މިދިޔަ އޮގަސްޓް މަހު ޓްރާންސްޝިޕްމަންޓްގެ ގޮތުގައި 1،934 ޓަނުގެ ކާގޯ އުފުލާފައިވާކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ހާމަކޮށްފިއެވެ. މިއީ މިއަހަރުގެ މިހާތަނަށް ވެލާނާ އިންޓަރނޭޝަނަލް އެއަރޕޯޓުން ޓްރާންސްޝިޕްމަންޓްގެ ގޮތުގައި އެންމެ ގިނަ އަދަދަކަށް ކާގޯ އުފުލި މަހެވެ.
ޓްރާންސްޝިޕްމަންޓް މުދަލަކީ އެހެން ޤައުމަކަށް ގެންދިއުމުގެ މަގުމަތީގައި ރާއްޖެއަށް ގެނެސް، އެ ޤައުމަށް ފޮނުވުމަށްޓަކައި ކަސްޓަމްސްގެ ކޮންޓްރޯލުގެ ދަށުގައި ބަހައްޓާ މުދަލެވެ. ރާއްޖޭގައި މި ޚިދުމަތް އެއަރ-ޓު-އެއަރ އަދި ސީ-ޓު-އެއަރ ކާގޯގެ ގޮތުގައި ފޯރުކޮށްދެއެވެ.
މިއަހަރުގެ ފުރަތަމަ 6 މަހުގެ ތަފާސްހިސާބުތަކަށް ބަލާއިރު، ޓްރާންސްޝިޕްމެންޓްގެ ގޮތުގައި ޖުމްލަ 6،879 ޓަނުގެ ކާގޯ އުފުލާފައިވެއެވެ. މީގެ ތެރޭގައި އެއަރ-ޓު-އެއަރގެ ގޮތުގައި 5،621 ޓަނާއި ސީ-ޓު-އެއަރގެ ގޮތުގައި 1،258 ޓަނުގެ ކާގޯ ހިމެނެއެވެ.
ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ތަޞައްވުރާ އެއްގޮތަށް، ވެލާނާ އިންޓަރނޭޝަނަލް އެއަރޕޯޓުގެ ކާގޯ ޚިދުމަތް ފުޅާކުރުމަށް އެމްއޭސީއެލުން ދަނީ ގިނަގުނަ މަސައްކަތްތަކެއް ކުރަމުންނެވެ. މީގެ ތެރޭގައި ޝެޑިއުލްކޮށްގެން މުދާ އުފުލާ އެއަރލައިންތަކާއެކު މަސައްކަތްކޮށް، ދަތުރުތަކުގެ އަދަދު އިތުރުކުރުމާއި އައު ރޫޓުތައް ތަޢާރަފުކުރުން ހިމެނެއެވެ.
އެމްއޭސީއެލުން އިތުރަށް ދަނީ ކަނޑުމަގުންނާއި ވައިގެމަގުން މުދާ އުފުލުމުގެ ޚިދުމަތް ފުޅާކޮށް، އެއަރލައިންތަކަށް އަވަސް ޚިދުމަތެއް ދިނުމަށާއި، އިންފްރާސްޓްރަކްޗަރާއި މުދާ ގެންގުޅުމުގެ ވަސީލަތްތައް ރަނގަޅުކުރުމުގެ މަސައްކަތްތައްވެސް ކުރިއަށް ގެންދަމުންނެވެ.