ސިވިލް ސަރވިސްގެ މުވައްޒަފުން ވަޒީފާއިން މުސްކުޅިކޮށް ވަކިކުރާއިރު، ސިވިލް ސަރވިސްގައި ނުހިމެނޭ ދައުލަތުގެ އެހެން މުއައްސަސާތަކުގައި ޚިދުމަތްކޮށްފައިވާ މުއްދަތު ހިމެނުމަށް ސިވިލް ސަރވިސް ކޮމިޝަނުން ނިންމައިފިއެވެ.
މި ނިންމުމުގެ ދަށުން، މުވައްޒަފުން މުސްކުޅިކޮށް ވަކިކުރާއިރު ޚިދުމަތުގެ މުއްދަތު ގުނުމުގައި، ސަރުކާރުގައި ޚިދުމަތްކޮށްފައިވާ މުއްދަތުގެ އިތުރުން، ސަރުކާރުގެ މައި ހިއްސާ ހިމެނޭ ކުންފުނިތައް ހިމެނޭގޮތަށް، ދައުލަތުގެ އެހެން މުއައްސަސާތަކުގައި މަސައްކަތްކޮށްފައިވާ މުއްދަތުވެސް ހިމެނޭނެއެވެ.
މިހާރު ވަޒީފާގައި ދެމިތިބި މުވައްޒަފުންގެ ތެރެއިން، އެފަދަ ތަޖުރިބާގެ ރެކޯޑެއް އޮތް މުވައްޒަފުން، އެ ތަޖުރިބާގެ ލިޔުންތައް ދިވެހިރާއްޖޭގެ ބާ ކައުންސިލްގެ “އަސްލާ އެއްގޮތްކަމުގެ ތައްގަނޑުޖެހުމާބެހޭ ގަވާއިދު” ގައިވާ މިންގަނޑުތަކާ އެއްގޮތަށް ތައްގަނޑު ޖަހައި، ވަޒީފާ އަދާކުރާ އިދާރާ މެދުވެރިކޮށް ސީއެސްވިއުގައިގެ “އެކްސްޕީރިއަންސް” ބަޔަށް އަޕްޑޭޓްކުރަން ޖެހޭނެއެވެ.
މީގެއިތުރުން، ސިވިލް ސަރވިސް ކޮމިޝަނުން ވަނީ ސިވިލް ސަރވިސްގެ ވަޒީފާތަކަށް މީހުން ހޮވުމާއި އައްޔަންކުރުމުގެ މިންގަނޑުތަކާއި އުޞޫލުގައި ލާޒިމުކުރާ މަޢުލޫމާތުތައް ހިމެނޭ، ތަޖުރިބާ އަންގައިދޭ ލިޔުމުގެ ނަމޫނާއެއްވެސް ޢާންމުކޮށްފައެވެ.
މި ބަދަލަކީ ސިވިލް ސަރވިސްގެ މުވައްޒަފުންގެ ޙައްޤުތައް ރައްކާތެރިކޮށް، އެ ފަރާތްތަކުގެ ތަޖުރިބާއަށް އިތުރު ބުރަދަނެއް ދިނުމަށް އެޅޭ މުހިންމު ފިޔަވަޅެއްގެ ގޮތުގައި ފާހަގަކުރެވެއެވެ.