ށ. އަތޮޅުން އަތޮޅު ފެންވަރުގައި ޤައުމީ ދުވަހުގެ ރަސްމީ ޖަލްސާ ބިލެއްފަހީ ސްކޫލުގައި ބާއްވައިފިއެވެ. މި ޖަލްސާ ޝަރަފުވެރިކޮށްދެއްވީ ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފު އުމަރެވެ. އަދި މި ޖަލްސާގައި ދަނޑުވެރިކަމާއި ދިރޭތަކެއްޗާބެހޭ ވަޒީރު ޑރ. މަރިޔަމް މާރިޔާވެސް ވަނީ ބައިވެރިވެވަޑައިގެންފައެވެ.
ޖަލްސާގައި ވާހަކަދައްކަވަމުން ށ. އަތޮޅު ކައުންސިލްގެ ރައީސް މުޙައްމަދު ޝިޔާމް ވިދާޅުވެފައިވަނީ، ޤައުމީ ދުވަސް ފަދަ މުހިންމު ދުވަސްތައް އަތޮޅު ފެންވަރުގައި ފާހަގަކުރުމުގެ މައިގަނޑު މަޤްޞަދަކީ އަތޮޅުގެ ރައްޔިތުންގެ އެއްބައިވަންތަކަމާއި އެކުވެރިކަމާއި ގުޅުން ބަދަހިކުރުން ކަމަށެވެ. "ށ. އަތޮޅުގެ ރައްޔިތުންގެ ހިތުގައި ޤައުމީ ދުވަހަށް އޮތް ލޯބި ފެނިގެން ހިނގައްޖެ. ކޮންމެ ކައުންސިލަކީވެސް ގޮވާލާ ކޮންމެ ގޮވާލުމަކަށް އިޖާބަދީ ވަރަށް އެކުވެރިކަމާއެކު މަސައްކަތްކުރާ ބައެއް" ކަމަށް ޝިޔާމް ވިދާޅުވިއެވެ.
އަންހެނުންގެ ކޮމިޓީތަކަށް މާރެސް އެވޯޑު؛
މި ޖަލްސާގައި ށ. އަތޮޅު އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މަސައްކަތްތަކަށް ހިތްވަރު ދިނުމުގެ ގޮތުން ދެމުންގެންދާ މާރެސް އެވޯޑު ހަވާލުކޮށްފައިވެއެވެ. މިގޮތުން އެންމެ ރަނގަޅަށް މަސައްކަތްކުރި ތިން ކޮމިޓީއަށް އެވޯޑު ދީފައިވާއިރު، އެންމެ މޮޅު ކޮމިޓީގެ ގޮތުގައި ހޮވިފައިވަނީ ށ. ފުނަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީއެވެ. ދެވަނައަށް ބިލެތްފަހީ އަދި ތިންވަނައަށް ށ. ގޮއިދޫ އަންހެނުންގެ ކޮމިޓީ ހޮވިފައިވެއެވެ.
ދެ ދުވަހުގެ މުއްދަތަށް ބިލެތްފަހީގައި ކުރިއަށްގެންދިޔަ ޤައުމީ ދުވަހުގެ ހަރަކާތްތަކުގައި ށ. އަތޮޅުގެ އެކި ރަށްރަށުގެ ކައުންސިލްތަކުން ބައިވެރިވެފައިވެއެވެ. އަދި މި ދަތުރުފުޅުގައި ވަޒީރު އާދަމް ޝަރީފު އުމަރު ވަނީ ށ. އަތޮޅު ކައުންސިލާ ބައްދަލުކުރައްވައި، އަތޮޅުގެ ރައްޔިތުންނާ ގުޅުންހުރި މުހިންމު ކަންކަމާ ގުޅޭގޮތުން މަޝްވަރާކުރައްވާފައެވެ.