ދިވެހިރާއްޖޭގެ އުތުރުގެ މައި އިގްތިސާދީ މަރުކަޒު ކަމުގައިވާ ކުޅުދުއްފުށީ ސިޓީގައި ޔަމަހާގެ އެންމެ ފަހުގެ ވަސީލަތްތަކާއެކު ސާވިސް ސެންޓަރެއް ގާއިމުކުރުމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި އެލިއާ އިންވެސްޓްމަންޓް ޕްރައިވެޓް ލިމިޓެޑްއާ ދެމެދު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި އެމްޕީއެލްގެ ފަރާތުން ސޮއިކުރެއްވީ ކުންފުނީގެ ސީއީއޯ މުހައްމަދު ރިޝްވާން އެވެ. އަދި އެލިއާ އިންވެސްޓްމަންޓްގެ ފަރާތުން ސޮއިކުރެއްވީ ކުންފުނީގެ މެނޭޖިންގް ޑިރެކްޓަރު އަލާއު އަލީއެވެ. ކުޅުދުއްފުށީ ސިޓީ ޕޯޓުގައި ގާއިމުކުރާ މި ސާވިސް ސެންޓަރުގެ އަމަލީ މަސައްކަތް އަންނަ ހަ މަސްދުވަހުގެ ތެރޭގައި ފެށުމަށް ވަނީ ހަމަޖެހިފައެވެ.
އެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން އެމްޕީއެލްގެ ސީއީއޯ ރިޝްވާން ވިދާޅުވީ، "އުތުރުގައި އަޅުގަނޑުމެން ޕޯޓްގެ މަސައްކަތް ފެށިއިރުގައި ވަރަށް މުހިންމު ކޮންޕޯނެންޓެއް މަދުވެގެން އެބަދޭ ކުޅުދުއްފުށީގައި ހާއްސަކޮށް. އެއީ އަޅުގަނޑުމެންގެ ބަނދަރެއް އޮވެފައި ވަރަށް ގިނަ ފަހަރު ވަރަށް ގިނަ ރިކުއެސްޓް އާދޭ ވަރަށް ގިނަ ތަފާތު ހިދުމަތައް އެ ހިސާބުގަނޑުގެ މީހުންގެ ފަރާތުން" ކަމަށެވެ.
ކުޅުދުއްފުށީގައި އެލިއާގެ ސާވިސް ސެންޓަރެއް އެޅުމާސް އެއްބަސް ވުމުގައި ސޮއި ކުރުމުގެތެރެއިން—ފޮޓޯ: އެމްޕީއެލް
އެލިއާ އިންވެސްޓްމަންޓްގެ މެނޭޖިންގް ޑިރެކްޓަރު އަލާއު އަލީ ވިދާޅުވީ، މިކަމަށް މަސައްކަތްކުރާތާ ދުވަސްތަކެއް ވެފައިވާ ކަމަށާއި، މިއީ ދެފަރާތުން ގުޅިގެން މަސައްކަތް ކުރުމުގެ ފެށުމެއް ކަމަށެވެ. "ވަރަށް އުންމީދުތައް ވެސް އަޅުގަނޑުމެންގެ ފުޅާ. މިއީ ފެށުމެއް. އަޅުގަނޑުމެން ވެސް އުންމީދުކުރަނީ ދިގުދެމިގެންދާ ދާއިމީ ގުޅުމަކަށް މިކަންވާނެކަމަށް" އަލާއު ވިދާޅުވިއެވެ.
މި ސާވިސް ސެންޓަރުން ޔަމަހާގެ އިންޖީނުތަކަށް ހާއްސަކޮށް އައުޓްބޯޑް ހިދުމަތްތައް ދިނުމަށް ހަމަޖެހިފައިވާއިރު، މިކަމުގެ ސަބަބުން އުތުރުގެ ރަށްރަށުގެ ދޯނިފަހަރާއި ބޯޓުފަހަރަށް ލުއިފަސޭހަ ގޮތަކަށް ސާވިސް ހޯދުމުގެ ފުރުސަތު ފަހިވެގެންދާނެއެވެ.