ހަށިގަނޑާމެދު ފަރުވާވެ ސަމާލުކަން ނުދެވޭނަމަ އެކިކަހަލަ ތަދުތައް ވަރަށްވެސް މީހާއާ ރައްޓެހިވެދާނެއެވެ. ދިވެހިންގެ ތެރޭގައި އުނަގަނޑުގެ ތަދުތަކާއި، ކަކުލު ހުޅުގައި ރިއްސުމާއި، ކަނދުރާގައި ރިއްސުން ފަދަ ތަދުތަކަކީ ވަރަށް އާންމު ކަމެކެވެ. މިފަދަ ތަދުތަކަށް ،ބާޒާރުން ލިބެން ހުންނަ "ވޮލިނީ"، "މޫވް" ފަދަ ކޮންމެވެސް ބޭހެއް އުނގުޅާލުމަކީ އާންމުކަމެކެވެ.
ނަމަވެސް، ގޭގައި ތައްޔާރުކޮށްގެން ބޭނުންކުރެވިދާނެ ގުދުރަތީ ފަރުވާއެއްގެ ގޮތުގައި އިނގުރާއި ޒައިތޫނި ތެލުގެ ބޭނުން ހިފިދާނެއެވެ. ޒަމާނުއްސުރެ ދިވެހިންނަކީ ހަށިގަނޑުގެ ތަދުތަކާއި ބޮޑެތި ވޭންތަކުން ސަލާމަތްވުމަށް މޫދަށް ފައިބާ، ލޮނުވެލި މޮޑެ، ލޮނުން ބޭނުން ހިފަމުން އަންނަ ބައެކެވެ. އަދި ޒައިތޫނި ތެލުން މާލީޝްކޮށް ތަދުވާތަންތަނުގައި މަސާޖުކޮށް ހެދުމަށްވެސް ޒައިތޫނުތެޔޮ ބޭނުން ކޮށްއުޅުނެވެ. އެހެންކަމުން ޒައިތޫނިތެލާއި ލޮނަކީ ޝައްކެއް ނެތް މިންވަރަށް "ތަދުތަކާއި ރިހުން" ތަކަށް ހުރި ފަރުވާއެކެވެ.
އިނގުރު ގައި އެކުލެވިގެންވަނީ ހަށިގަނޑަށް ބޭނުންތެރި ގިނަ މާއްދާތަކެކެވެ. މީގެ ތެރޭގައި ކެލްސިއަމް، އެސެންޝަލް އޮއިލްސް، އެމިނޯ އެސިޑް، ފޮސްފަރަސް އަދި ވިޓަމިން ބީ އާއި ސީ ހިމެނެއެވެ. އިނގުރަކީ ރިޖެނެރޭޓިވް އަދި އެފްރޯޑިސިއަކް މާއްދާތަކުން މުއްސަނދި އެއްޗެކެވެ.
ޒައިތޫނި ތެޔޮ: އޭގެ ޒާތުގައި އެންޓި-އިންފްލެމޭޓަރީ އަދި އެނާލްޖެސިކް ބާރު އެކުލެވޭ އެއްޗެކެވެ.
ލޮނުގެ މުހިންމުކަން: ލޮނަކީވެސް ތަދުތަކަށް ލުޔެއް ހޯދައިދިނުމުގައި މުހިންމު ދައުރެއް އަދާކުރާ އެއްޗެކެވެ. ސައިންޓިފިކް ދިރާސާތަކުން ދައްކާގޮތުގައި ލޮނުގެ ސަބަބުން ގުނަވަންތަކުގެ އިންފްލެމޭޝަން ކުޑަވެ، ތަދުތަކަށް ލުޔެއް ލިބިގެންދެއެވެ. ޒަމާނުއްސުރެ ދިވެހިން މޫދަށް ފައިބައި، ލޮނުވެލި މޮޑެ، ތަދުތަކަށް ފަރުވާ ހޯދަމުން އައިސްފައިވަނީ މި ސަބަބާ ހުރެއެވެ.
ޒައިތޫނިތެލާއި ލޮނަކީ ޝައްކެއް ނެތް މިންވަރަށް "ތަދުތަކާއި ރިހުން" ތަކަށް ހުރި ފަރުވާއެކެވެ.—ފޮޓޯ:ވިންމެކް
ބޭނުންވާތަކެތި:
- މަތި ބަންދު ކުރެވޭ ކަހަލަ ކުޑަ ކޮންޓެއިނަރ، މާނައަކީ ޕްލާސްޓިކް ވިޔަސް ރަބަރު ނުވަތަ ބިއްލޫރި ނޫނީ ކޮންމެ ވައްތަރެއް ވިޔަަސް މަތި ބަންދުކުރެވޭފަދަ އެއްޗެއް ބޭނުން ކުރާށެވެ.
- ހެޔޮވަރު ވަރުގެ ހަތަރު، ފަސް އިންޗީގެ ދެ އިނގުރުގަނޑު: އިނގުރުގެ ތޮށި މެށުމަށްފަހު ގާނާލާށެވެ.
- ދެން ހޯދާފައި ހުރި ތަށި ނުވަތަ ފުޅިއަށް އަޅާށެވެ.
- އިނގުރު މަތިންލައި ފޮރުވޭ ވަރަށް، އިނގުރަށްވުރެ އިންޗިއެއް މައްޗަށް ހުންނަ ވަރަށް ޒައިތޫނު ތެޔޮ އަޅާށެވެ.
- ދެން މޭޒުމަތީ ސަމުސަލެއްގެ، ބޮޑުސަމުސަލެއްގެ ހުންނަ ވަރަށް ލޮނު އަޅާށެވެ. ލިބެން ހުރިއްޔާ ފުށް ލޮނު(ގަނޑުގަނޑަށް ހުންނަ ކްރިސްޓަލް ލޮނު،) ވަރަށް ރަނގަޅެވެ. ނޫނީ ރާއްޖެއިން އާންމުކޮށް، ފިހާރަތަކުން ލިބެން ހުންނަ ޕެކެޓް ލޮނު ހަމަ ރަނގަޅެވެ. (ސަބަބަކީ ހޯދަން ދަތިވާނެތީއެވެ. އިހު، ނުވަދިހައިގެ އަހަރުތަކުގައި އަތޮޅުތަކުން ފެނުނަސް މިހާރު ފުށްލޮނު ފެންނަލެއް މަދުކަމެވެ.)
- ރަނގަޅަށް އެއްކޮށްލުމަށްފަހު މަތި ބަންދުކޮށްލާށެވެ. 24 ގަޑިއިރު ވަންދެން ބަހައްޓާށެވެ.
- އަދި ދެން ތަދުވެ، ރިއްސާ ކަކޫ ފަދަ ތަންތަނުގައި ރަނގަޅަށް އުނގުޅާލާށެވެ. ރިހުމަށް ލުއި ލިބޭ ވަރު އިހްސާސްކުރެވޭނެއެވެ.
- ތަދުތަކަށް ލުއި ހޯދުމަށް ވޮލިނީ، މޫވް ފަދަ އެއްޗެހި ބޭނުން ކުރުމަށްވުރެ މި ފަރުވާ މާ ބޮޑަށްވެސް ކަމުދާނެ ކަމަށް އުންމީދު ކުރަމެވެ.މިއީ ހަމަ ޔަގީނުންވެސް ތަދު ކެނޑުމާއެކު ފިސާރި އަރާމާއި ލުއިކަން މީހާއަށް ގެނެސްދޭ އެހާމެ ހިތްހަމަޖެހުން ލިބިގެންދާނެ ފަރުވާއެކެވެ.
ކަކުލުގެ ރިހުން ގިނަ ދުވަސްތަކަކަށް ދެމިގެން ދާނަމަ، ނުވަތަ ކަކޫ ދުޅަވެ، ބޮޑެތި ބަދަލުތަކެއް އަންނަން ފަށައިފިނަމަ، ނުވަތަ ހިނގުމަށް އުނދަގޫވާ ވަރަށް ރިއްސާނަމަ، ލަސްނުކޮށް ޑޮކްޓަރެއްގެ އިރުޝާދު ހޯދުން މުހިންމެވެ. އަދި މިފަދަ ގޭގައި ކުރެވޭ ފަރުވާތައް ފެށުމުގެ ކުރިން، އަމިއްލަ ޞިއްޙީ ހާލަތަށް ރިޢާޔަތްކޮށް، ބޭނުންވެއްޖެ ހިނދެއްގައި ޞިއްޙީ މާހިރެއްގެ ލަފާ ހޯދުން މުހިންމެވެ.