އަންހެނުންގެ ދުޅަހެޔޮކަމާ ގުޅުންހުރި ކަންކަމުގައި ދިރާސާ ކުރުމާއި، ލަސްނުކޮށް ފަރުވާދިނުމަށް އިސްކަންދެއްވުމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު، ސިއްޙީ ދާއިރާގެ ފަންނީ ބޭފުޅުންނަށް އިލްތިމާސްކުރައްވައިފިއެވެ.
ސޮސައިޓީ އޮފް އޮބްސްޓެޓްރީޝަންސް އެންޑް ގައިނަކޮލޮޖިސްޓްސް އޮފް މޯލްޑިވްސްގެ ފަރާތުން ބޭއްވި “އެމްބްރޭސިންގ ވެލްނަސް” މަސައްކަތު ބައްދަލުވުމުގެ ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން، ފަރުވާދިނުމުގައި ހުރި ފުރުސަތުތަކާއި، ބަލި ދެނެގަތުމުގެ އުކުޅުތަކާއި، އެންމެ ފަހުގެ ދިރާސާތަކާމެދު ހޭލުންތެރިވުމަކީ ފަންނީ ބޭފުޅުންގެ މައްޗަށް އޮތް އިޚްތިޔާރެއް ނޫން ކަމަށާއި، އެއީ ކުރަންޖެހޭ ކަމެއްކަމުގައި މެޑަމް ސާޖިދާ ވިދާޅުވިއެވެ.
އެންޑޯމެޓްރިއޯސިސްގެ ސަބަބުން ކުރިމަތިވާ ޖިސްމާނީ އަދި ނަފްސާނީ އުނދަގޫތަކަށް އަލިއަޅުއްވާލައްވަމުން، އެ ބަލި ދެނެނުގަނެވުމާއި، މައްސަރުކަންތަކާ ގުޅިގެން އޮންނަ ތަޢައްޞަބުތަކުގެ ސަބަބުން ގިނަ އަންހެނުން އިންތިހާ ވޭން ތަހައްމަލުކުރަމުންދާކަން ފާހަގަކުރެއްވިއެވެ. އަދި މި ބަލީގެ ފަރުވާ އާސަންދައިގައި ހިމެނުމަކީ ހަމަހަމަގޮތެއްގައި ޞިއްޙީ ފަރުވާ ފޯރުކޮށްދިނުމުގެ އަމާޒަށް ވާސިލުވުމަށް އެޅުނު މުހިންމު ފިޔަވަޅެއްކަމުގައި ވިދާޅުވިއެވެ.
މި މަސައްކަތު ބައްދަލުވުމުން ލިބުނު ފިލާވަޅުތަކުގެ އަލީގައި ގައުމީ އެކްޝަން ޕްލޭނެއް އެކުލަވާލުމަށާއި، މައްސަރުކަންތަކާ ގުޅޭގޮތުން ދަރިވަރުން ހޭލުންތެރިކުރުމަށް މަސައްކަތްތަކެއް ކުރެއްވުމަށް ކަމާބެހޭ މުއައްސަސާތަކަށް މެޑަމް ސާޖިދާ ގޮވާލެއްވިއެވެ. އަދި ގައުމީ ފެންވަރެއްގައި ކަމުގެ މާހިރުންގެ މެދުގައި ގުޅުން ގާއިމުކުރެއްވުމަށް އެސްއޯޖީއެމުން ކުރައްވާ މަސައްކަތަށް ތައުރީފުކުރެއްވިއެވެ.
އަންހެނުންގެ ސިއްހަތާއި ދުޅަހެޔޮކަމަށް އަޑުއުފުލުމުގައި ސާބިތުވެ ތިބުމަށް ގޮވާލައްވަމުން، މި މަސައްކަތު ބައްދަލުވުން ވާންޖެހޭނީ ހަމައެކަނި މަޝްވަރާކުރުމުގެ މަންސައަކަށް ނޫންކަމަށާއި، ސިއްހީ ނިޒާމު އިސްލާހުކުރުމަށް ލިބޭ ހިތްވަރަކަށް ވާންޖެހޭނެ ކަމުގައި މެޑަމް ސާޖިދާ ވިދާޅުވިއެވެ.