ޤައުމީ ފަތުރުވެރިކަމުގެ ދުވަހުގެ މުނާސަބަތުގައި ވިޒިޓް މޯލްޑިވްސް ކޯޕަރޭޝަން (ވީއެމްސީ) އިން "ރާއްޖޭގެ ބުކް އޮފް ރެކޯޑްސް" ލޯންޗުކޮށްފިއެވެ. މިއީ ރާއްޖޭގެ ފަތުރުވެރިކަން އިޝްތިހާރުކުރުމަށް އެޅުނު މުހިންމު ފިޔަވަޅެއްކަމަށް ވިޒިޓް މޯލްޑިވްސްއިން ފާހަގަކޮށްފައިވެއެވެ.
ވީއެމްސީގެ މެނޭޖިންގ ޑިރެކްޓަރ އިބްރާހިމް ޝިއުރީ ވިދާޅުވި ގޮތުގައި، "ބުކް އޮފް ރެކޯޑްސް" އަކީ ރާއްޖޭގައި ހާސިލުކުރެވޭ އާދަޔާ ޚިލާފު ކާމިޔާބީތައް ލިޔެކިޔުމުން ބަލަހައްޓައި، މިފަދަ ރެކޯޑުތައް ދަމަހައްޓާ، އެފަރާތްތަކުގެ އަގު ވަޒަންކުރުމަށް ވިޒިޓް މޯލްޑިވްސް ކޯޕަރޭޝަނުން ފަށާ ޤައުމީ ފެންވަރުގެ މަސައްކަތެކެވެ. އަދި މިއީ އަހަރަކަށްވުރެ ގިނަ ދުވަހުގެ މަސައްކަތުގެ ނަތީޖާއެއްކަމަށްވެސް އެމަނިކުފާނު ފާހަގަކުރެއްވިއެވެ.
"އަޅުގަނޑުމެން ބުކް އޮފް ރެކޯޑްސް މި ހުޅުވާލަނީ ރާއްޖޭގެ ހުރިހާ ރެސޯޓުތަކަށްވެސް. އަދި ގެސްޓްހައުސްތަކަށްވެސް، ކައުންސިލްތަކަށްވެސް، ސްކޫލްތަކަށްވެސް. ޖުމްލަކޮށް ހުރިހާ އެންމެންނަށްވެސް ބައިވެރިވެވޭގޮތަށް،" ޝިއުރީ ވިދާޅުވިއެވެ.
ފަތުރުވެރިކަމާއި ތިމާވެއްޓާބެހޭ ވަޒީރު ޠާރިޤު އިބްރާހީމް ވިދާޅުވި ގޮތުގައި މި ރެކޯޑު ފޮތުގެ ސަބަބުން ރާއްޖޭގެ އެކި ސިނާއަތްތަކަށް ބޮޑެތި ކުރިއެރުންތައް ލިބޭނެއެވެ. އަދި މިއަންނަ އަހަރުގެ ޤައުމީ ފަތުރުވެރިކަމުގެ ދުވަސް އަންނައިރު މި ފޮތުގައި ގިނަ އަދަދެއްގެ މީހުންގެ ރެކޯޑުތައް ހިމެނިފައި ހުރުމަކީ އެމަނިކުފާނުގެ އުންމީދެކެވެ.
މި މަޝްރޫޢަކީ ރާއްޖެއަކީ ހަމައެކަނި "ސަން، ސޭންޑް، އަދި ބީޗް" މަންޒިލެއްގެ ގޮތުގައި އޮންނަ އޮތުން ބަދަލުކޮށް، ސްޕޯޓްސް ޓޫރިޒަމް ހިމެނޭހެން އެކި ދާއިރާތަކުން ރާއްޖޭގެ ތަފާތުކަން ދުނިޔެއަށް އިޝްތިހާރުކުރުމަށް ކުރެވޭ މުހިންމު މަސައްކަތެއްކަމަށް ވީއެމްސީން ފާހަގަކޮށްފައިވެއެވެ. މި ރެކޯޑް ފޮތުގައި ބައިވެރިވާ ފަރާތްތަކަށް ސެޓްފިކެޓަކާއި ހާއްސަ ކޮއިނެއް ދެވޭނެކަންވެސް ވަނީ ހާމަކޮށްފައެވެ.
ބުކް އޮފް ރެކޯޑްސްގެ ދަށުން ރާއްޖޭގައި ގާއިމްކުރާ އެކި ރެކޯޑުތަކުގެ ފުރިހަމަ މައުލޫމާތު ބެލެހެއްޓުމަށް ވަނީ ހަމަޖެހިފައެވެ. އަދި ވިޒިޓް މޯލްޑިވްސް ކޯޕަރޭޝަނުގެ ވެބްސައިޓެއް މެދުވެރިކޮށް، ރާއްޖޭގައި ގާއިމްކުރާ ރެކޯޑުތަކުގެ މައުލޫމާތު އާންމުންނަށްވެސް ފެންނާނޭ ގޮތަށް ބެލެހެއްޓޭނެކަމަށްވެސް ވީއެމްސީއިން ވިދާޅުވެއެވެ.