އިދިކޮޅު އެމްޑީޕީން ރޭ ބޭއްވި މުޒާހަރާގައި ބައިވެރިވި ފަރާތަކަށް ހާޓް އެޓޭކް ޖެހުމާ ގުޅިގެން އައިޖީއެމްއެޗްގައި ފަރުވާދީ، ހަދަންޖެހުނު އޮޕަރޭޝަން ހެދުމަށްފަހު މިހާރުވަނީ އައިސީޔޫން ނެރެ ސީސީޔޫގައި އެޑްމިޓްކޮށްފައެވެ.
އައިޖީއެމްއެޗުން މިއަދު ނެރުނު ނޫސްބަޔާނެއްގައި ބުނެފައިވާ ގޮތުގައި، ރޭ މާލޭގައި ބޭއްވި އެއްވުމުގެ ބައިވެރިއަކު މޭގައި ރިއްސައި، އެކިއުޓް މަޔޯކަރޑިއަލް އިންފަރކްޝަން (އޭ.އެމް.އައި) ނުވަތަ ހާޓް އެޓޭކް ޖެހުމާ ގުޅިގެން އާންމުންގެ މެދުގައި އުފެދިފައިވާ ކަންބޮޑުވުންތައް ހޮސްޕިޓަލުގެ ސަމާލުކަމަށް ގެނެވިފައިވެއެވެ.
ހާޓް އެޓޭކް އާންމު ގޮތެއްގައި ޖެހެނީ ޞިއްޙީ ކޮންމެވެސް ސަބަބަކާ ހެދި ހިތުގެ ލޭހޮޅިތައް ނުވަތަ ލޭހޮޅިއެއް ބެދި، ހިތުން ބަޔަކަށް ލޭ ފޮނުވުމަށް އަންނަ ހުއްޓުމަކާ ގުޅިގެން ކަމަށް ހޮސްޕިޓަލުން ފާހަގަކޮށްފައިވެއެވެ. އަދި މިފަދަ ހާލަތްތައް އާންމުކޮށް ދިމާވަނީ، ބަލިމީހާގެ ހުންނަ ޞިއްޙީ އެހެން މައްސަލައެއް ނުވަތަ މައްސަލަތަކެއްގެ ސަބަބުން ކަމަށްވެސް ބަޔާނުގައި ބުނެފައިވެއެވެ.
މުޒާހަރާގައި ބޭނުންކުރި ޕެޕަރ ސްޕްރޭއާ ގުޅޭގޮތުން ހޮސްޕިޓަލުން ބުނެފައިވަނީ، އޭގެ ސަބަބުން ވަގުތީ ގޮތުން ނޭވާލުމަށް އުނދަގޫވެ، ކެއްސުން ފަދަ ކަންކަން ދިމާވި ނަމަވެސް، ޕެޕަރ ސްޕްރޭއަކީ ސީދާ އޭގެ ޒާތުން ހާޓް އެޓޭކެއް ޖެހޭފަދަ އެއްޗެއް ނޫން ކަމަށެވެ. ނަމަވެސް ތަފާތު ގޮތްގޮތުން އުފުލާ ބުރައިގެ ސަބަބުން، ކުރިން ޞިއްޙީ މައްސަލައެއް ހުންނަ މީހަކަށް ހާޓް އެޓޭކެއް ޖެހުން ފަދަ ކަމެއް ދިމާވެދާނެ ކަމަށް ހޮސްޕިޓަލުން ފާހަގަކޮށްފައިވެއެވެ.
އައިޖީއެމްއެޗުން އިތުރަށް ބުނެފައިވަނީ، އެ ހޮސްޕިޓަލުން ފަރުވާ ހޯދާ ކޮންމެ ފަރާތަކަށްމެ އެފަރާތެއްގެ ހާލަތަށް ބަލައި، އެވަގުތު ދޭންޖެހޭ ފަރުވާ އެންމެ ފުރިހަމައަށް އަބަދުވެސް ދޭނެ ކަމުގެ ޔަޤީންކަން އަރުވާ ކަމަށެވެ.