މިރޭ ކުރަން އުޅޭ މުޒާހަރާގެ ބޭނުމަކީ ޤައުމުގެ އަމަން އަމާންކަން ނަގާލައި ސަރުކާރުން ރައްޔިތުންގެ ފުދުންތެރިކަމަށް ކުރަމުންދާ އެންމެހާ ކަންކަން ހުއްޓުވާލައި އިޤުތިޞާދު އިނދަޖެއްސުން ކަމަށް އިމާރާތްކުރުމާ ގެދޮރުވެރިކަމާ ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
ވަޒީރު އެކްސްގައި ކުރި ޕޯސްޓެއްގައި ވިދާޅުވީ ރޭ ކުރަން އުޅޭ މުޒާހަރާގެ ބޭނުމަކީ ޤައުމުގެ އަމަން އަމާންކަން ނަގާލައި ސަރުކާރުން ރައްޔިތުންގެ ފުދުންތެރިކަމަށް ކުރަމުންދާ އެންމެހާ ކަންކަން ހުއްޓުވާލައި އިޤުތިޞާދު އިނދަޖެއްސުން ކަމަށާއި، ދިވެހިރާއްޖެއަކީ ތަރައްޤީވެފައިވާ އަދި ހަމަޖެހުން ޤާއިމްވެފައިވާ ޤައުމެއްނޫންކަން ދެއްކުމަށް ބޭރުގެ ފަރާތްތަކަކާ ގުޅިގެން ކުރާ މަސައްކަތުގައި ދިވެހިން ގުނބޯ ހައްދައިގެން ބައިވެރިކުރުން ކަމަށެވެ.
ވަޒީރު ވިދާޅުވީ ބޭރުގެ އިންވެސްޓަރުން މިޤައުމަށް އައުމަށް ފަސްޖެހޭ ފަދަ ނުތަނަވަސް މާޙައުލެއް އޮތްކަމަށް ދައްކަން މަސައްކަތް ކުރުން، މިއީ ޤައުމަށް ހެޔޮއެދޭ ބަޔަކު ކުރާނެ އަދި ބައިވެރިވާނެ ކަމެއްނޫން ކަމަށް ވެސް ވަޒީރު ވަނީ ވިދާޅުވެފައެވެ.
މި މުޒާހަރާއާ ގުޅޭގޮތުން ޖުމްހޫރީ ޕާޓީގެ ލީޑަރު ޤާސިމް އިބްރާހިމް ވަނީ އެ ޕާޓީގެ މެންބަރުން މުޒާހަރާގައި ބައިވެރިނުވުމަށް ގޮވާލައްވާފައެވެ.
މީގެ އިތުރުން މަސްވެރިމާއި ކަނޑުގެ ވަސީލަތްތަކާ ބެހޭ ވަޒީރު އަހުމަދު ޝިޔާމް ވެސް ވަނީ އެކްގައި ޕޯސްޓެއް ކުރައްވާފައެވެ. ވަޒީރު ވިދާޅުވީ އެމްޑީޕީން މިރޭ ކުރިޔަށް ގެންދާ މުޒާހަރާ އަކީ ގޮތް ހުސްވެގެން ޤައުމުގެ އަމާންކަން ނަގާލާ މަގުތައް ހަލަބޮލިކުރުމުގެ ނިޔަތުގައި އަމިއްލަ ސިޔާސީ މަޤްޞަދެއް ޙާސިލްކުރުމަށް ބާއްވާ ހަރަކާތެއް ކަމަށެވެ.