ހދ. މަކުނުދޫގެ ބިން ހިއްކުމާއި ގޮނޑުދޮށް ހިމާޔަތް ކުރުމުގެ އިތުރުން އެއަރޕޯޓެއް ތަރައްގީ ކުރުމުގެ ބޮޑު މަޝްރޫޢު، ދިވެހިރާއްޖޭގެ އެންމެ ބޮޑު ދައުލަތުގެ ކުންފުނިތަކުގެ ތެރޭގައި ހިމެނޭ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި ރަސްމީކޮށް ހަވާލުކޮށްފިއެވެ. މި މަޝްރޫޢު އެމްޓީސީސީއާއި ހަވާލުކުރުމުގެ އެއްބަސްވުމުގައި ސޮއިކުރެވުނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހދ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މަކުނުދޫއަށް ވަޑައިގެން ބޭއްވި ޚާއްސަ ޖަލްސާއެއްގައެވެ.
މި އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ އިމާރާތް ކުރުމާއި ބެހޭ ވުޒާރާގެ ސްޓޭޓް މިނިސްޓަރު ހަސަން ރަޝީދެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަހުމަދު ސައުދީއެވެ. މިކަން ހިނގާފައިވަނީ މަކުނުދޫ ރައްޔިތުންގެ މެދުގައި ބޮޑު އުފާވެރިކަމެއް ފާޅުވި ޖަލްސާއެއްގެ ތެރެއިންނެވެ.
މަކުނުދޫ ރައްޔިތުންނާ ބައްދަލުކުރެއްވުމަށް ބޭއްވި މި ޖަލްސާގައި ވާހަކަފުޅު ދައްކަވަމުން މަކުނުދޫ ދާއިރާގެ މެންބަރު އާދަމް ޝަފީގް ވިދާޅުވީ މަކުނުދޫގެ ތަރައްގީއަށް އޮތް އެންމެ ބޮޑު ގޮންޖެހުމަކީ އެ ރަށް އެކަހެރިކޮށް އޮތުން ކަމަށެވެ. އަދި ރަށުގައި ދަތުރުފަތުރުގެ ރަނގަޅު ނިޒާމެއް ނެތްކަން މެންބަރު ފާހަގަކުރެއްވިއެވެ. މި ސަރުކާރުން މަކުނުދޫ ރައްޔިތުންގެ ވަރަށް ގިނަ ދުވަސްވީ ހުވަފެނެއް ކަމަށްވާ އެއަރޕޯޓް މަސައްކަތް ކުރުމަށް ހަވާލުކުރުމަކީ އެ ހުވަފެން ހަގީގަތަކަށް ވެގެންދިއުން ކަމަށްވެސް ޝަފީގް ވިދާޅުވިއެވެ.
މި އެއްބަސްވުމުގެ ދަށުން މަކުނުދޫގައި 1800 މީޓަރުގެ ދިގު ރަންވޭއެއް ތަރައްގީ ކުރުމަށް ބިން ހިއްކާނެއެވެ. މީގެ އިތުރުން ރަށުގެ ބޭނުމަށް 22 ހެކްޓަރުގެ ބިން ހިއްކުމުގެ މަސައްކަތްވެސް ހިމެނެއެވެ. މި މަޝްރޫޢު ނިންމާލާނީ އެއަރޕޯޓުގެ އިންފްރާސްޓްރަކްޗާގެ މަސައްކަތާއިއެކުގައެވެ. މަޝްރޫޢުގެ މަސައްކަތް ނިމުމުން އެއަރޕޯޓް ހިންގުމަށް ހަވާލުކުރަން ނިންމާފައިވަނީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއިއެވެ. މި މަޝްރޫޢުގެ ސަބަބުން މަކުނުދޫ ރައްޔިތުންގެ ދިރިއުޅުމަށް ބޮޑެތި ކުރިއެރުންތަކެއް ލިބި، އިޤްތިޞާދީ ގޮތުން ރަށަށް އާ އުފާވެރިކަމެއް ގެނެސްދޭނެކަމަށް ލަފާކުރެވެއެވެ.