އަމިއްލަ ފަރާތްތަކުން އަޅަން ހަވާލުވާ މިސްކިތްތަކުގެ މަސައްކަތް 6 މަސްދުވަހުގެ ތެރޭގައި ފަށަން ލާޒިމުކޮށް، މިސްކިތެއް އަޅަން ދެވޭ މުއްދަތު 2 އަހަރަށްވުރެ އިތުރު ނުކުރުމަށް އިސްލާމީ ކަންތައްތަކާބެހޭ ވުޒާރާއިން ނިންމަވައިފިއެވެ. މިއީ އަމިއްލަ ފަރާތްތަކުން މިސްކިތް ބިނާކުރުމާ ގުޅޭގޮތުން އެ ވުޒާރާއިން އަލަށް އެކުލަވާލި ސިޔާސަތެއްގެ ދަށުން ނިންމި ނިންމުމެކެވެ.
މި އައު ސިޔާސަތުގެ ދަށުން، މިސްކިތް އެޅުމަށް ބިން ލިބޭތާ 6 މަސްދުވަހުގެ ތެރޭގައި މަސައްކަތް ނުފަށައިފިނަމަ، އެ ބިން އަނބުރާ ސަރުކާރަށް ނެގުމަށް ވަނީ ނިންމާފައެވެ. އަދި މިސްކިތް އެޅުމުގެ މަސައްކަތް ނިންމުމަށް ދެވޭނީ ގިނަވެގެން 2 އަހަރުދުވަހުގެ މުއްދަތެކެވެ.
އިސްލާމީ ވުޒާރާއިން މި ސިޔާސަތު އެކުލަވާލުމުގެ މައިގަނޑު ސަބަބެއްގެ ގޮތުގައި ފާހަގަކުރައްވާފައިވަނީ، “ވޭތުވެދިޔަ އަހަރުތަކުގައި އަމިއްލަ ފަރާތްތަކުން މިސްކިތް އެޅުމަށް ބިން ހޯދުމަށްފަހު، މަސައްކަތް ނުފަށައި ނުވަތަ ނުނިންމައި ގިނަ އަހަރުތަކެއް ވަމުންދިއުމުގެ ސަބަބުން ރައްޔިތުންނަށް ނަމާދުކުރުމަށް ދަތިތަކާ ކުރިމަތިވަމުންދާތީ” ކަމަށެވެ.
މީގެއިތުރުން، މި އައު ސިޔާސަތުގެ ދަށުން މިސްކިތުގައި އެއްވެސް ބައެއްގެ އަމިއްލަ އިދާރީ މަސައްކަތްތައް ހިންގުމާއި، އަމިއްލަ މުދާ ގުދަންކުރުން ފަދަ ކަންކަން މަނާކުރެވިފައިވެއެވެ. އަދި މިސްކިތް އެޅުމަށް ބޭނުންވާ ފައިސާ ހުރިކަމުގެ ހެކި ހުށަހެޅުމަކީވެސް މިހާރު ލާޒިމު ކަމެކެވެ.
އިސްލާމީ ކަންތައްތަކާބެހޭ ވުޒާރާއިން ހާމަކުރެއްވި ގޮތުގައި، މި އައު އުސޫލުތަކަށް މިހާރު މިސްކިތް އެޅުމަށް ހުއްދަ ދެވިފައިވާ ފަރާތްތަކާއި އަލަށް ހުށަހަޅާ ފަރާތްތަކުން ވެސް ތަބާވާން ޖެހޭނެއެވެ. މި ސިޔާސަތަކީ ކުރިއަށް އޮތްތަނުގައި މިސްކިތް އެޅުމުގައި ދިމާވާ މައްސަލަތަކަށް ހައްލު ހޯދުމަށް އެކުލަވާލެވިފައިވާ ސިޔާސަތެއް ކަމުގައި އެ ވުޒާރާއިން ވަނީ ފާހަގަކުރައްވާފައެވެ.