ޣައްޒާގެ ޙިޞާރު ފޫއަޅުވައިލުމަށް މަސައްކަތްކުރި ގްލޯބަލް ޞުމޫދު ފްލޮޓިއްލާ (ޖީއެސްއެފް)ގެ އުޅަނދުތަކަށް ޔަހޫދީ ސިފައިން އަރައިގަނެ، އުޅަނދުތަކުގައި ތިބި އެކްޓިވިސްޓުން ގަދަބާރުން ހައްޔަރުކޮށް، އެ މީހުން ވިލާތުގެ އެކި ޤައުމުތަކަށް ފޮނުވައިލުމަށް ނިންމައިފިއެވެ.
ޖީއެސްއެފްގެ އުޅަނދުތަކުގައި ދަތުރުކުރި 44 ޤައުމަކަށް ނިސްބަތްވާ 500 އަށްވުރެ ގިނަ އެކްޓިވިސްޓުންގެ ތެރޭގައި ވިލާތުގެ ޤައުމުތަކުގެ ޤާނޫނު ހަދާ މަޖިލީހުގެ މެންބަރުންނާއި، ޣައްޒާގެ ރައްޔިތުންގެ ޙައްޤުތަކަށް ވަކާލާތުކުރާ ސްވިޑެންގެ މަޝްހޫރު އެކްޓިވިސްޓް ގްރިއެތަ ތުންބެރީ ވެސް ހިމެނެއެވެ. މި ފްލޮޓިއްލާގެ މަޤްޞަދަކީ ޣައްޒާއަށް ބޭނުންވާ ކާބޯތަކެއްޗާއި އިންސާނީ އެހީ ފޯރުކޮށްދިނުމެވެ.
ސެޕްޓެމްބަރު މަހުގެ ކުރީކޮޅު ފެށި މި ދަތުރުގައި ދިޔަ އުޅަނދުތައް ޣައްޒާއާ ކައިރި ސަރަޙައްދަކާ ހަމައަށް ގޮސްފައިވަނީ އޮކްޓޯބަރު 1 ވަނަ ދުވަހުގެ ރޭގަނޑުގެ ވަގުތެއްގައެވެ. “ނުރައްކާ ޒޯނަށް އުޅަނދުތައް ވަނުމާއެކު ޔަހޫދީ މަނަވަރުތައް އެ އުޅަނދުތައް ވަށާލައި، ހަތިޔާރު އެޅި ސިފައިން އުޅަނދުތަކަށް އަރައިގަތުމަށްފަހު، އުޅަނދުތަކުގައި ތިބި މީހުން ވަނީ ގަދަކަމުން ޔަހޫދީންގެ ބެލުމުގެ ދަށަށް ގެންގޮސްފައި،” ފްލޮޓިއްލާގެ އިސް ފަރާތްތަކުން މައުލޫމާތު ދީފައިވެއެވެ.
ފްލޮޓިއްލާގެ ގިނަ އުޅަނދުތަކަށް ޔަހޫދީން ހުރަސްއަޅާފައިވާއިރު، ތަންކޮޅެއް ފަހަތުގައި އޮތް އެއް އުޅަނދު އަދިވެސް ހުއްޓުވާފައެއް ނުވެއެވެ. ފްލޮޓިއްލާގެ ދަތުރު އިންތިޒާމްކުރި ފަރާތްތަކުން ބުނެފައިވަނީ އުޅަނދުތަކަށް މިގޮތަށް ހުރަސްއެޅުމަކީ ބައިނަލްއަޤްވާމީ ޤާނޫނުތަކާ ޚިލާފު ޢަމަލެއް ކަމަށެވެ.
ޔަހޫދީންގެ މި ޢަމަލު ބައިނަލްއަޤްވާމީ މުޖުތަމަޢުން ދަނީ ކުށްވެރިކުރަމުންނެވެ. ހައްޔަރުކުރެވުނު އެކްޓިވިސްޓުން އެކި ޤައުމުތަކަށް ފޮނުވާލާނެ ކަމަށް ޔަހޫދީން ބުނެފައިވީ ނަމަވެސް، އެ މީހުން ފޮނުވާލާނީ ކޮން ޤައުމުތަކަކަށްކަން އަދި ހާމަކޮށްފައެއް ނުވެއެވެ.