ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް، ދިވެހި ޕާސްޕޯޓުގެ ޚިދުމަތް ރާއްޖޭގެ ހުރިހާ އަތޮޅަކަށް ފުޅާކުރުމުގެ މަޝްރޫޢުގެ ދަށުން، ގއ. ވިލިނގިލީގައި ދިވެހި ޕާސްޕޯޓުގެ ޚިދުމަތް ރަސްމީކޮށް ފަށައިފިއެވެ.
މޯލްޑިވްސް އިމިގްރޭޝަނުން މިކަން އިޢުލާނު ކުރުމާއެކު، މިއީ ރައީސް ޑރ. މުޢިއްޒުގެ ސަރުކާރުން އަތޮޅުތަކަށް ޕާސްޕޯޓުގެ ޚިދުމަތް ފުޅާކުރުމަށް ކުރަމުންދާ މަސައްކަތުގެ ތެރެއިން އިތުރު ފިޔަވަޅެއް ކަމުގައި ފާހަގަކޮށްފައިވެއެވެ.
އެންމެ ފަހުން މި ޚިދުމަތް ރަސްމީކޮށް ފަށާފައިވަނީ ތ. އަތޮޅުގައެވެ. އަދި އޭގެ ކުރިން ވ. އަތޮޅުގައި ވެސް ޕާސްޕޯޓު ހައްދައި ދިނުމުގެ ޚިދުމަތް ވަނީ ފަށާފައެވެ.
މީގެ އިތުރުން މާލެ ސަރަޙައްދުގައި ވެސް މި ޚިދުމަތް ވަނީ ފުޅާކޮށްފައެވެ. އެގޮތުން ހުޅުމާލޭގެ ފުރަތަމަ އަދި ދެވަނަ ފިޔަވަހީގެ އިތުރުން ވިލިމާލޭގައި ވެސް މިހާރު ޕާސްޕޯޓުގެ ޚިދުމަތް ލިބެމުންދެއެވެ.
މި ސަރުކާރުން ވަނީ އަތޮޅުތަކުގައި ޕާސްޕޯޓާއި އައިޑީ ކާޑު ދޫކުރުމުގެ ޚިދުމަތް ފުޅާކުރުމަށް ޚާއްޞަ އިސްކަމެއް ދީފައެވެ. މިގޮތުން ގިނަ ރަށްރަށުގައި މި ޚިދުމަތް ފެށުމުގެ މަސައްކަތް ދަނީ ކުރިއަށެވެ.
މި ޚިދުމަތް އަތޮޅުތަކަށް ފުޅާކުރުމުގެ މައިގަނޑު މަޤްޞަދަކީ ރައްޔިތުންނަށް ލުއިފަސޭހަކަމާއެކު ޕާސްޕޯޓު ހެއްދުމުގެ ޚިދުމަތް ފޯރުކޮށްދިނުމެވެ. މީގެ ސަބަބުން މާލެއަށް ދަތުރުކުރުމަށް ކުރަންޖެހޭ ޚަރަދުތައް ކުޑަވެ، ރައްޔިތުންނަށް ފަސޭހަކަމާއެކު މި ޚިދުމަތް ލިބިގެންދާނެއެވެ.