކުށެއް ކުރާ ގްރޫޕެއް އުފެއްދުމާއި ހިންގުމަކީ ކުށެކެވެ. މިފަދަ ގްރޫޕެއް އުފައްދައިފިނަމަ ނުވަތަ ހިންގައިފިނަމަ 25 އަހަރުގެ ޖަލު ހުކުމަކާއެކު 200،000 ރުފިޔާއިން ފެށިގެން 10 މިލިއަން ރުފިޔާއާ ހަމައަށް ޖޫރިމަނާ ކުރެވޭނެއެވެ. އަދި މިފަދަ ކުށެއް ކުރަން އުޅުމާއި އެހީތެރިވުމަށްވެސް 18 އަހަރުގެ ޖަލު ހުކުމާއި ބޮޑު ޖޫރިމަނާއެއް ކަނޑައެޅިފައިވެއެވެ.
ނުޙައްޤުން ހޯދާފައިވާ މުދާ ދައުލަތަށް ނެގުން
މި ގާނޫނުގެ ދަށުން ގޭންގު ކުށްތަކާ ގުޅިގެން ނުޙައްޤުން ހޯދާފައިވާ މުއްސަނދިކަން ދައުލަތަށް ނެގުމުގެ މަގު ފަހިވެގެންދާނެއެވެ. ޕްރޮސިކިއުޓަރ ޖެނެރަލް އޮފީހުން ފާހަގަކުރައްވާފައިވާ ގޮތުގައި، މިގޮތަށް ދައުލަތަށް ނެގޭ މުދާ ބެލެހެއްޓުމާއި އެ މުދަލާމެދު ޢަމަލުކުރާނެ ގޮތް ކަނޑައަޅާނީ މި ޤާނޫނުގެ ދަށުން ހަދާ ގަވާއިދުގައިވާ ގޮތުގެ މަތިން މާލިއްޔަތާބެހޭ ވުޒާރާއިންނެވެ.
ޕްރޮސިކިއުޓަރ ޖެނެރަލްގެ ބަސް
މި ގާނޫނާ ގުޅޭގޮތުން ޕްރޮސިކިއުޓަރ ޖެނެރަލް ވިދާޅުވެފައިވަނީ މި ގާނޫނުގެ ސަބަބުން އިންސާފު ގާއިމުކުރުމުގެ ނިޒާމަށް ރައްޔިތުން ކުރާ އިތުބާރު އިތުރުވެގެންދާނެ ކަމަށެވެ. އަދި މީގެ ކުރިން ބޮޑެތި ކުށްތަކަށް ލިބެމުން އައި ލުއިތަކާއި މަޢާފުގެ ފުރުސަތުތައް މި ގާނޫނާއެކު ބަންދުވެގެންދާނެ ކަމަށްވެސް އެމަނިކުފާނު ވަނީ ފާހަގަކުރައްވާފައެވެ.