މާތްﷲ ދެއްވި އެންމެ ބޮޑު ނިއުމަތުގެ ފޮނި މޭވާއަކީ ޒަވާޖީ ހަޔާތުގެ ގުޅުމުން ވުޖޫދުވާ އާއިލާ ކަމަށާއި، އާއިލާއަކީ ދުންޔަވީ ހަޔާތުގެ މުޑުވަކެއް ކަމަށް މިއަދުގެ ޚުތުބާގައި ބުނެފިއެވެ.
މިއަދުގެ ހުކުރު ޚުތުބާގެ މައުޟޫއުއަކީ “ރަނގަޅު ޢާއިލާއެއް ބިނާކުރުން” މިއެވެ.
މި މައުޟޫއަށް ރާއްޖޭގެ އެކި ކަންކޮޅުތަކުގައި އިއްވި ޚުތުބާގައި ވިދާޅުވީ، މާތްﷲ އަހަރެމެންނަށް ދެއްވާފައިވާ ނިއުމަތްތައް ގިނަގުނަ ކަމަށާއި، އެ ނިއުމަތްތަކުގެ އަގު ވަޒަން ނުކުރެވުނު ކަމުގައިވިޔަސް އެ ނިއުމަތްތައް ދަނީ އިތުރުވަމުން ކަމަށެވެ.
މާތް ﷲ އަޅުގަނޑުމެންނަށް ދެއްވައިފައިވާ ނިޢުމަތްތައް ގިނަގުނަ ކަމަށާއި، އެ ނިޢުމަތްތަކުގެ ތެރެއިން އެންމެ މުހިންމު އެއް ނިޢުމަތަކީ ކައިވެނީގެ ނިޢުމަތް ކަމަށް ޚުތުބާގައި ވަނީ ބުނެފައެވެ. އަދި ކައިވެންޏަކީ މާތް ﷲގެ ޙިކުމަތްވަންތަކަން ދަލީލުކޮށްދޭ ހެކިތަކުގެ ތެރެއިން ހެތްކެއް ކަމަށެވެ.
ޚުތުބާގައި ބުނީ ރަނގަޅު އާއިލާއެއް ބިނާކުރެވޭނީ އިސްލާމީ އަގީދާގެ މަތީގައި މުޅި ދިރިއުޅުން އާރާސްތުކުރެވިގެން ކަމަށާއި، އާއިލީ ބިނާގެ އެންމެ މުހިންމު ދެ ތަނބުކަމުގައިވާ މައިންބަފައިންނަކީ ތައުހީދާއި، ތިމާއަށް ކޮންމެހެން ބޭނުންވާ ދީނީ އިލްމު އުނގެނި އެއަށް، އަމަލުކުރާ، ރިވެތި އަހުލާގުގެ ވެރި ބަޔަކަށް ވެގެން ކަމަށެވެ.
“ރަނގަޅު އާއިލާއެއް ބިނާކުރެވޭނީ އިސްލާމީ އަގީދާގެ މަތީގައި މުޅި ދިރިއުޅުން އާރާސްތުކުރެވިގެން، އާއިލީ ބިނާގެ އެންމެ މުހިންމު ދެ ތަނބުކަމުގައިވާ މައިންބަފައިންނަކީ ތައުހީދާއި، ތިމާއަށް ކޮންމެހެން ބޭނުންވާ ދީނީ އިލްމު އުނގެނި އެއަށް، އަމަލުކުރާ، ރިވެތި އަހްލާގުގެ ވެރި ބަޔަކަށް ވެގެން، ދެމަފިރީންގެ ކިބައިން ދަރިންނަށް ރިވެތި މިސާލުތަކެއް ދައްކައިގެން” ޚުތުބާގައި ވަނީ ބުނެފައެވެ.
ހަރުދަނާ އާއިލާއެއް ބިނާކުރެވޭނީ، ދީނާ ދުރު ފިކުރުތަކާއި އަމަލުތައް ގޭތެރޭގެ މާހައުލުން ނައްތައިލެވިގެން ކަމަށް ވެސް ވަނީ މިއަދުގެ ޚުރުބާގައި ބުނެފައެވެ.