ހުޅުމާލެއިން މަރުވެފައި އޮއްވާ ފެނުނު މީހާ އަކީ މިދިޔަ އަހަރުގެ އޮގަސްޓު މަހުން ފެށިގެން ގެއްލިގެން ހޯދަމުންދިޔަ ބިދޭސީއެއް ކަމަށް ބެލެވޭ ބައެއް ކަންކަން ފާހަގަކުރެވިފައިވާ ކަމަށް މޯލްޑިވްސް ޕޮލިސް ސަރވިސްއިން މިއަދު ބުނެފިއެވެ.
ހުޅުމާލޭގައި ވޯޓާ ތީމް ޕާކެއް ހަދަން ދޫކޮށްފައި އޮންނަ ސަރަހައްދުން އިއްޔެ ފެނުނު މަރުވެފައި އޮތް މީހާއަކީ ފިރިހެނެއްގެ ހަށިގަނޑު ކަމަށް ފުލުހުން ވަނީ ކަށަވަރުކޮށްދީފައެވެ. އަދި މި ހަށިގަނޑަކީ 2023 ވަނަ އަހަރުގެ އޮގަސްޓު 21 ވަނަ ދުވަހުން ފެށިގެން ގެއްލިގެން ހޯދަމުންދިޔަ ބިދޭސީއެއްގެ ހަށިގަނޑު ކަމަށް ބެލެވޭ ކަމަށް ފުލުހުން ވަނީ ހާމަކޮށްފައެވެ.
ފުލުހުން މައުލޫމާތު ދިން ގޮތުގައި، ފެނުނު ހަށިގަނޑު ވަނީ ވަރަށް ބޮޑަށް ހަލާކުވެ، ޑިކޮމްޕޯޒްވެފައެވެ. އަދި މި ވަގުތު އެ މީހާގެ ކާކުކަން ކަށަވަރުކުރުމަށްޓަކައި ކުރަންޖެހޭ އެންމެހާ މަސައްކަތްތައް ކުރިއަށްދާ ކަމަށް ފުލުހުން ވަނީ ފާހަގަކޮށްފައެވެ.
މި މައްސަލައިގެ ތަހުގީގު މިހާރުވެސް ދަނީ ކުރިއަށެވެ. އަދި މި މައްސަލައާ ގުޅޭ އިތުރު މައުލޫމާތު ލިބުމުން އާންމުންނާ ހިއްސާކުރާނެ ކަމަށް ފުލުހުން ވަނީ ބުނެފައެވެ.