ކ. ހިންމަފުށީގައި ހުންނަ ޑްރަގް ރިހެބިލިޓޭޝަން ސެންޓަރުގައި މޮބައިލް ފޯނު ގެންގުޅޭކަމަށް ޝައްކުކުރެވިގެން ފުލުހުން މިއަދު އޮޕަރޭޝަނެއް ފަށައިފިއެވެ.
މި މައްސަލައާ ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެއްވަމުން، ނޭޝަނަލް ޑްރަގް އެޖެންސީ (އެންޑީއޭ)ގެ ޗެއަރމަން އަދި ހޯމް މިނިސްޓްރީގެ ސްޓޭޓް މިނިސްޓަރު ލުބްނާ ޒާހިރު ހުސައިން ވިދާޅުވީ، “ސެންޓަރަށް ފޯނު ވައްދައިގެން ގެންގުޅޭ ކަމުގެ މަޢުލޫމާތު ލިބުމާ ގުޅިގެން ފުލުހުން މިހާރު ވަނީ އެތަނުގައި ހަރަކާތްތެރިވާން ފަށާފައި” ކަމަށެވެ.
ފުލުހުންގެ އޮޕަރޭޝަންގެ ތެރޭގައި މުޅި ސެންޓަރު ބަލައި ފާސްކުރުމުގެ އިތުރުން، އެހެނިހެން މަނާ ތަކެތި ހުރިތޯވެސް ބަލާނެ ކަމަށް ސްޓޭޓް މިނިސްޓަރު ލުބްނާ ވިދާޅުވިއެވެ.
ހިންމަފުށީގައި ހުންނަ ޑްރަގް ރިހެބިލިޓޭޝަން ސެންޓަރަކީ މަސްތުވާތަކެތީގެ ވަބާއިން ސަލާމަތްވުމަށް މަސައްކަތްކުރާ ފަރާތްތަކަށް ޚާއްޞަ ފަރުވާގެ ޕްރޮގްރާމްތައް ހިންގާ މަރުކަޒެކެވެ. މި މަރުކަޒުގައި ފަރުވާ ހޯދާ ފަރާތްތަކަށް އެކި ބާވަތުގެ ފަރުވާގެ ޕްރޮގްރާމްތައް ހިންގައިދީ، މަސްތުވާތަކެތީގެ ވަބާއިން ސަލާމަތްވުމަށް އެހީތެރިކަން ފޯރުކޮށްދެއެވެ.
މި މަރުކަޒުގައި ފަރުވާ ހޯދާ ފަރާތްތަކަށް މޮބައިލް ފޯނު ގެންގުޅުމަކީ މަނާކަމެކެވެ. އަދި މިފަދަ ތަކެތި ބޭނުންކުރުމަކީ ފަރުވާގެ ޕްރޮގްރާމްތަކަށް ހުރަސްއެޅޭނެ ކަމެއްކަމަށް ބެލެވެއެވެ.