ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ހދ. ނެއްލައިދޫގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުން، އެރަށުގެ ތަރައްޤީއަށް މިއަހަރު ފެށި ހުރިހާ މަޝްރޫޢުތަކަކީވެސް ކުރިއަށްދާނެ އިންތިޒާމުތައް ހަމަޖައްސައިގެން ފެއްޓެވި މަޝްރޫޢުތަކެއްކަމަށާއި، ހުރިހާ މަޝްރޫޢުތައްވެސް މަޑުނުޖެހި ބާރަށް ކުރިއަށްދާނެކަމުގެ ޔަޤީންކަން ދެއްވައިފިއެވެ. އެމަނިކުފާނު ވިދާޅުވީ އެއިން ކޮންމެ މަޝްރޫޢެއް ބާރަށް ކުރިއަށް ގެންގޮސް، ފުރިހަމައަށް ނިންމައި، އެ މަޝްރޫޢުތަކުން ރައްޔިތުންނަށް ކުރިއެރުމާއި ފަސޭހަތައް ލިބޭނެކަމަށެވެ.
ރައީސުލްޖުމްހޫރިއްޔާ ނެއްލައިދޫއަށް ކުރެއްވި މި ދަތުރުފުޅުގައި، އެރަށުގައި ގާތްގަނޑަކަށް ނުވަ މަޝްރޫޢު ހިންގުމަށް ކަނޑައަޅައި، ގިނަ މަޝްރޫޢުތަކުގެ ޢަމަލީ މަސައްކަތް ވަނީ ފައްޓަވާފައެވެ. އަންނަ އަހަރުވެސް ގިނަ މަޝްރޫޢުތަކެއް އެރަށުގައި ހިންގަވާނެކަމަށް ރައީސް ވިދާޅުވިއެވެ.
މިގޮތުން، ނެއްލައިދޫގައި ޒަމާނީ މިސްކިތެއް ބިނާކުރުމަށާއި، ކައުންސިލް އައު ޢިމާރާތެއް އެޅުމަށާއި، ސިއްޙީ މަރުކަޒުގެ އައު އިމާރާތެއްގެ އިތުރުން ފިޓްނަސް އެންޑް ރެކްރިއޭޝަން ސެންޓަރެއް ޤާއިމްކުރުމުގެ މަސައްކަތް ކުންފުނިތަކާ ވަނީ ހަވާލުކުރައްވާފައެވެ. އަދި އޭޓީއެމްގެ ޚިދުމަތްވެސް ވަނީ ފަށްޓަވާދެއްވާފައެވެ. ރައީސް ފާހަގަކުރެއްވި ގޮތުގައި އޭޓީއެމް ނެތުމުން އެތައް ފައިސާއެއް ޚަރަދުކޮށް ރަށްރަށަށް ދަތުކުރަންޖެހޭކަމަށާއި، މިއީ ރައްޔިތުންނަށް ހަމަހަމަކަމާއެކު ބޭންކިންގ ޚިދުމަތް ފޯރުކޮށްދިނުމުގެ ސިޔާސަތުގެ ދަށުން ކުރެވުނު މުހިންމު ކަމެކެވެ.
ރައީސްގެ ދަތުރުފުޅުގެ ތެރެއިން، ނެއްލައިދޫގެ ބަނދަރުގެ ޖެޓީއެއް ތަރައްޤީކުރުމާއި މަގު ހެދުމުގެ މަޝްރޫޢުވެސް ވަނީ އެމްޓީސީސީއާ ހަވާލުކުރައްވާފައެވެ. އަދި 60 ހައުސިންގ ޔުނިޓް އެޅުމުގެ މަޝްރޫޢު އެޗްޑީސީއާ ހަވާލުކޮށްފައިވާއިރު، މިހުރިހާ މަޝްރޫޢުތަކަކީވެސް ރިޔާސީ ވަޢުދުތަކެއްކަން އެމަނިކުފާނު ފާހަގަކުރެއްވިއެވެ.
ސިއްޙީ ދާއިރާއަށް އަލިއަޅުއްވާލައްވަމުން ރައީސް ވިދާޅުވީ، ސިއްޙީ މަރުކަޒަށް ޖާގަ އިތުރުކުރުމުގެ މަޝްރޫޢުން ނެއްލައިދޫގެ ސިއްޙީ ޚިދުމަތުގެ ފެންވަރު މަތިވެ، ވަސީލަތްތައް ޤާއިމްކުރުމުގެ ޖާގަ ލިބޭނެކަމަށެވެ. އަދި އަމާޒަކީ 24 ގަޑިއިރު ޚިދުމަތްދޭ ސިއްޙީ މަރުކަޒަކަށް އެރަށުގެ ސިއްޙީ މަރުކަޒު ހެދުންކަމަށާއި، އެކަމަށް މުވައްޒަފުން އިތުރުކުރުންވެސް ކުރިއަށްދާކަމަށް އެމަނިކުފާނު ވިދާޅުވިއެވެ.
ކުޅިވަރަށް ހާއްސަ ސަމާލުކަމެއް ދެއްވައި ރައީސް ވިދާޅުވީ، ނެއްލައިދޫ ފުޓްބޯޅަ ދަނޑުގައި ރޭގަނޑު ކުޅެވޭގޮތަށް ލައިޓު ހަރުކޮށް ދަނޑު ފުރިހަމަކޮށްދޭނެކަމަށާއި، މަސައްކަތް ވަރަށް އަވަހަށް ފަށައި މިއަހަރު ފުރިހަމަކުރާނެކަމަށެވެ. މީގެ އިތުރުން، އަންނަ އަހަރުގެ ބަޖެޓުގައި ހިމަނައިގެން ފުޓްސަލް އަދި ހޭންޑު ބޯލް ކުޅެވޭނެގޮތަށް ފުރިހަމަ ދަނޑެއްވެސް އެޅުމަށް ޕްލޭންކޮށް ޖެނުއަރީ މަހުގެ ކުރީކޮޅު ޢަމަލީ މަސައްކަތް ފަށްޓަވާނެކަމަށް އެމަނިކުފާނު ވިދާޅުވިއެވެ. ޒުވާނުންނަށް މުހިންމު ފިޓްނަސް އެންޑް ރެކްރިއޭޝަން ސެންޓަރުން އިންޑޯ ކުޅިވަރާއި ގިނަ ފެސިލިޓީތައް ލިބި، ކުރިއެރުން ލިބޭނެކަމަށްވެސް ރައީސް ވިދާޅުވިއެވެ.
ރަށްގިރުމުގެ މައްސަލައަށް އަލިއަޅުއްވާލައްވަމުން ރައީސް ވިދާޅުވީ، އަންނަ އަހަރުގެ ބަޖެޓުގައި ހިމަނައިގެން ރަށްގިރުމުގެ މައްސަލަ ހައްލުކުރުމުގެ ދެވަނަ މަޝްރޫޢު ހިންގައިދެއްވާނެކަމަށެވެ. މިހާރު 95 އިންސައްތަ ނިމިފައިވާ ފެނާ ނަރުދަމާގެ މަޝްރޫޢުވެސް ވަރަށް އަވަހަށް ފުރިހަމަކޮށްދޭނެކަމުގެ ޔަޤީންކަން އެމަނިކުފާނު ދެއްވިއެވެ.
ނެއްލައިދޫ ސްކޫލަކީ އޯލެވެލް އަދި އޭލެވެލްގައިވެސް ރަނގަޅު ނަތީޖާ ނެރޭ ސްކޫލެއްކަން ފާހަގަކުރައްވާ ރައީސް ވަނީ، މަލްޓިޕާޕަސް ހޯލާއި، ކްލާސްރޫމާއި، ލެބްތައް ހިމެނޭހެން ވަސީލަތްތައް ޤާއިމްކުރުމުގެ މަޝްރޫޢު ވަރަށް އަވަހަށް ފަށްޓަވާނެކަމަށް ވިދާޅުވެފައެވެ.
އިޤްތިޞާދީ ކުރިއެރުމަށްޓަކައި، އެ ރަށް ކައިރީ އޮތް ހިރިނައިދޫ އިޤްތިޞާދީ މަޝްރޫޢުތަކަށް ހަމަޖައްސާފައިވާކަން ފާހަގަކުރައްވައި ރައީސް ވަނީ، ނެއްލައިދޫއިން އެރަށުގައި އިޤްތިޞާދީ މަޝްރޫޢެއް ފެށުމަށް އެދިވަޑައިގެންފައެވެ. އެކަމަށް ސަރުކާރުން އެއްބާރުލުން ދެއްވާނެކަމުގެ ޔަޤީންކަން ރައީސް ދެއްވިއެވެ.
މިއަހަރު އެކަނިވެސް ނެއްލައިދޫގައި ހިންގާ 9 މަޝްރޫޢުއަށް ވަރަށް ޚާއްޞަ ސަމާލުކަމެއް ދެއްވައިގެން ކުރިއަށް ގެންދަވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނެއްލައިދޫ ރައްޔިތުންނަށް ދެއްވާފައެވެ.