އިންސާނީ އެހީ ހިފައިގެން ޣައްޒާއަށް ދަތުރުކުރަމުންދާ ގްލޯބަލް ސުމޫދު ފްލޮޓިއްލާގެ ބޯޓުތައް ބައިނަލްއަޤްވާމީ ކަނޑުގެ ސަރަހައްދުން ހިފެހެއްޓުން ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ހަރުކަށި އިބާރާތުން ކުށްވެރިކުރައްވައިފިއެވެ. މި ކުށްވެރިކުރެއްވުން ރައީސް ފާޅުކުރެއްވީ މީސް މީޑިއާގައި ހިއްސާކުރެއްވި ޕޯސްޓެއްގައެވެ.
ރައީސުލްޖުމްހޫރިއްޔާ ފާހަގަކުރެއްވި ގޮތުގައި، ގްލޯބަލް ސުމޫދު ފްލޮޓިއްލާގެ ބޯޓުތަކުގައި ދަތުރުކުރަމުންދިޔައީ ހަތިޔާރު ނެތް އާންމު ރައްޔިތުންނެވެ. “ހާލުގައި ޖެހި އަސާސީ ހައްޤުތަކުން މަޙްރޫމްވެފައި ތިބި ބަޔަކަށް، އިންސާނީ އެހީ ހިފައިގެންދާ ގާފިލާއަކާ ދިމާކޮށްލުމަކީ އިންސާނިއްޔަތާއި އަދި ބައިނަލްއަޤްވާމީ ޤާނޫނުތަކާވެސް ޚިލާފް ކަމެކެވެ،” ރައީސް ވިދާޅުވިއެވެ.
ގްލޯބަލް ސުމޫދު ފްލޮޓިއްލާއަކީ ދިވެހިރާއްޖެ ހިމެނޭގޮތަށް 44 ޤައުމެއްގެ ރައްޔިތުން އިސްނަގައިގެން އެކުލަވާލާފައިވާ އިންސާނީ އެހީގެ ގާފިލާއެކެވެ. މި ގާފިލާގައި 500 އަށްވުރެ ގިނަ މީހުން ބައިވެރިވެފައިވާއިރު، އޭގެ ތެރޭގައި ބައެއް ޤައުމުތަކުގެ ޤާނޫނު ހަދާ މަޖިލީހުގެ މެންބަރުންނާއި ޤާނޫނީ ވަކީލުން ހިމެނެއެވެ. ދިވެހިރާއްޖެއިން އިންޓަނޭޝަނަލް އެއިޑް ކެމްޕެއިންގެ ސެކްރެޓަރީ ޖެނެރަލް އިބްރާހީމް ޝާޒްވެސް މި ދަތުރުގައި ބައިވެރިވެވަޑައިގަންނަވައެވެ.
ފްލޮޓިއްލާގެ ދަތުރު އިންތިޒާމުކުރާ ފަރާތުން މަޢުލޫމާތު ދީފައިވާ ގޮތުގައި، މިހާތަނަށް 13 އުޅަނދެއް ޔަހޫދީ ސިފައިން ވަނީ ހުއްޓުވާފައެވެ. ނަމަވެސް އިތުރު 30 އުޅަނދު މިވަގުތުވެސް ޣައްޒާއަށް ދަތުރުކުރަމުންދާ ކަމަށް އެފަރާތުން ބުނެފައިވެއެވެ.
ރައީސުލްޖުމްހޫރިއްޔާ ވަނީ މި ޢަމަލުތައް ހުއްޓުވުމަށް ބައިނަލްއަޤްވާމީ މުޖުތަމަޢުއަށް ގޮވާލައްވާފައެވެ. އަދި “ދިވެހިން އަބަދުވެސް ތިބޭނީ ފަލަސްޠީނުގެ ރައްޔިތުންގެ އިންސާނީ ހައްޤުތައް ކަށަވަރުކޮށް، އިންސާފު ހޯދައި، ސުލްހައާއި ސަލާމަތްތެރިކަމަށް ކުރަމުންދާ މަސައްކަތުގައި” ކަމަށް ވިދާޅުވެފައިވެއެވެ.