ހދ. ނެއްލައިދޫގައި 60 ހައުސިން ޔުނިޓް އެޅުމުގެ މަޝްރޫޢު ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އާ ސަރުކާރުން މިއަދު ހަވާލުކޮށްފިއެވެ. މި މަޝްރޫޢު ހަވާލުކުރުމުގެ އެއްބަސްވުމުގައި ސޮއިކުރެވުނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަދި ކެބިނެޓް ވަޒީރުން ހދ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ނެއްލައިދޫއަށް ކުރެއްވި ޒިޔާރަތުގައެވެ.
މި އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވަޒީރު ޑރ. އަބްދުﷲ މުއްތަލިބެވެ. އަދި އެޗްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު، ރިޓަޔަރޑް ބްރިގޭޑިއަރ ޖެނެރަލް އަލީ ޒުހެއިރެވެ.
މި މަޝްރޫޢާ ގުޅޭގޮތުން ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، މިއީ ވަރަށް މުހިންމު މަޝްރޫޢެއް ކަމަށާއި، ގެދޮރުގެ މައްސަލަ ހައްލުކުރުމަށް ފެށިގެންދާނެ މުހިންމު މަސައްކަތެއް ކަމުގައެވެ. އަދި މި މަޝްރޫޢު އެޗްޑީސީގެ ފަރާތުން ވަރަށް ބޮޑަށް އިސްކަންދީގެން ބާރު ސްޕީޑުގައި ކުރިއަށް ގެންދާނެ ކަމަށްވެސް ރައީސް ވަނީ ފާހަގަކުރައްވާފައެވެ.
ބޯހިޔާވަހިކަމުގެ މައްސަލައަކީ މިހާރުގެ ސަރުކާރުން އެންމެ އިސްކަމެއް ދެއްވާ އެއް ކަމެވެ. އެގޮތުން މި ސަރުކާރުގެ ފަސް އަހަރުގެ ދައުރުގެ ތެރޭގައި މާލެ އާއި އަތޮޅުތަކުގައި ބޯހިޔާވަހިކަމަށް ދިމާވެފައިވާ ދަތިތަކަށް ހައްލު ހޯދައިދެއްވާނެ ކަމަށް ރައީސް މުއިއްޒު ވަނީ ވަޢުދުވެވަޑައިގެންފައެވެ.
ނެއްލައިދޫގައި އެޅުމަށް ހަމަޖެހިފައިވާ 60 ހައުސިން ޔުނިޓަކީ އެރަށުގެ ގެދޮރުގެ ދަތިކަން ހައްލުކުރުމަށް އެޅޭ މުހިންމު ފިޔަވަޅެއް ކަމަށް ބެލެވެއެވެ. މި މަޝްރޫޢުގެ މަސައްކަތް ފެށި، ކުރިއަށްދާ މިންވަރާ ގުޅޭ އިތުރު މަޢުލޫމާތު ކުރިއަށް އޮތް ދުވަސްތަކުގައި އެޗްޑީސީން ހާމަކުރާނެ ކަމަށް ބެލެވެއެވެ.