މާލޭގައި ހުރި އަނބު ގަހަކުން ވަގަށް އަނބު ބިނދެގެން ދެ މީހަކު ހައްޔަރުކޮށް، އިއްޔެ ކްރިމިނަލް ކޯޓުން ވަނީ އެ މައްސަލައިގެ ތަހުގީގަށް އެ ދެ މީހުން ހަތް ދުވަހުގެ މުއްދަތަށް ބަންދުކޮށްފިއެވެ.
މި މައްސަލާގައި ހައްޔަރުކޮށްފައިވާ ދެ މީހުންނަކީ ގދ. ރަތަފަންދޫ، ނީލްވިލާ، މުހައްމަދު ސުހައިލް (33 އަހަރު) އާއި ހދ. ކުޅުދުއްފުށި، ކަސްތޫރިގެ، އަހްމަދު އަލީ (37 އަހަރު) އެވެ. ކޯޓުގެ ބަންދު އަމުރުގައި ފާހަގަކޮށްފައިވާ ގޮތުގައި މި ދެ މީހުންނަކީވެސް ކުރިން ހައްޔަރާއި ބަންދުގެ ރެކޯޑް އޮންނަ ދެ މީހުންނެވެ.
ކޯޓުގެ މަޖިލީހުގައި އެ ދެ މީހުން ބުނެފައިވަނީ އެ އަނބު ގަހަކީ މަގުމައްޗަށް ވާގޮތަށް ހުރި ގަހެއް ކަމަށް ވާތީ، އެ ގަހުން އަނބު ބިނުމަކީ މަނާކަމެއް ކަން ނޭނގޭ ކަމަށެވެ. އަދި އަނބު ބިނީ ގަހަށް އަރައިގެން ނޫން ކަމަށާއި ބިންމަތީގައި ހުރެގެން އަތްލެވޭ ވަރަށް ހުރުމުން އަނބު ބިނީ ކަމަށާއި، ބިނީ އެންމެ ހަތަރު އަނބު ކަމަށްވެސް އެ މީހުން ބުނެފައިވެއެވެ.
ނަމަވެސް، ފުލުހުންގެ ހާދިސާގެ ރިޕޯޓުގައިވާ ގޮތުން، އަހްމަދު އަލީ އޮތީ އަނބު ގަހުގައި ކަމާއި ތިރީގައި އަނބު ހޮވަން ހުރީ މުހައްމަދު ސުހައިލް ކަން އެނގޭ ކަމަށް ކޯޓު އަމުރުގައި ބަޔާންކޮށްފައިވެއެވެ.
މި ދެ މީހުން ވަގަށް އަނބު ބިނީ މާލޭގެ ކޮން ސަރަހައްދެއްގައި ހުރި ގަހަކުން ކަމެއް ބަންދުގެ އަމުރުން އެނގޭކަށް ނެތެވެ. މާލޭގެ އެކި ސަރަހައްދުތަކުގައި ހުންނަ އަނބު ގަސްތަކުން ވަގަށް އަނބު ބިނދެގެން މީގެ ކުރިން ވެސް އެކި ފަހަރު މަތިން މީހުން ހައްޔަރުކޮށްފައިވާކަން ފާހަގަކުރެވެއެވެ.