ގައިންގަޔަށް ނާރާ ބަލިތަކާ ގުޅޭގޮތުން އދ. އިން މިއަހަރު ބާއްވާ ހައިލެވެލް ބައްދަލުވުމުގައި ހިތުގެ ބަލިތަކަށް ޚަރަދުކުރާ މިންވަރު އިތުރުކުރުމަށް ވަކާލާތުކުރާ ދެވަނައަށް އެންމެ ގިނަ ސޮއި ލިބުނު ޕެޓިޝަނަކަށް ޓައިނީ ހާރޓްސް އޮފް މޯލްޑިވްސްގެ ޕެޓިޝަން ވެއްޖެއެވެ.
ވޯލްޑް ހާރޓްސް ފެޑަރޭޝަނުން އެކުލަވާލި 10 ޕެޓިޝަނުގެ ތެރެއިން މި މަތީ ވަނައަށް އަރާފައިވަނީ ރާއްޖޭގެ ޓައިނީ ހާރޓްސް އޮފް މޯލްޑިވްސްގެ މަސައްކަތްތަކަށެވެ. އެންމެ ގިނަ ސޮއި ލިބޭ ޕެޓިޝަނަށް ވުމަށް މަދުވަނީ އަދި 50 ސޮއިކަމަށް އެ ޖަމްއިއްޔާއިން ބުނެއެވެ.
“ރާއްޖެ މިވެވެނީ ބައިނަލްއަޤްވާމީ ގޮތުން ހިތުގެ ބަލިތަކަށް ވަކާލާތުކުރުމަށް ފުރުޞަތު ލިބޭ ޤައުމަކަށް. އެހެންވެގެން މިކަމަށް ބޭނުންވޭ ގިނަ މީހުންގެ ސޮއި ހޯދަން. އަޅުގަނޑުމެން ބޭނުންވަނީ މި ޕެޓިޝަންއަށް ރާއްޖެއިން ވީހާވެސް ގިނަ ސޮއި ލިބުން،” ޓައިނީ ހާރޓްސް އޮފް މޯލްޑިވްސްގެ ޗެއަރޕާސަން ޖީހާން މަހުމޫދު ވިދާޅުވިއެވެ.
ކޮންމެ އަހަރެއްގެ ސެޕްޓެމްބަރު 29 ވަނަ ދުވަސް ފާހަގަކުރަނީ ދުނިޔޭގެ ހިތުގެ ދުވަހުގެ ގޮތުގައެވެ. މިއަހަރަކީ ވޯލްޑް ހާރޓް ފެޑަރޭޝަނުން މި ދުވަސް ފާހަގަކުރަން ފަށާތާ 25 އަހަރު ފުރޭ އަހަރެވެ. އދ. ގެ ހައިލެވެލް ބައްދަލުވުމުގައި ހިތުގެ ބަލިތަކުގެ ފަރުވާއަށާއި ހޭލުންތެރިކަން އިތުރުކުރުމަށް ކުރާ ޚަރަދުތައް އިތުރުކުރުމަށް ވަކާލާތުކުރުމަށް ވޯލްޑް ހާރޓްސް ފެޑަރޭޝަނުން ވަނީ ނިންމާފައެވެ.
2017 ވަނަ އަހަރުން ފެށިގެން ވޯލްޑް ހާރޓްސް ފެޑަރޭޝަންގެ މެންބަރެއްގެ ގޮތުގައި ހަރަކާތްތެރިވަމުން އަންނަ ޓައިނީ ހާޓްސްއިން، ކޮންމެ އަހަރަކުވެސް އެ ފެޑަރޭޝަނާ ގުޅިގެން ހިތުގެ ދުވަސް ފާހަގަކުރުމަށް ހޭލުންތެރިކުރުމުގެ ޕްރޮގްރާމްތައް ހިންގަމުން ގެންދެއެވެ.