ދިވެހި މަސްވެރިއެއްގެ ކޭޝް ކާޑާ ގުޅިފައިވާ އެކައުންޓަށް އޮޅިގެން ދޫކުރެވުނު ފައިސާގެ މައްސަލައިގައި، ހައިކޯޓުންވެސް ބޭންކް އޮފް މޯލްޑިވްސް (ބީއެމްއެލް)އަށް ނާކާމިޔާބުވެއްޖެއެވެ.
ބީއެމްއެލްއިން ހުވަދު އަތޮޅުގެ މަސްވެރިއަކަށް ދޫކޮށްފައިވާ "މަސްވެރިޔާ ކާޑަށް" އެ ބޭންކުގެ ޓެކްނިކަލް މައްސަލައަކާ ގުޅިގެން އިތުރަށް ޖަމާކުރެވުނު 345،200 ރުފިޔާ ލޯނެއްގެ ގޮތުގައި އަނބުރާ ދެއްކުމަށް މަސްވެރިޔާއާއެކު އެއްބަސްވުމަކަށް ގޮސްފައިވާ ކަމަށް ބޭންކުން ބުނެފައިވެއެވެ. ނަމަވެސް މަސްވެރިޔާ އެ ފައިސާ އެއްބަސްވުމާ އެއްގޮތަށް ނުދައްކާ ކަމަށް ބުނެ، ފައިސާ ހޯދުމަށް ބޭންކުން ސިވިލް ކޯޓަށް މައްސަލަ ހުށަހެޅިއެވެ.
މި މައްސަލައިގައި މިދިޔަ އަހަރުގެ އޮކްޓޫބަރު މަހު ސިވިލް ކޯޓުން ނިންމީ، އޮޅިގެން ދޫކުރެވުނު ފައިސާއަކީ ލޯނެއްގެ ގޮތުގައި ދޫކޮށްފައިވާ ފައިސާ ކަމަށް ސާބިތުނުވާ ކަމަށެވެ. މި ނިންމުމާ ގުޅިގެން ބޭންކުން މައްސަލަ ހައިކޯޓުގައި އިސްތިއުނާފު ކުރިއެވެ.
ހައިކޯޓުގެ ޝަރީއަތުގައި މަސްވެރިޔާ ބުނެފައިވަނީ އެފަދަ ލޯނަކަށް އެދިފައި ނުވާނެ ކަމަށާއި، މަސްވެރިޔާ ކާޑުން ނަގަމުން ދިޔަ ފައިސާއަކީ ކާޑުގައި ހުރިކަމަށް ދެއްކި ފައިސާ ކަމަށެވެ. އަދި ކާޑުގައި ނެތް ފައިސާއެއް ނުނަގާ ކަމަށްވެސް އޭނާ ވަނީ ކޯޓުގައި ބުނެފައެވެ.
މައްސަލަ ބެލި ފަނޑިޔާރުންގެ އިއްތިފާގުން ނިންމާފައިވަނީ، މަސްވެރިޔާގެ ފަރާތުން ލޯނަކަށް ނުވަތަ ކްރެޑިޓް ފެސިލިޓީއަކަށް އެދިފައިވާކަން ހެކިތަކުން އެނގެން ނެތުމާއެކު، ދަށު ކޯޓުގެ ހުކުމަށް ބަދަލެއް ގެންނާނެ ތަނެއް ނެތް ކަމަށެވެ. މި މައްސަލަ ބެއްލެވީ ފަނޑިޔާރު މުޙައްމަދު ޝަނީޒް ޢަބްދުﷲ އާއި ފަނޑިޔާރު ޙުސައިން މަޒީދާއި ފަނޑިޔާރު ޢަބްދުލްމާނިޢު ޙުސައިނެވެ.