އެމްޑީޕީން މިރޭ ކުރިޔަށް ގެންދާ މުޒާހަރާ އަކީ ގޮތް ހުސްވެގެން ޤައުމުގެ އަމާންކަން ނަގާލާ މަގުތައް ހަލަބޮލިކުރުމުގެ ނިޔަތުގައި އަމިއްލަ ސިޔާސީ މަޤްޞަދެއް ޙާސިލްކުރުމަށް ބާއްވާ ހަރަކާތެއް ކަމަށް “ޕީޕަލްސް ނޭޝަނަލް ކޮންގްރެސް” ޕީއެންސީގެ ނައިބުރައީސް އަދި މަސްވެރިމާއި ކަނޑުގެ ވަސީލަތްތަކާ ބެހޭ ވަޒީރު އަހްމަދު ޝިޔާމު ވިދާޅުވެއްޖެއެވެ.
ވަޒީރު ޝިޔާމް މިފަދައިން ވިދާޅުވީ މިއަދު އެކްސްގައި ހިއްސާކުރި ޕޯސްޓެއްގައެވެ.
ވަޒީރު ޝިޔާމް ވިދާޅުވީ އެމްޑީޕީން މިރޭ ކުރިޔަށް ގެންދާ މުޒާހަރާ އަކީ ގޮތް ހުސްވެގެން ޤައުމުގެ އަމާންކަން ނަގާލާ މަގުތައް ހަލަބޮލިކުރުމުގެ ނިޔަތުގައި އަމިއްލަ ސިޔާސީ މަޤްޞަދެއް ޙާސިލްކުރުމަށް ބާއްވާ ހަރަކާތެއް ކަމަށާއި، މި ސަރުކާރުން ޤާނޫނު ތަންފީޒު ކުރުމުގައި ފަހަތަކަށް ނުޖެހޭނެ ކަމަށާއި، ޤައުމުގެ އަމާންކަންނަގާލާ މަގުތައް ހަލަބޮލިކޮށް ރައްޔިތުންގެ ހިތްތަކަށް ބިރުވެރިކަން ވައްދަން ކުޑަވެސް ޖާގައެއް ނުދޭނެ ކަމަށެވެ.
ވަޒީރު ޝިޔާމު ވިދާޅުވީ އެމްޑީޕީގެ ސަރުކާރުން އޭރު ކުރަމުންދިޔަ ވައްކަންތަކުގެ ވާހަކަ ދިޔައީ ކެނޑިނޭޅި މަޖިލީހުގައި ދައްކަމުން ކަމަށާއި، ކޮވިޑުގެ ބަލިމަޑުކަންވެސް އެއީ ވައްކަންކުރަން ލިބުނު ރަނުގެ ފުރުޞަތެއް ކަމަށެވެ.
“ވެންޓިލޭޓަރުން ކުރީ ވައްކަން، އެޅި ކޮވިޑް ފެސިލިޓީތަކުން ކުރީ ވައްކަން. ފެސިލިޓީތަކަށް ކޭޓަރ ކުރުމުގައިވެސް ކުރީ ވައްކަން. އެންމެ ކުޑަމިނުން މާސްކުންވެސް ކުރީ ވައްކަން. މަގު ހެދުމުން ކުރީ ވައްކަން. ހޮސްޕިޓަލްތައް އެޅުމުގެ ނަމުގައި ކުރީ ވައްކަން. ކުނި މެނޭޖްކުރާ ސެންޓަރުތައް ހެދުމުގެ ނަމުގައި ކުރީ ވައްކަން. މިހެންގޮސް ކިޔާނެ ކަމެއް ނެތް، ވައްކަން ނުކުރާ ހަމަ އެއްވެސް ދިމާލެއް އޭރަކު ނެތް.” ވަޒީރު ޝިޔާމު ވިދާޅުވިއެވެ.
ފެނަކައިން އޭރު ކުރަމުން ދިޔަ ވައްކަންތައް ފިއްކަނޑައިގެންދާވަރުވާ ކަމަށާއި، މަޖިލީހުން 2 ފަހަރެއްގެ މަތިން އެމައްސަލަތައް ބަލަން މަސައްކަތްތަކެއް ކުރެވުނު ކަމަށާއި، ކުރީގެ ރައީސް އިބުރާހީމް މުހައްމަދު ސާލިހު އެކަން މަޖިލިސް ތެރެއިން ހުއްޓުވާ އޭ.ސީ.ސީގެ މެންބަރުން ބަދަލުކުރި ކަމަށާއި، އެމްޑީޕީ ސަރުކާރުގެ 5 އަހަރު އެކަނި 64 ބިލިއަން ރުފިޔާގެ ދަރަނި އުފެއްދައި ވެރިކަން ނިންމާލީ މަސްވެެރިންނަށް 250 މިލިއަން ނުދައްކައި ކުދި އަދި މެދު ފަންތީގެ ވިޔަފާރިތައް ފުނޑާލައި، ދިވެހި ވިޔަފާރިތަކަށް 8 ބިލިޔަން ރުފިޔާ ދައްކަން އޮތް ކަމަށް ވަޒީރު ވަނީ ވިދާޅުވެފައެވެ.
މިއަދު ޑޮލަރަށް މިއަރާ ބާރަކީ އޭރު އެތައް ބިލިއަނުން ފައިސާ ޗާޕުކުރުމުގެ ނަތީޖާ ކަމަށާއި، ތަކެތީގެ އަގުބޮޑުވެ ދިރިއުޅުމުގެ ޚަރަދުތައް ބޮޑުވެ ޢާއިލާތައް ނިކަމެތިވެ ޤައުމުގެ އިޖުތިމާޢީ ފޭރާން އެއްކޮށް ވީދާ ކުދިކޮށްލި ކަމަށާއި، ރައީސުލްޖުމުހޫރިއްޔާ ޑރ. މުހައްމަދު މުއިއްޒު، ވެރިކަމާ ހަވާލުވެވަޑައިގެންނެވިއިރު އަތުވީ އިޤްތިޞާދީ ހުސް ތޮށިގަނޑެއް ކަމަށާއި، ފައިސާ ޗާޕްނުކޮށް މިހާލަތުން އަރައިގަނެ ތަރައްޤީގެ މަޝްރޫޢުތައް ބާރަށް ކުރިޔަށް ދާތަން ބަލަން ތިބުން ވާދަވެރިންނަށް ކެތްވާވަރުކަމަކަށްނުވާ ކަމަށް ވަޒީރު ޝިޔާމު ވަނީ ވިދާޅުވެފައެވެ.