ށ. ގޮއިދޫން މޯލްޑިވްސް ގުޑް އެގްރިކަލްޗަރަލް ޕްރެކްޓިސަސް (އެމްގެޕް) ސެޓްފިކެޓް ހާސިލްކުރުމާ ގުޅިގެން، އެރަށުގެ ރައްޔިތުންނަށް ދަނޑުވެރިކަމާއި ދިރޭތަކެއްޗާ ބެހޭ ވުޒާރާގެ ވަޒީރު ޑރ. މަރިޔަމް މާރިޔާ މަރުހަބާ ދަންނަވައި ތައުރީފްކުރައްވައިފިއެވެ.
ގޮއިދޫގެ 10 ދަނޑުވެރިންނަށް މި ސެޓްފިކެޓް ހަވާލުކުރުމުގެ ހާއްސަ ރަސްމިއްޔާތު ބޭއްވުނީ މިދިޔަ ބުރާސްފަތި ދުވަހުއެވެ. އެމްގެޕް ސެޓްފިކެޓަކީ ޤައުމީ ފެންވަރުގައި ކާބޯތަކެތީގެ ރައްކާތެރިކަން ހަރުދަނާކުރުމަށާއި، ދެމެހެއްޓެނިވި ދަނޑުވެރިކަމުގެ އުސޫލުތައް ކުރިއެރުވުމަށް ތަޢާރަފްކޮށްފައިވާ ސްކީމެކެވެ.
"މިއަދު، ގޮއިދޫ މިވެގެންދަނީ ޒަމާނީ އީޖާދުތަކާއި ދިރިއުޅުމުގެ އާދަކާދައާ ދެމެދު ހަރުދަނާ ބެލެންސެއް ޤާއިމުކުރުމުގެ ނަމޫނާ މިސާލަކަށް. މި ރަށުގެ ހުނަރުވެރި ދަނޑުވެރިން ވަނީ ކާބޯތަކެތީގެ ރައްކާތެރިކަމާއި ދެމެހެއްޓެނިވި ތިމާވެށި ޙިމާޔަތްކުރުމުގެ މިންގަނޑުތަކަށް ފެތޭގޮތަށް މަސައްކަތްކުރުމުގައި ހިތްވަރު ދައްކުވާފަ،" ވަޒީރު ޑރ. މާރިޔާ
މި ސްކީމްގެ ދަށުން ދަނޑުވެރިކަން ކުރުމުގައި ވަށައިގެންވާ މާޙައުލާއި، އަމިއްލަ ސިއްޙަތު އަދި އުފައްދާ ތަކެތީގެ ފެންވަރު ރަނގަޅުވާނެކަން ކަށަވަރުކޮށްދެއެވެ. އެމްގެޕް ލިބިފައިވާ ދަނޑުވެރިން ދަނޑު ހެއްދުމުގައި ގަސްކާނާއާއި ކެމިކަލް ބޭނުންކުރާނީ ވަކި މިންގަނޑުތަކަކަށް، އަދި ފެން ބޭނުންކުރުމުގައި އިސްރާފުވުން މަދުވާގޮތަށެވެ.
ވަޒީރު ޑރ. މާރިޔާ ވިދާޅުވި ގޮތުގައި މި ސެޓިފިކޭޝަނަކީ ގޮއިދޫގެ ތާރީޚުގައި އައު ޞަފްޙާއެއް ފެށުމުގެ މުހިންމު ފާލެކެވެ. އަދި މިއީ ދަނޑުވެރިކަމުގެ ދާއިރާ ކުރިއަރުވައި، ޒުވާނުން ފަޚުރުވެރިކަމާއެކު މި ދާއިރާއަށް ނުކުތުމަށް ހިތްވަރު ލިބޭނެ، އަދި މުޅި ޤައުމަށް ދެމެހެއްޓެނިވި ތަރައްޤީގެ ނަމޫނާއެއްގެ ގޮތުގައި ގޮއިދޫ ފާހަގަކުރެވޭނެ އައު ދައުރެއްގެ ފެށުންކަމުގައި އެކަމަނާ ފާހަގަކުރެއްވިއެވެ.