ޑޮކްޓަރުކަން ކިޔަވަން ރާއްޖެއިން ބޭރަށް ދިޔަ ދިވެހި ދަރިވަރުންތަކަކަށް އޮޅުވާލައިގެން ގިނަ އަދަދެއްގެ ފައިސާ ނަގައި، އެ ކުދިންނަށް ކޯސް ކުރިއަށް ނުގެންދެވި އެނބުރި އަންނަން ޖެހުނު ކަމަށް ބުނާ މައްސަލައެއް ފެންމަތިވެއްޖެއެވެ. މި މައްސަލައިގައި "ޒީޑް އިންޓަނޭޝަނަލް" ނަމަކަށް ކިޔާ އެޖެންސީއަކުން ވަނީ ދަރިވަރުންގެ އަތުން އަސްލު ޓިއުޝަން ފީއަށްވުރެ އެތައް ގުނައެއް އިތުރަށް ފައިސާ ނަގާފައެވެ.
މި ސްކޭމުގެ ޝިކާރައަކަށްވީ ދަރިވަރުންގެ ތެރޭގައި ސްރީ ލަންކާ، މެލޭޝިއާ އަދި ފިލިޕީންސަށް ޑޮކްޓަރުކަން އަލަށް ކިޔަވަން ދިޔަ ކުދިންނާއި، މިހާރު ޑޮކްޓަރުންގެ ގޮތުގައި މަސައްކަތްކުރާ ބައެއް ދިވެހިން ސްޕެޝަލައިޒްވާން ދިޔަ ކުދިން ހިމެނެއެވެ. 2023 ވަނަ އަހަރު ރަޖިސްޓްރީކޮށްފައިވާ މި އެޖެންސީން ވަނީ 10,000 ޑޮލަރުގެ ޓިއުޝަން ފީއަށް، ބައެއް ކުދިންގެ އަތުން 40,000 ޑޮލަރު ނަގާފައެވެ.
މި ސްކޭމުގެ މައިގަނޑު ފަރާތް ކަމަށް ބެލެވޭ ލަންކާ މީހަކު ވަނީ ދިވެހި ދަރިވަރުންނަށް ފިލިޕީންސުގައި ރެޒިޑެންސީ ހޯދައިދޭނެ ކަމަށް ބުނެ އެތައް ބައެއްގެ އަތުން ފައިސާ ނަގާފައެވެ. ނަމަވެސް އެޖެންސީން ދީފައިވަނީ ދޮގު މަޢުލޫމާތުތަކެއް ކަމުން، ދަރިވަރުންނަށް ވިސާގެ މައްސަލަތައް ކުރިމަތިވެ، އަދި ބައެއް ފަހަރު ކިޔަވަން ދިޔަ ހޮސްޕިޓަލްތަކަށް ފައިސާ ނުދެއްކުމުން، އެ ކުދިން ޑިޕޯޓްކުރަން ޖެހި، ކޯސް ކުރިއަށް ނުގެންދެވި އެނބުރި އަންނަން ޖެހިފައިވެއެވެ.
މި މައްސަލައާ ގުޅިގެން އެޗް އެންޑް އެސޯސިއޭޓްސް އެލްއެލްޕީގެ މެނޭޖިން ޕާޓްނަރު އަދި ޤާނޫނީ ވަކީލް އިބްރާހީމް ހާފިޒް ވަނީ ދަރިވަރުންނަށް އިންސާފު ހޯދައިދިނުމަށް ޤާނޫނީ އެހީތެރިކަން ފޯރުކޮށްދޭން އިސްނަގާފައެވެ. "ޑޮކްޓަރުކަން ކިޔަވަން ނުވަތަ އެހެންވެސް ޕްރޮގްރާމްތަކަށް، ހާއްސަކޮށް ފިލިޕީންސް ނުވަތަ މެލޭޝިއާއަށް ދާން ބޭނުންވާ ދަރިވަރުންނާއި ބެލެނިވެރިން "ޒީޑް އިންޓަނޭޝަނަލް، އާއި މެދު ވަރަށް ބޮޑަށް ސަމާލުވާން ޖެހޭނެ" ކަމަށް ހާފިޒް ވިދާޅުވިއެވެ.
މިފަދަ މައްސަލަތަކުން ރައްކާތެރިވުމަށް، ކިޔަވަން ބޭނުންވާ ޔުނިވަރސިޓީތަކުގެ ރަސްމީ ވެބްސައިޓްތައް މެދުވެރިކޮށް، ސީދާ ޔުނިވަރސިޓީއާ ގުޅައިގެން ޓިއުޝަން ފީ އާއި އެޑްމިޝަން ޕްރޮސެސްތައް ކަށަވަރުކުރުމަށާއި، މިފަދަ މަޅިއެއްގައި ޖެހިފައިވާ ފަރާތްތަކުން ވަގުތުން ފުލުހުންގެ ސައިބަރ ކްރައިމް ޑިޕާޓްމަންޓަށް އެންގުމަށް ވަނީ އިލްތިމާސްކޮށްފައެވެ.