ނ. ވެލިދޫ ބަނދަރު އަޕްގްރޭޑް ކުރުމުގެ މަސައްކަތުގެ ދަށުން މިހާރު ކުރިއަށްދަނީ ކުއޭ ވޯލް އެޅުމަށް ބޭނުންވާ ކޮންކްރީޓް ބްލޮކްތައް ހަރުކުރުމުގެ މަސައްކަތް ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކުރައްވައިފިއެވެ.
އެމްޓީސީސީން މި މަޢުލޫމާތު ހާމަކުރައްވާފައިވަނީ މަސައްކަތުގެ އެންމެ ފަހުގެ މަޢުލޫމާތު ހިއްސާކުރައްވަމުން "އެކްސް" ގައި ކުރެއްވި ޕޯސްޓެއްގައެވެ. މި މަޝްރޫޢު ވަނީ 2022 ވަނަ އަހަރު 50 މިލިއަން ރުފިޔާއަށް އެމްޓީސީސީއާ ހަވާލުކޮށްފައެވެ. އަދި މަސައްކަތް ފަށާފައިވަނީ 2023 ވަނަ އަހަރުގެ ފެބްރުއަރީ މަހުގެ 12 ވަނަ ދުވަހުއެވެ.
މިނިސްޓަރ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗަރ ޑރ. އަބްދުﷲ މުއްތަލިބް ވިދާޅުވެފައިވާ ގޮތުގައި މި މަޝްރޫޢު ނިމޭނެކަމަށް ލަފާކުރެވެނީ 2026 ވަނަ އަހަރުގެ ސެޕްޓެމްބަރު މަހުގައެވެ. މިނިސްޓަރު މިހެން ވިދާޅުވެފައިވަނީ ރައްޔިތުންގެ މަޖިލީހުގެ ޖަލްސާއެއްގައި ވެލިދޫ ދާއިރާގެ މެންބަރު މުހައްމަދު އައްބާސް ކުރެއްވި ސުވާލަކަށް ޖަވާބު ދެއްވަމުންނެވެ.
މަޝްރޫޢުގެ މަސައްކަތަށް ދިމާވެފައިވާ ގޮންޖެހުންތަކުގެ ތެރޭގައި ބޭނުންވާ ބޮޑު ހިލަ ލިބުމުގައި ދަތިތަކެއް ހުރިކަން ފާހަގަކުރެވެއެވެ. އަދި ބަނދަރު ޑިޒައިން ކުރުމުގައި ބަނދަރު ބޭނުންކުރާ ފަރާތްތަކާ މަޝްވަރާކޮށްފައި ނުވާކަން މިހާރުގެ ކައުންސިލުން ފާހަގަކުރައްވާފައިވާ ކަމަށް މިނިސްޓަރު ވިދާޅުވެފައިވެއެވެ.
މި މަޝްރޫޢުގެ ދަށުން ކުރެވޭ މަސައްކަތްތަކުގެ ތެރޭގައި
- ބަނދަރު ފުންކުރުމާއި،
- 12 މީޓަރުގެ ބްރޭކްވޯޓަރެއް ޖެހުމާއި،
- 167 މީޓަރުގެ އެއްގަމު ތޮށި ޖެހުމާއި،
- 155 މީޓަރުގެ ސްކޯރިންގ އެޕްރޮން ޖެހުން ހިމެނެއެވެ. މީގެ އިތުރުން
- 10 މޫރިންގ ބޮއި ހަރުކުރުމާއި،
- 121 އަކަ މީޓަރުގެ ރޭމްޕެއް ހެދުމާއި،
- 120 މީޓަރުގެ ކޮންކްރީޓް ޖެޓީއެއް އެޅުމާއި،
- 02 ނެވިގޭޝަން ލައިޓް ހަރުކުރުން،
- 22 މަގުބައްތި ހަރުކުރުމުގެ އިތުރުން
- 2,433 އަކަ މީޓަރުގެ ޕޭވްމަންޓް ހެދުން ހިމެނެއެވެ.