އެމްޓީސީސީ އިން އދ.ދިއްދޫގައި ކުރިއަށްގެންދާ ދެ މަސައްކަތް؛ ޞިއްޙީ މަރުކަޒުގެ އެކްސްޓެންޝަން އިމާރާތުގެ ބިންގާ އަޅައި، އދ. ދިއްދޫ ފުޓްސަލް ދަނޑުގެ އަމަލީ މަސައްކަތް ފަށައިފިއެވެ. މި އިމާރާތުގެ ބިންގާ އެޅުމުގެ ރަސްމިއްޔާތު ބޭއްވިފައިވަނީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އދ.އަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
އދ. ދިއްދޫގައި ފަށާ ފުޓްސަލް ދަނޑުގެ މަޝްރޫޢުގެ ދަށުން ބިންގަނޑު އެއްވަރުކުރުމުގެ މަސައްކަތާއި، ކޮންކްރީޓް މަސައްކަތްތަކާއި، ވަށާފާރު ރޭނުމާއި، ކަރަންޓް މަސައްކަތްތައް ކުރިއަށް ގެންދާނެއެވެ. މިއީ 1.74 މިލިއަން ރުފިޔާގެ މަޝްރޫޢެއް ކަމަށްވާއިރު، 120 ދުވަހުގެ ތެރޭގައި ނިންމުމަށް އެމްޓީސީސީއާ ހަވާލުކޮށްފައިވާ މަސައްކަތެކެވެ.
ޞިއްޙީ މަރުކަޒުގެ އެކްސްޓެންޝަން އިމާރާތުގެ ބިންގާ އެޅުމުގެ ރަސްމިއްޔާތުގައި އިމާރާތުގެ ބިންގާ އަޅުއްވައިދެއްވާފައިވަނީ މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރާއި، ދަނގެތީ ދާއިރާގެ މެންބަރު އަބްދުﷲ ރަޝީދާއި، ދިއްދޫ ކައުންސިލްގެ ރައީސް ޣައްސާން ޢަބްދުﷲ އެވެ.
13 މިލިއަން ރުފިޔާގެ ޞިއްޙީ މަރުކަޒުގެ މަޝްރޫޢުގެ ދަށުން 4600 އަކަފޫޓުގެ ސަރަޙައްދެއްގައި އިމާރާތްކުރުމާއި، ވަށާފާރު ރޭނުމާއި ޕޯޓިކޯއެއް ހެދުމުގެ މަސައްކަތް ހިމެނެއެވެ. މި މަސައްކަތް ނިންމުމަށް 9 މަސްދުވަހުގެ މުއްދަތެއް ދީފައިވެއެވެ.
މި އިމާރާތަކީ ދިއްދޫގެ ޞިއްޙީ މަރުކަޒުގެ ޚިދުމަތް ފުޅާކުރުމަށް ބޭނުންވާ ޖާގަ އިތުރުކުރުމަށް ކުރިއަށްގެންދާ މަޝްރޫޢެއް ކަމަށްވާއިރު، މި އިމާރާތް ނިމުމުން ދިއްދޫ ޞިއްޙީ މަރުކަޒުން ރައްޔިތުންނަށް ދެމުންގެންދާ ޚިދުމަތްތައް އިތުރަށް ފުޅާކުރެވި، ރަށުގެ ޞިއްޙީ ޚިދުމަތުގެ ފެންވަރު މަތިވެގެންދާނެ ކަމަށް އުންމީދުކުރެވެއެވެ.