ޝަރުޢީ ދާއިރާގެ މުވައްޒިފުންނަށް މޫނު ބުރުގާ އެޅޭ ގޮތަށް ޤަވާޢިދު އިސްލާޙް ކުރުމަށްފަހު، ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ވަނީ އާންމުކޮށްފައެވެ.
ޑީޖޭއޭގެ ޗީފް ޖުޑީޝަލް އެޑްމިނިސްޓްރޭޓަރ އަމްޖަދު މުސްތަފާ ސޮއިކުރައްވައި ނެރުއްވާފައިވާ ސާކިއުލާގައި ބަޔާންކޮށްފައިވާ ގޮތުގައި، މި އިސްލާޙަކީ ޝަރުޢީ ދާއިރާގެ މުވައްޒިފުންގެ ޤަވާއިދުގެ 129 ވަނަ މާއްދާއަށް ގެނެވުނު އިސްލާޙެކެވެ.
މި މާއްދާއަކީ ހެދުން އެޅުމުގައި މީހުން ފާހަގަވެ އެނގޭނެ ގޮތަށް ހެދުން އެޅުން ބަޔާންކުރާ މާއްދާއެވެ. މި މާއްދާގެ (ހ) ގައި ބަޔާންކޮށްފައިވަނީ ޝަރުޢީ ދާއިރާގެ ޚިދުމަތްތަކަކީ ޒިންމާދާރުކަމާއެކު ދޭންޖެހޭ އަދި ޖަވާބުދާރީވާންޖެހޭ ޚިދުމަތްތަކަކަށްވާތީ، މުވައްޒަފުން މަސައްކަތު ގަޑީގައި ހެދުން އަޅަންވާނީ ކާކުކަން ރަނގަޅަށް އެނގޭނެ ގޮތަށް ކަމަށެވެ.
އަލަށް އިތުރުކުރެވުނު (ށ) ގައި ބަޔާންކޮށްފައިވާ ގޮތުން، (ހ) ގައި އެހެން އޮތް ނަމަވެސް، ޝަރުޢީ ދާއިރާގައި މަސައްކަތްކުރާ އަންހެން މުވައްޒަފުންނަށް މޫނު ބުރުގާ (ލޯ ނުފޮރުވޭ ގޮތަށް) އެޅުމަކަށް ހުރަހެއް ނާޅައެވެ. ނަމަވެސް، މަސައްކަތުގެ މާޙައުލުގައި މުވައްޒަފަކީ ކާކުކަން ކަށަވަރުކުރަން ބޭނުންވެއްޖެ ހިނދެއްގައި، އެ މުވައްޒަފެއްގެ މޫނު ކޯޓުގެ ނުވަތަ އިދާރާގެ ކަމާބެހޭ އަންހެން މުވައްޒަފަކަށް ދައްކަންވާނެއެވެ.
މި އިސްލާޙާއެކު، ޝަރުޢީ ދާއިރާގެ އަންހެން މުވައްޒަފުންނަށް އިތުރު ލުޔެއް ލިބި، އިސްލާމީ ޝިޢާރު ފާޅުކުރުމުގެ މިނިވަންކަން އިތުރަށް ފުޅާވެގެން ދާނެކަމަށް ބެލެވެއެވެ.