ސަރުކާރުގެ މަސްކުންފުނި މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން، ޗައިނާގައި ކުރިއަށްދާ ބައިނަލްއަޤުވާމީ ފެއަރއެއް ކަމަށްވާ، ޗައިނާ އިންޓަރނޭޝަނަލް ފެއަރ ފޯ އިންވެސްޓްމަންޓް އެންޑް ޓްރޭޑް (ސިފިޓް 25) ގައި ބައިވެރިވެއްޖެއެވެ. މި ފެއަރ ކުރިއަށްދަނީ މިމަހުގެ 8 އިން 11 އަށް، ޗައިނާގެ ފުޖިޔާން ޕްރޮވިންސްގެ ޒިޔަމިން ސިޓީގައެވެ.
ޗައިނާގެ މިނިސްޓްރީ އޮފް ކޮމާސްއިން އިންތިޒާމުކޮށްގެން ބާއްވާ މި ފެއަރގައި މިފްކޯއިން ވަނީ ޚާއްސަ ސްޓޯލެއް ބަހައްޓާފައެވެ. މި ސްޓޯލް މެދުވެރިކޮށް ކަނޑުމަހުގެ އުފެއްދުންތައް ބައިނަލްއަޤުވާމީ ފަރާތްތަކަށް ތަޢާރަފްކޮށް ޕްރޮމޯޓްކުރަމުންދާކަމަށް އެ ކުންފުނިން މަޢުލޫމާތު ދެއެވެ.
މިފްކޯގެ ޖެނެރަލް މެނޭޖަރ ލޯކަލް ސޭލްސް އެންޑް މާކެޓިންގ، އައިޝަތު ރިޔާޒާ ވިދާޅުވެފައިވަނީ “މި ފެއަރގައި މިފްކޯގެ ތަފާތު އުފެއްދުންތައް ދައްކާލައި، ފެއަރއަށް ޒިޔާރަތްކުރާ ފަރާތްތަކަށް މި އުފެއްދުންތައް ތަޖުރިބާކުރުމުގެ ފުރުސަތު ފަހިކޮށްދީފައިވާނެ” ކަމަށެވެ. އަދި މި ފެއަރގައި ބައިވެރިވުމުގެ އެންމެ މުހިންމު ބޭނުމަކީ ދިވެހި ކަނޑުމަހުގެ އުފެއްދުންތައް ބައިނަލްއަޤުވާމީ މާކެޓުތަކަށް ފުޅާކުރުން ކަމަށްވެސް އޭނާ ފާހަގަކުރެއްވިއެވެ.
މީގެއިތުރުން ޗައިނާއަށް މިފްކޯގެ ވިޔަފާރި ތަޢާރަފުކޮށް، ދިވެހިރާއްޖޭގެ ކަނޑުމަހުގެ އުފެއްދުންތަކަށް އާ ދޮރުތަކެއް ހުޅުވައިދިނުމަކީވެސް މި ފެއަރގައި ބައިވެރިވުމުގެ މަޤްޞަދެއްކަމަށް ރިޔާޒާ ވިދާޅުވިއެވެ.
ޗައިނާގެ ސިފިޓް 25 ފެއަރގައި މިފްކޯއިން ބައިވެރިވެފައިވާއިރު، މިހާރު ހުޅުމާލޭ ސެންޓްރަލް ޕާކުގައި ކުރިއަށްދާ ފުޑް އެންޑް ހޮސްޕިޓަލިޓީ އޭޝިއާ މޯލްޑިވްސް (އެފްއެޗްއޭއެމް) ފެއަރގައިވެސް މިފްކޯއިން ވަނީ ބައިވެރިވެފައެވެ. އެފްއެޗްއޭއެމް ފެއަރގައި ބަހައްޓާފައިވާ މިފްކޯގެ ސްޓޯލަށްވެސް ބޮޑު ތަރުހީބެއް ލިބެމުންދާކަމަށް އެ ކުންފުނިން ފާހަގަކުރެއެވެ.
މިފްކޯއިން ފާހަގަކުރިގޮތުގައި މިފަދަ ބައިނަލްއަޤުވާމީ އަދި ޤައުމީ ފެއަރތަކުގައި ބައިވެރިވުމަކީ އެ ކުންފުނީގެ އުފެއްދުންތައް ފުޅާކޮށް، ގިނަ ބަޔަކާ ހަމައަށް ފޯރުކޮށްދިނުމަށް ކުރަމުންދާ މަސައްކަތްތަކުގެ މުހިންމު ބައެކެވެ.