މާލޭގެ ބޮޑުތަކުރުފާނުގެ މަގުގެ އުތުރު ފަރާތް ޒަމާނީ ފެންވަރަށް ތަރައްޤީ ކުރުމުގެ މަސައްކަތް ހަލުވި ސްޕީޑްގައި ކުރިއަށްދާ ކަމަށް އެމްޓީސީސީން މިއަދު ބުނެފި އެވެ.
މާލޭގެ ބޭރު މަގު، ތާރު އަޅައިގެން ހަތަރު ލޭނަށް ތަރައްގީ ކުރުމުގެ މަަސައްކަތް ރަސްމީކޮށް ފެށީ މި މަހުގެ 21 ވަނަ ދުވަހު އެވެ. އެ ކުންފުނިން މިހާރު 24 މީޓަރުގެ ޝީޓް ޕައިލިންގ މަސައްކަތް ނިންމާފައިވާ ކަމަށެވެ. އަދި ބަނދަރު ތޮށިގަނޑު ތަޅާލުމުގެ މަސައްކަތް މިއަދު ފަށާފައިވާ ކަމަށެވެ.
ބޮޑުތަކުރުފާނުމަގު އުތުރު ފަރާތް ހަތަރު ލޭނަކަށް ތަރައްގީ ކުރުމުގެ މަޝްރޫއުގެ ދަށުން ސެގްމެންޓު 1 ގައި ހިމެނޭ ސަރަހައްދުގެ ފަޅުގެ ސަރަހައްދުގެ 24 މީޓަރު ޝީޓް ޕައިލްކުރުމުގެ މަސައްކަތްކޮށް، އެ ސަރަހައްދުގެ އެއްގަމު ތޮށި ބޭރަށް ޖެއްސުމަށްޓަކައި ކޮންކްރީޓް ޖެޓީ ތަޅާލުމުގެ މަސައްކަތް އެމްޓީސީސީން ފަށައިފިއެވެ.
144 މިލިއަން ރުފިޔާއަށްވުރެ ބޮޑު މި މަޝްރޫއުގެ އަމަލީ މަސައްކަތް ފެށިފައިވަނީ މީގެ ތިން ދުވަސް ކުރިންނެވެ. މި މަޝްރޫއުގެ ފުރަތަމަ މަރުހަލާގެ ގޮތުގައި ކުރިއަށްގެންދަނީ ޝީޓްޕައިލް ކުރުމުގެ މަސައްކަތެވެ.
އެމްޓީސީސީން މައުލޫމާތު ދެއްވި ގޮތުގައި މި މަޝްރޫއުގެ ދަށުން ބޮޑުތަކުރުފާނުމަގު އުތުރު ފަރާތުން ފުޅާކޮށް 4 ލޭންއަށް މަގު ހެދުމާއި 830 މީޓަރުގެ މަގުގައި ތާރު އެޅުމުގެ މަސައްކަތް ކުރިއަށް ގެންދާނެއެވެ. މީގެ އިތުރުން ދުވާރުތައް ހެދުމާއި ފެން ހިންދާ ނިޒާމް ގާއިމުކުރުމުގެ މަސައްކަތްވެސް ހިމެނެއެވެ.
މި މަޝްރޫއުގެ މަސައްކަތްތައް ކުރިއަށް ގެންދާނީ ތިން ސެގްމަންޓަކަށް ބަހާލައިގެންނެވެ. މި ގޮތުން 737 މީޓަރުގެ ސަރަހައްދެއްގައި ޝީޓް ޕައިލް މަސައްކަތް ކުރުމަށް ވަނީ ހަމަޖެހިފައެވެ. އަދި މި މަޝްރޫއުގެ ތެރެއިން ހިނގާ މީހުންނަށް ވަކި ލޭނެއް ގާއިމުކުރުމާއި، ރޯޑް މާކިން އަދި ސައިން ބޯޑު ހަރުކުރުމުގެ މަސައްކަތްވެސް ހިމެނެއެވެ.
އެމްޓީސީސީން ފާހަގަކުރެއްވި ގޮތުގައި މި ޓްރާންސްފޯމޭޓިވް ޕްރޮޖެކްޓްގެ ސަބަބުން މާލޭގެ އެކްސެސިބިލިޓީ ރަނގަޅުވެ، ޓްރެފިކް ތޮއްޖެހުމަށް ލުޔެއް ލިބިގެންދާނެއެވެ. އަދި ސްޓޯމްވޯޓާ ޑްރޭނޭޖްގެ އާ ނިޒާމެއްގެ ސަބަބުން ބޯކޮށް ވާރޭވެހި ފެންބޮޑުވުން ކުޑަވެ، މަގުތައް ބޭނުންކުރާ ހުރިހާ ފަރާތްތަކަށް ރައްކާތެރި، ހަރުދަނާ އިންފްރާސްޓްރަކްޗާއެއް ގާއިމުވެގެންދާނެއެވެ.